KATOLSKI    

POSOŁ

Časopis katolskich Serbow
Załoženy 1863

Wudawa Towarstwo

Cyrila a Metoda z.t.

Póstowe naměsto 2
02625 Budyšin

 

Katolski Posoł9. měrca 1980

 

Don Boskowy dom poswjećeny

Dnja 31. januara 1980, na wopomnjenskim dnju swj. Jana Don Boska a 92 lět po jeho smjerći, poswjeći wosadny k. farar, msgr. M. Salowski, we Worklecach dospołnje wobnowjeny dom na mjeno swj. Jana Don Boska. Wužiwać budźe so dwuposchodowy dom z wjacorymi swětłymi rumnosćemi za nabožne zaměry wosebje dźěćiny a młodźiny.

Swjatočny akt zahaji so w kapałce chorownje. Msgr. Salowski wupraji w serbskej a němskej rěči dźak wšitkim, kotřiž su sej přez dwulětne dźěło wulke zasłužby zdobyli při zwoprawdźenju tutoho pastoralnje wažneho předewzaća. Při tym je so bjezdwěla wuznamjeniła jako iniciator a motor wšeho dušepastyrska pomocnica sotra Chrystamarija.

Wobdźiwujo jeje njepowalnu energiju, z kotrejž so za dźěćinu a młodźinu zasadźa, spóznawamy w jeje skutkowanju tójšto z ducha swj. Jana Don Boska. Nimo swojeje běžneje słužby je za rjemjeslnikami a pomocnikami běhała, a hdyž bě nuza wulka dosć, sama z dźěćimi pomhała, jenož zo by skónčnje wšitko hotowe było. Skeptikarjo su so jej smějkotali, wona jako žónska pak je so sylniša wopokazała. Štož hišće hody za móžne njemějachmy, to so nam skónc januara skići: dospołnje zarjadowany dom, wuhotowany z mobiliarom, z křižemi a wobrazami na sćěnach a z kwětkami na blidach.

Ale toho nic dosć: Ze skupinu dźěći bě sotra nazwučowała sceny ze žiwjenja swj. Jana Don Boska. Dźěći a dorosćeni we wulkej ličbje a ze zajimom předstajenje sćěhowachu. Zeznachu so z přikładnej maćerju małeho Jana, kotraž jeho pozdźiši puć žiwjenja sobu wobwliwowaše. Ani čisto materielnje zmysleny bratr Anton njezamóh jemu lubosć k wuknjenju z hłowy wubić kaž wšak knihu z rukow. Přihladowarjo spóznachu tež wuznam zetkanja z duchownym, kotryž wobdarjenemu hólcej dale pomhaše. Jimaca bě skónčna scena, jako měšnik Don Bosko prěnich wuwučenych rjemjeslnikow – něhdy sebi samym přewostajenych worakawcow – jako fachowcow wupósła a woni jemu a Chrystusej swěru slubichu.

Kaž w kapałce, tak tež w nowym domje holča šola wšitko ze spěwom rjenje wobrubi.

Po puću z kapałki k njedalokemu domej spěwachu wšitcy w procesionje kročo kěrluš maćeri Božej, kotruž bě tež Don Bosko dźěsćowsce česćował. Před hišće zawrjenym domom přepoda twarski nawoda, knjez Krawža, wulki kluč wosadnemu fararjej, kotryž pak jón hnydom na to sotře Chrysćemariji dowěri. Rjana to gesta. Za wosadu bě dom twariła, k dobremu wosady budźe jón wužiwać.

W domje samym wuspěwa msgr. Salowski modlitwy k poswjećenju domu, wokrjepi jón ze swjećenej wodu a napisa na wjacore durje C+M+B, kaž smy to wot domyswjećenja zwučeni. Chrysće, žohnuj tutón dom! A mócnje zaklinča „Tebje my Boha chwalimy“.

W mjenje k. biskopa porěča a dari domej hóstnu knihu diecezanski dušepastyr dźěći, k. rada A. Ziegert. Kaž hižo farar w kapałce podźakowa so tež wón za wulkotny skutk. Zasłužbnych twarcow, dobroćelow a pomocnikow wobdarichu dźěći z kwěćelom a wulkej fotografiju swj. Don Boska.

Wobhladujo sej dom jón wšitcy chwalachu, wuzběhujo jeho cyłkownu harmoniju. Zawěsće budźe so w nim derje wuknyć a nazwučować, Chrystusa w duchu swj. Don Boska rady a wjesele sćěhować.

G. Wornar

 

CMS by jan budar media | Alle Inhalte sind © by Katolski Posoł 2008