Katolski Posoł – 15. junija 2025
Wo wosebitych wokomikach w dźěćatstwje a što maja wone ze swjedźenjom tuteje njedźele zhromadneho, pisa serbski duchowny w swojim zawodnym nastawku. Zdobom wón wuwjedźe, do čeho wony swjedźeń kóždeho křesćana woła.
Před 35 lětami putnikowachu wěriwi ze serbskich wosadow swjatkownu póndźelu prěni raz do Róžanta. Tež lětsa běchu so tam zaso k Božej mši zhromadźili. Kemše pak je wosada wuhotowała, kotraž to na tym putnikowanju dotal hišće ženje činiła njeje.
Wo dopomnjenkach serbskeho ludoweho wuměłca na swjedźeń Božeho ćěła w 1930lětach w serbskej wsy pisa awtor w swojim přinošku. Tam čitar zdobom zhoni, čehodla maja we wonej wsy hišće dźensa chorhoje we wěstymaj barbomaj wupowěsnjene.
Na 25 lět w měšniskej słužbje je serbski duchowny w Kulowje zhladował. Swjedźensku Božu mšu swjećeše z mnoho sobubratrami a wěriwymi tež z druhich wosadow.
We wobłuku poswjećenja studnje z pitnej wodu na Hłownym torhošću w Budyšinje je towarstwo katolskej wosadźe města pjenježny dar přepodało. Tón je za ponowjenje Božeho domu postajeny.
W Chrósćicach swjeća tele dny
800. róčnicu prěnjeho naspomnjenja tamnišeje wosady a wsy. Za to su mnohostronski program zestajeli. Přehlad je tule wozjewjeny.
Wotrjad za dźěći, swójby a młodźinu Drježdźansko-Mišnjanskeho biskopstwa přeprošuje wšitkich zajimcow na dźěłarničku, w kotrejž katechezy za dźěći w srjedźišću steja. Wone měrja so na wšitkich, kiž so we wosadach za dźěći angažuja a na přikład swójbne kemše, nabožny prózdninski tydźeń abo prěnje swjate woprawjenja kaž tež dalše zarjadowanja sobu přihotuja. Dźěłarnička wobsteji z třoch modulow, kotrež hodźa so w cyłku abo jednotliwje wopytać.
Worklečanske dekanatne dušepastyrstwo za dźěći a młodźinu poskićuje k prewenciji přećiwo seksualizowanej namocy kubłanje, kiž wotměje so póndźelu, 16. junija, wot 18.00 do 21.00 hodź online. Wšitcy pomocnicy nabožnych prózdninskich dnjow we wosadach, ale tež dalši čestnohamtsce skutkowacy, kotřiž maja tam zwisk z dźěćimi a młodostnymi, na přikład w sakristiji abo ze šolu, su winowaći so na zarjadowanju wobdźělić. Přizjewjenja přijimuja so jenož online.
Serbska protyka
