KATOLSKI    

POSOŁ

Časopis katolskich Serbow
Załoženy 1863

Wudawa Towarstwo

Cyrila a Metoda z.t.

Póstowe naměsto 2
02625 Budyšin

 

Katolski Posoł · 8. nowembra 2009

 

„Z Božej mšu so škałba do njebjes wotewrje“

Nowy Róžeńčanski pater Irenäus chce staru mnichowsku tradiciju wobchować

Ewangelski duchowny ma wulki podźěl na tym, zo je so nowy Róžeńčanski pater Irenäus Krause před dwanaće lětami katolsce wukřćić dał. Zdobom je w nim wulku lubosć za dostojne swjećenje liturgije wubudźił.

„Njejsym jako dźěćo a młodostny ani wědźał, zo njejsym křćeny“, powěda pater Irenäus. „Mojej staršej staj ewangelskaj. Nan je na to dźiwał, zo žanym NDRskim dźěćacym a młodźinskim organizacijam njepřisłušach. Je pak mje na nabožnu wučbu słał.“ Dla toho njeje kónc lěta 1972 w durinskim měsće Gotha rodźeny Daniel Krause abituru złožić směł. Hižo jako hólčec je so za hudźbu wulkeho Johanna Sebastiana Bacha horił, rady jeho twórby na klawěrje hrał a dźensa praji: „Bach je tón, kotryž w njebjesach pišćele hraje.“ Hudźbnje je nowy Róžeńčanski pater tak nadarjeny, zo je so 1986 na wysoku hudźbnu šulu we Weimarje podać móhł. Politiski přewrót zmóžni jemu, zo abituru złoži. Potom je w Jenje filozofiju a stawizny studować počał. „Přez filozofiju sym přeco bóle za Bohom a ,dopokazami‘ za jeho eksistencu pytał“, praji nětčiši katolski duchowny. Tohodla je tež studij teologije přizamknył. Z protestantiskeho staršiskeho domu pochadźacy je so za ewangelsku teologiju rozsudźił. Po „typiskim studentskim žiwjenju“, kaž je sam mjenuje, je do eksistencielneje krizy přišoł. „Z tuteje je mje Knjez wutorhnył, z tym zo je mi ,muža Božeho‘ přidał, kotryž je wot toho časa mój duchowny nan a nanowski přećel“, pisa pater Irenäus w swojim žiwjenjoběhu. Měnjeny je pater Franz M. Schwarz, ewangelski farar a prior ekumeniskeje zhromadnosće St. Wigbert we Werningshausenje sewjernje Erfurta. Po tym zo je Daniel Krause tutu zhromadnosć 1996 zeznał, je wot lěta 1998 w njej žiwy był. Pater Franz je w tutym času w nim lubosć k Božej mši a maćeri Božej wubudźił. W lěće 1997 je so Daniel Krause katolsce wukřćić a firmować dał. „Runje zaběra z ewangelskej teologiju, z Lutherom a swjatym Tomašom Akwinskim je we mni přeswědčenju rosć dała, zo mam so za katolsku cyrkej rozsudźić.“ Hač do zastupa do cistercienskeho klóštra Heiligenkreuz w Bochumskim prioraće w swjatym lěće 2000 je Daniel Krause we Werningshausenje jako kantor a twarski dźěłaćer skutkował. W Róžeńće, hdźež bě so Daniel Krause najprjedy přizjewił, njesmědźachu přemałeho konwenta dla nowicow přiwzać. Lěto pozdźišo – nětko z rjadniskim mjenom Irenäus – je prěnje sluby złožił a na mjeztym Bamžowskej wysokej šuli w awstriskim Heiligenkreuz teologiju studował. Nětko smě sam studentam potajnstwa wěry wotkryć pomhać, dokelž ma dowolnosć za wuwučowanje nowych studentow w dogmatice. Po měšniskej swjećiznje loni w aprylu je we Wiener Neustadće, 50 kilometrow južnje Wiena, jako kapłan skutkował. Tam maja cisterciensojo priorat ze šěsć mnichami a wjele dušepastyrskich nadawkow we wosadźe. Pater Irenäus bě zdobom dušepastyr w chorowni a policajski dušepastyr.

Nětko w Róžeńće drje nima pater Irenäus žanych sobumnichow, ale nječuje so samotny. „Sym wězo z klóštromaj Marijinej Hwězdu a Marijinym Dołom, hdźež sym za sotry zdobom spriritual, zwjazany. Wostanu tež ze swojimi sobubratrami klóštra Heiligenkreuz w zwisku. Hačrunjež sym drje ke chórowemu modlenju jako mnich sam w cyrkwi, tak spěwam tola zhromadnje ze wšěmi jandźelemi a swjatymi.“

Nic jenož tohodla, dokelž njeje planowane, zo dalši mniša do Róžanta přińdu, by so wjeselił, hdy by so tón abo tamny w cyrkwi jeho chórowemu modlenju we łaćonskej rěči přidružił a, byrnjež słowa njezrozumił, ćicho Boha sobu chwalił. „Cyrkej móžemy dźě jenož so modlo wuchować.“ Wón chce staru mnišu tradiciju chwalby Boha w Róžeńće dale wjesć.

Štož je pater Irenäus sam spočejo we Werningshausenje nazhonił, chce tež nětko z Róžanta sem dale dać. „Mi wšak je wažne, zo Boha z cyłeje wutroby chwalimy. To činimy z našim modlenjom jako mniša, ale tež zhromadnje dostojnje liturgiju swjećo. Wšako so ze swjećenjom Božeje mšě škałba do njebjes wotewrje.“

Wotewrjeny pak njeje jenož Bohu napřećo, ale tež wšěm ludźom, kotřiž do Róžanta přińdu. Administratura tule je wotewrjeny dom, do kotrehož je kóždy přeprošeny přińć. „Sym tu, zo bych Boha chwalił a zo bych dušepastyrsce ludźom pomhał a z nimi jich žiwjenje dźělił.“ A dokelž je w dwurěčnej Łužicy, chce tež serbsku rěč nawuknyć a ludźi tež doma wopytać. „Wšako wisa kluč za dušu doma“.  

R. Ledźbor

 

CMS by jan budar media | Alle Inhalte sind © by Katolski Posoł 2008