Katolski Posoł – 14. septembra 2025
Na swjedźeń, na kotryž cyrkej tutu njedźelu dopomina, pokaza serbski duchowny w swojim zawodnym nastawku. W srjedźišću něšto steji, štož dósta w štwórtym lětstotku nowy woznam a štož móže tež dźensa čłowječu perspektiwu změnić.
We wobłuku swjatočneje ceremonije je bamž Leo XIV. dweju Italčanow, kotrajž staj młodaj zemrěłoj, swjatoprajił. Na swjatočnosći wobdźělichu so tež swójbni noweju swjateju.
Wšelake rěče słyšachu wěriwi w Róžeńčanskej swjatnicy. Ze wšěch serbskich wosadow běchu na swjedźenju Marije naroda na hnadowne městno putnikowali.
Božu słužbu w hinašej hač hewak w cyrkwi znatej formje móžachu a móža wopytowarjo w Chrósćicach dožiwić. Tam předstaji nimale 200 akterow po dźesać lětach wospjet pasion, tónkróć pak na nowe wašnje.
W Ralbicach je wosadny farar Šćěpan Delan zakładny kamjeń za nowu wosadnicu požohnował. Do njeje něšto połožichu, štož budźe tež widźeć, hdyž nowy dom wužiwaja.
Zbrašeni zarjadnišćow Socialneho skutka Carity (CSW) su tež lětsa zaso zhromadnje do Róžanta putnikowali. Po kemšach móžachu sej wšitcy něšto sobu wzać, štož su do Božeje mšě do kartona ćisnyli.
Na putnikowanju Zhorjelskeje diecezy do Noweje Cale je so tohorunja biskop z Ruskeje wobdźělił. Na kóncu Božeje mšě je městny biskop hišće wosebitemu narodninarjej mjez wobdźělnikami gratulował.
Na Budyskim židowskim kěrchowje spominachu na pochowanych židowskich wobydlerjow města. Modlenje kadiš wotměje so tam stajnje prěnju njedźelu septembra.
W Baćonskej wosadźe buštej nowej ministrancce do aktiwneje słužby přiwzatej a třo ministranća z njeje rozžohnowani. Jim so wosadny farar podźakowa.
Składnostnje lětušeje 100. róčnicy swjatoprajenja swjateje Terezije z Lisieuxa budźe relikwiar z někotrymi jeje smjertnych powostankow wot srjedy do pjatka, 17. do 19. septembra, w Drježdźansko-Mišnjanskim biskopstwje. Prěnja planowana stacija je Budyska cyrkej Našeje lubeje Knjenje. Za wšěch serbskich wěriwych budźe srjedu, 17. septembra, we 18.00 hodź. nyšpor z duchownymi impulsami a wujasnjenjemi. Štwórtk, 18. septembra, w 9.00 hodź. budźe zakónčaca Boža mša w cyrkwi Našeje lubeje Knjenje za wšěch wěriwych. Na česćowanje relikwijow su wěriwi ze wšěch wosadow přeprošeni.
Worklečanske dekanatne dušepastyrstwo za dźěći a młodźinu přeprošuje dźěći 4. a 5. lětnika na zhromadny dźeń pod hesłom „Swjaty Carlo Acutis – přikład tež za mnje?!“. Tón budźe srjedu, 8. oktobra, wot 9.00 do 15.00 hodź. w Don Boskowym domje we Worklecach. Zajimcy měli so hač do srjedy, 1. oktobra, online přizjewić.
„Swětłowy wječor za přećelow“ je hesło prěnjeho zarjadowanja noweho rjadu, na kotryž přeprošuje kruh přećelow klóštra Marijineje hwězdy w Pančicach-Kukowje. Wone budźe sobotu, 20. septembra, w 17.30 hodź. w klóšterskej kofejowni swjateho Michała. Wšitcy su wutrobnje přeprošeni. Dr. Marius Winzeler a sotra Tadeja Zelnakec budźetaj wo klóštrje a jeho jandźelach přednošować. Zdobom zhonja zajimcy wjace wo wosebitym małym jandźelu, kotrehož restawrowanje móža podpěrać. Zastup za zarjadowanje wučinja na wosobu 25,00 eurow. Zapřijatej stej kulinariske zastaranje kaž tež 5,00 eurow dara za restawrowanje jandźela, kotryž tón wječor předstaja. Zastupne lisćiki dóstanu zajimcy jenož w předpředani w klóšterskej pjekarni a kofejowni swjateho Michała.
Hornjołužiske telefonowe dušepastyrstwo poskićuje wukubłanje za čestnohamtske sobuskutkowanje. K tomu su wšitcy zajimcy na informaciske zarjadowanja přeprošeni. Tajke budźe mjez druhim štwórtk, 18. septembra, w 19.00 hodź. w Budyskim Ekumeniskim tachantskim wobchodźe.
Serbska protyka
