Katolski Posoł – 1. junija 2025
Što stawa so woprawdźe we wutrobje toho, kiž so modli, praša so awtor zawodneho nastawka. Wón skedźbni na toho, kiž ludźom pokaza, kak so paćer ze žórłom mocy za lubosć a jednotu stanje.
Hnydom dwaj wjerškaj dožiwichu samostejacy ze serbskich wosadow w sakskej stolicy. Prěni běše w katedrali Drježdźansko-Mišnjanskeho biskopstwa, druhi w susodstwje – w krajnym sejmje.
Skupina putnikow poda na wuznamne městno w juhozapadnej Francoskej. Wottam pak podachu so tež na mjenje znate městno, hdźež so na swěčkowym procesionje wobdźělichu.
Kóžde prěnjowoprawjenske dźěćo w Chrósćicach donjese pumplróžu do wołtarnišća. A wosadny farar jim z njej něšto rozłoži.
W Kulowje maja nětko Komorku za serbsku drastu. Tu móža sej zajimcy wobhladać, hdyž sej přichodnu wutoru, 3. junija, w 17.00 hodź. do tamnišeho Jakubecoweho wustawa na přednošk „Serbska katolska drasta w běhu časow“ dojědu.
Pod hesłom „Serbska drasta 2.5 – kreatiwnje zhromadnje šić a ze swójskej drastu domoj hić“ zarjaduje syć za serbsku rěč a regionalnu identitu ZARI pjatk a sobotu, 29. a 30. awgusta kaž tež 5. a 6. septembra, stajnje wot 10.00 do 16.00 hodź. dźěłarničku pod nawodom Štefi Hanušoweje. Wšitcy su přeprošeni, sej swójsku narodnu drastu zešić. Přizjewjenja přijimuje pola ZARI Sonja Hrjehorjowa hač do póndźele, 28. julija, pod telefonowym čisłom (0 35 71) 6 08 46 14 abo z mailku pod adresu sonja.hrjehorjowa@domowina.de.
W Budyskim Ludowym nakładnistwje ma bórze jubilejna kniha składnostnje kulowateje róčnicy prěnjeho pisomneho naspomjenja serbskeje wsy a wosady wuńć. Zajimcy móža sej publikaciju hižo nětko předskazać.
Serbska protyka
