Katolski Posoł – 10. septembra 2023
Wo jandźelach na zemi pisa awtor zawodneho nastawka. Při tym powěda dožiwjenje z woneho wokomika, w kotrymž chcyše loni z dowola domoj jěć. Ale njepřińdźe z blaka.
Na putniskich kemšach w Nowej Cali rozłoži Zhorjelski biskop Wolfgang Ipolt, što je žórło a měritko woprawdźiteje lubosće k blišemu. Jeho sobubratr z Legnicy pokaza puć, kak hodźeli so tuchwilne krizy ludźi a cyrkwje přewinyć.
Gerat Róbl ze swojim Towarstwom swjateje Filomeny z.t. je wospjet pomocny transport přewjedł. Tónraz njetrjebaše dary hromadźić. Woteda je w přewažnje prawosławnym kraju romsko-katolskim rjadnicam, kotrež je ze wšěmi potrěbnymi dźěla.
Něhdźe 80 wosobow je na prěnje wot sekcije “Swójba” Towarstwa Cyrila a Metoda z.t. wuhotowane popołdnjo přišło. Zhonichu wo wulkim serbskim wótčincu runje tak kaž wo němskej zemjanskej swójbje, kotraž je Serbam wjele dobrotow wopokazała.
Kubłanski fachowc a hudźbna pedagogowka z Budyskeho wokrjesa dóstaštaj najwyši sakski rjad. Wobaj skutkujetaj tež na dobro Serbow.
Recensentka je so nadrobnje z dwurěčnej knihu „Čejʼ da sy? – Einblicke in die sorbische katholische Welt“ zaběrała. Swój facit sformuluje ze słowom titula nowostki.
Serbscy katolscy młodostni wobhladachu sej impozantny hród a padlowachu po łužiskej rěce. K tomu njetrjebachu Budyski wokrjes wopušćić.
Worklečanske młodźinske dušepastyrstwo přewjedźe tež klětu zaso za zajimcow kurs JULEICA. Na nim móžeš sej kmanosće k nawjedowanju skupin dźěći a młodostnych přiswojić. Wukubłanje wobsteji z dweju dźělow a wotměje so stajnje wot pjatka do njedźele, 2. do 3. februara, kaž tež wot 26. do 28. apryla, w Smochćicach, tam z přenocowanjom. Zajimcy měli so nimo toho na kursu prěnjeje pomocy wobdźělić. Tón budźe sobotu, 2. měrca, we Worklečanskim Don Boskowym domje. Přizjewjenja přijimuja online.
W Budyšinje je křesćanska swójba jara ze židowstwom zwjazana. Wona hižo dlěje hač 30 lět něšto čini, wo čož běše ju posledni žid z Budyšina prosył.
Kulowske Bratrowstwo je swoju najnowšu hru 300 kilometrow wotdoma preč w serbskej rěči předstajało. Tam pod hołym njebjom tež němsko-delnjoserbsku Božu słužbu swjećachu
W nowej knize wo dźiwadłowej hrě „Mór a lubosć“, kotruž je Towarstwo Cyrila a Metoda z.t. (TCM) spočatk septembra wudało, je QRcode podaty, kotryž wjedźe na film wo tutej hrě. Něhdźe 280stronsku knižnu dokumentaciju z wjace hač 400 fotami předawa TCM za 30 eurow pola časnikarja Jürgena Njeka kaž tež w Zahrodnikec pjekarni w Chrósćicach, w apotece w Pančicach-Kukowje, w redakciji Katolskeho Posoła w Budyšinje kaž tež pola Rafaela Ledźborja w Ralbicach.
Dekanatne dušepastyrstwo za dźěći zarjaduje za 1. a 2. lětnik dźeń pod hesłom „Dźak Ći, Božo“. Wón wotměje so sobotu, 30. septembra, wot 9.00 do 15.00 hodź. we Worklečanskim Don Boskowym domje. Za wudawki zběraja wot kóždeho wobdźělnika přinošk pjeć eurow. Zajimcy měli so hač do njedźele, 24. septembra, online přizjewić.
Katolska domowa hudźba při Budyskej tachantskej cyrkwi swjateho Pětra zahaji w zymskim semestrje chórowy spěwny kubłanski projekt za dźěći a młodostnych w šulskej starobje. Přizjewjenja přijimuja hač do njedźele, 24. septembra.
Smochčanske kubłanišćo swjateho Bena přeprošuje pory, kotrež chcedźa swój poćah skrućić, na kurs „Mjez sobu so zrozumić – partnersce komunikować“. Tón wotměje so wot pjatka do njedźele, 27. do 29. oktobra
Serbska protyka
