Katolski Posoł – 14. decembra 2025
Dožiwjenje na lětanišću běše serbskemu duchownemu dobry wobraz za adwentny čas. Wo tym pisa w swojim zawodnym nastawku. Zdobom wón na to pokaza, kak so tež ewangelij tuteje njedźele k tomu hodźi.
Na spomóžne dźěło z poradźenymi wjerškami je Kulowske Bratrowstwo na swojej hłownej zhromadźiznje zhladowało. Wulki zajim zbudźi pak mjez přitomnymi tež dźěl přednoška, kotryž dožiwichu po bilancowanju dźěławosće.
W Jaseńcy wotmě so znowa beneficny spěwny wječork. Zezběrane pjenjezy darja tónkróć spěchowanskemu towarstwu za Keniju, kotrež běštaj Smječkečanaj załožiłoj a w kotrymž so tež Serbowka angažuje. Wona je dźěło towarstwa tón wječor bliže předstajiła.
Seniorojo serbskeje wosady zetkachu so njedawno k swojej kóždolětnej adwentničce. Tónraz bě ju šulski chór serbskeje zakładneje šule wobrubił a mały dohodowny koncert poskićił.
Přehladka Božich narodkow w čěskim Jiříkovje zjednoća stawizny a přichod. Wona pokazuje na dołholětnu tradiciju jich zhotowjenja w Šluknovskim wuběžku.
Do klóštra Marijineje hwězdy w Pančicach-Kukowje a serbskich gmejnow při Klóšterskej wodźe móža wopytowarjo wotnětka tež multimedialny dohlad dóstać. Tele dny bu tam nowy digitalny informaciski system předstajeny.
Kak móžu Jězusej puć rubać? To běše tema adwentneje talkshow na nyšporje serbskeje dekanatneje młodźiny w Pančicach-Kukowje. Wona běše so tam k swojej lětušej adwentničce zhromadźiła.
Multimedialnu produkciju pod hesłom GENEZIS 2.0. móža wopytowarjo sobotu, 20. decembra, štyri króć w Chróšćanskej cyrkwi dožiwić. Tam pokazaja ju w 17.00 a 17.30 hodź. kaž tež w 20.00 a 20.30 hodź. Zestajał bě ju wučomnik za zarjadnisku techniku Bosćan Donat. Z pomocu třoch projektorow předstaji wón mjez druhim swětosławny wjerch Vatikanskeje Sixtinskeje kapały Michelangela. W 25mjeńšinskej dramaturgiji wuwiwa so stawizna wo stworjenju swěta, nic pak cyle tak, kaž je z biblije znata. Nimo wobrazow wobsteji produkcija z hudźby, rěčanych tekstow a meditatiwneho dźěla.
Sekcija wěda a skutk Towarstwa Cyrila a Metoda z.t. (TCM) přewjedźe klětu wot njedźele, 30. awgusta, do pjatka, 4. septembra, wulět do Haibacha w nižobayerskim wokrjesu Straubing-Bogen. Wottam wopyta skupina wjacore městna w Bayerskim lěsu, mjez druhim Kelheim, klóšter Weltenburg, Straubing, putnisku cyrkej Bogenberg, Bad Kötzing a horu Wulki Arber. Zajimcy měli so hač do póndźele, 12. januara, pak online přez eveeno abo w redakciji Katolskeho Posoła přizjewić.
Wo swojich dožiwjenjach w Nowoseelandskej přednošujetaj Jakštec mandźelskaj z Chrósćic w serbskej a němskej rěči sobotu, 20. decembra, w 19.45 hodź. Na to přeprošuje Monika Gerdesowa we wobłuku kulturneje zymy do Chróšćanskeje putniskeje hospody. Serbske kino za dźěći budźe wospjet w 16.00 hodź.
Serbska protyka
