Katolski Posoł – 10. awgusta 2025
Koho Jězus pyta? Z tym zaběra so serbski duchowny w swojim zawodnym nastawku. Mjez druhim wón rozłoži, kotre kajkosće su trěbne, chce-li so čłowjek z Bohom zetkać, a što to za žiwjenje woznamjenja.
Nimo młodostnych je tež lětsa zaso skupina dorosćenych na čěske hnadowne městno putnikowała. Na nje kaž tež na temu, wo kotrejž běchu tónkróć rozmyslowali, zhladuje awtorka w swojim přinošku.
Mjezynarodnosć a mnohotnosć wěry su młodźi ludźo ze wšeho swěta na tydźenju swětoweje młodźiny w Romje dožiwili. Mjez nimi bě skupina Drježdźansko-Mišnjanskeho biskopstwa, z kotrejž wobdźělichu so tež serbscy młodostni na najwjetšim zarjadowanju Swjateho lěta. Jedna z nich rozprawja w swojim přinošku wo swojich dožiwjenjach.
Hańža Ješcyna z Kopšina je jako dźěćo šćěpjeńcu na nabožnym a narodnym polu dožiwiła. W juliju bu wona w žohnowanej starobje do wěčnosće wotwołana.
Serbska dekanatna młodźina je na wulět přeprošena, kotryž budźe njedźelu, 24. awgusta. Planowane je z busom do Deška pola Rózborka jěć a wottam po Nysy čołmikować. Zajimcy měli so hač do srjedy, 13. awgusta, online přizjewić.
„Serbske nabožne a narodne lajske dźiwadło w Chróšćanskej wosadźe wot lěta 1877“ rěka nowa wobrazowa wustajeńca, kotruž je sekcija „Wěda a skutk“ Towarstwa Cyrila a Metoda z.t. zestajiła. Wurězk z njeje – dźesać taflow – budźe na zelowej njedźeli a swójbnym swjedźenju w Pančicach-Kukowje, 17. awgusta, přistupny, a to w lodowej pincy Zežiwjenskeho a zeloweho centruma. Cyłkownu přehladku móža sej wšitcy zajimcy kaž tež hosćo kongresa Europassion w septembrje w Chrósćicach wobhladać.
Křesćansko-socialny kubłanski skutk z.t. přeprošuje zhromadnje z klóštrom Marijinej hwězdu na zelowu njedźelu do Zežiwjenskeho a zeloweho centruma w Pančicach-Kukowje,
kotraž budźe 17. awgusta. Zdobom budźe to lětsa klóšterski a swójbny swjedźeń. Swjedźenske kemše w 10.30 hodź.
budźe Zhorjelski generalny
wikar Markus Kurzweil swjećić.
Zakónčacy ekumeniski nyšpor ze žohnowanjom zelow, kotryž swjeći mjez druhim fararka Jadwiga Malinkowa ze Slepoho, budźe w 17.00 hodź.
Serbskich młodostnych přeprošuje Towarstwo Cyrila a Metoda z.t. (TCM) na jězbu do Dachauwa a Mnichowa. Wona wotměje so wot pjatka do soboty, 3. do 4. oktobra. Přizjewjenja su online móžne.
Za pasionske předstajenja w septembru na farskej łuce w Chrósćicach móža sej zajimcy wotnětka zastupne lisćiki kupić – tuchwilu pak jeničce online. Tež do předstajenja budu je při kasy předawać.
Lětuši koparski turněr ministrantow ze serbskich wosadow budźe
sobotu, 30. awgusta,
w Pěskecach. Započatk je
w 9.00 hodź. z Božej mšu we wjesnej kapałce. Přizjewjenja přijimuje dekanatne dušepastyrstwo we Worklecach hač do pjatka, 15. awgusta.
Na wuměnu z pólskimi młodostnymi a dźěłarničku ikonografije přeprošuje Budyski Serbski muzej młodostnych. Ta budźe wot pjatka do soboty, 19. do 20. septembra, w „Domje Gerharta Hauptmanna“ w Jelenjej Górje a je za młodostnych darmotna.
Wšitcy wěriwi su sobotu, 23. awgusta, na zhromadny dźeń Budyskeho dekanata pod hesłom „Marija – znamjo nadźije“ do Róžanta přeprošeni. Liturgiske zahajenje budźe w 15.00 hodź. z wustajenjom Najswjećišeho w putniskej cyrkwi. Hižo wot 14.00 hodź. poskića wosady kofej, jeli to same organizuja. Štóž chce, móže piknikować. Wot 16.00 do 18.00 hodź. změja zamołwići pisany program wokoło cyrkwje spřihotowany. Dekanatny dźeń zakónči so z Božej mšu we 18.00 hodź. w Róžeńčanskej swjatnicy. Tón dźeń předwječorne kemše w serbskich wosadach njebudu.
Lětuši Gig-festiwal je wot pjatka do njedźele, 15. do 17. awgusta, w Róžeńće planowany. Program kaž tež přehlad wobdźělnikow stej na internetowej stronje festiwala wozjewjenej.
Serbska protyka
