Katolski Posoł – 12. oktobra 2025
Wo dóńće a swědčenju čěskeho měšnika w komunistiskej dobje pisa awtor zawodneho nastawka. Wón tež přispomnja, kak je pozdźiši generalny wikar po politiskim přewróće na swojich čwělowarjow zhladował.
Redakcija chce Katolski Posoł běžnje polěpšeć. Tohodla, ale tež na namołwu spěchowarjow, přewjedźe hač do tuteje njedźele, 12. oktobra, naprašowanje, kotrež so běše so z wudaćom Katolskeho Posoła 28. septembra rozpósłało. Samsne prašenja hodźa so tež online wotmołwić.
Za ewangelskeho serbskeho fararja su w jeho ródnej wsy wopomnjensku taflu wotkryli. Při tym wuzběhnychu, zo běše wón samo załožer moderneho plahowanja pčołkow Europy.
W Lipsku su njeznaći narowny křiž tamnišich měšniskich rowow wotrězali a pokradnyli. Jedyn z najwuznamnišich wuhotowarjow cyrkwinskeho wuměłstwa w 20. lětstotku běše tónle křiž zhotowił.
Na staroznatym městnje su rjedźerki Wotrowskeje cyrkwje tójšto jim noweho zhonili. Při tym njetrjebachu wosadnu wjes ani wopušćić.
W Pančicach-Kukowje a we Wotrowje su dźěći do swjećenja domchowanki zapřijeli. Na jednym městnje běchu k tomu za čas kemšow katechezu zwonka cyrkwje přewjedli. –
Ze starodawnym, ale hakle před štwórć lětstotkom znowazałoženym katolskim klóštrom w maćernym kraju reformacije, „stolicu“ Eichsfelda, surowym dźělenjom, Herkulesom, Šikwanej Lizku a Burskej wójnu zaběrachu so serbscy wulětnikarjo kónc septembra a spočatk oktobra. Woni běchu na přeprošenje Towarstwa Cyrila a Metoda z.t. po puću.
Dopominać so, zrozumić, so spjećować a njemjelčeć – to su serbscy młodostni na jězbje do Dachauwa a Mnichowa nazhonili. Na wuprawje, kotruž běštej Towarstwo Cyrila a Metoda z.t. a Worklečanske dekanatne dušepastyrstwo za nich organizowałoj, zaběrachu so wosebje ze serbskim zbóžnym kapłanom Alojsom Andrickim.
„Won do swěta – Auf in die Welt“ rěka nowy dźiwadłowy kruch Budyskeho Němsko-Serbskeho ludoweho dźiwadła, kotryž sobotu, 18. oktobra, w 19.00 hodź. w Radworskim hosćencu „Meja“ prapremjernje předstaja. W nim zaběraja so z wupućowanjow Serbow z Delnjeje Łužicy do Awstralskeje.
Seminar k přihotej na sakrament mandźelstwa wotměje so wot pjatka do soboty, 28. do 29. nowembra, w Smochčanskim kubłanišću swjateho Bena. Přizjewjenja přijimuje Dekanatne dušepastyrstwo młodźiny we Worklecach jeničce online. Tam su tohorunja hižo přizjewjenja za klětušej terminaj samsneho seminara móžne. Wonej stej stajnje wot pjatka do soboty planowanej, prěni wot 27. do 28. februara, druhi wot 27. do 28. nowembra.
Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošeni. Tón budźe srjedu, 19. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje přeprošeni. Zajimcy měli so hač do pjatka, 1. nowembra, online přizjewić.
Družki ze serbskich wosadow, kotrež noša postawu swjateje Marije do Róžanta, su na zhromadnu putnisku jězbu z busom do Roma přeprošene. Putnikowanje wotměje so klětu w prěnim tydźenju zymskich prózdnin, a to wot njedźele do soboty, 8. do 14. februara. Wobdźělnikow wočakuja mjez druhim wopyt Pětroweje cyrkwje, Vatikanskich muzejow a katakombow, generalna awdienca z bamžom Lejom XIV. kaž tež Boža mša z Drježdźansko-Mišnjanskim biskopom Heinrichom Timmereversom. Sobu jěć smědźa wšitcy, kiž su 14. žiwjenske lěto dokónčili. Přizjewjenja přijimuja hač do štwórtka, 30. oktobra, na Chróšćanskej farje.
Serbska protyka
