Katolski Posoł – 15. měrca 2026
Wo poskitku, kotřiž měli křesćenjo přiwzać, pisa serbski duchowny w swojim zawodnym nastawku. Zdobom pokaza na zwisk mjez ewangelijom tuteje njedźele a spočatkom Stareho zakonja.
Dlěje hač 30 lět nawjedowaše biskop Joachim Wanke dźensniše Erfurtske biskopstwo. Štwórtk, 12. měrca, je wón w starobje 84 lět w Erfurće zemrěł.
Wo wjeršku tydźenja pisa awtorka w dalšim dźělu swojeje serije „Po puću być – po wjacorych krajach Afriki a Rańšeho kraja“. Ale tež wo tym, kak widźi w tym zwisku jednotliwe Jězusowe zbóžnosławjenja, Serbowka rozprawja.
Wo korjenju křesćanskeje nabožiny přednošowaše dr. Hans-Eberhard Kaulfürst na lětušim prěnim zetkanju samostejacych ze serbskich wosadow w Smochćicach. Mjez druhim wěnowaše so prašenju, hač je hebrejska biblija prawje přełožena.
Digitalny wobraz Turinskeho smjertneho ruba je w interneće přistupny. Digitalny projekt steji w zwisku z 2.000lětnym jubilejom podawkow wokoło pasiona a zrowastanjenja w lěće 2033.
Na lětušim třećim póstnym seminarje w Smochčanskim kubłanišću swjateho Bena zhonichu přitomni mjez druhim wo tak mjenowanym „pastoralnym milionje“, z kotrymž podpěruje Drježdźansko-Mišnjanska dieceza dušepastyrske projekty. Jedyn z nich zrealizowachu tež w Serbach.
Smjertnicu a spodźiwny nałožk do jutrow předstaja awtorka w swojim přinošku. Wona rysuje toho pochad a što ma z njedźelu laetare, kaž so štwórta póstna njedźela tež mjenuje, činić.
Połojca nowotwara Ralbičanskeho „Radlubina“ je nimale docpěta. Z tym leža w času samo lěpje, hač planowane, kaž architekt Měrko Šěrak kaž tež čłon Ralbičanskeho cyrkwinskeho předstejićerstwa Rafael Včelich zwurazništaj.
Widźenje steji w srjedźišću ewangelija štwórteje póstneje njedźele. Wo tym zhonja dźěći na stronje za młódšich čitarjow. Zdobom kubłarka wo tym rozprawja, kak su w serbskim kubłanišću podobnu biblisku stawiznu z dźěćimi nazornje wobjednawali.
W Lipšćanskim nakładnistwje Veles je nowa kniha za dźěći wot šěsć lět „Małe šerjenje“ wušła. Wona ma originalne ilustracije znateho ilustratora dźěćacych knihow. Zajimcy móža sej nowostku za 15 eurow w Budyskej Smolerjec kniharni, tamnišej Serbskej kulturnej informaciji abo online w nakładnistwje Veles kupić.
Wobsah Katolskeho Posoła lěta 2025 předleži. Wšitcy, kotřiž chcedźa sej lětnik wjazać dać a wobsah sobu zapřijeć, móža sej jón wućišćeć. Štóž tajku móžnosć nima, njech wobroći so na redakciju Katolskeho Posoła w Budyskim Serbskim domje pod telefonowym čisłom (0 35 91) 55 02 12. Runje tak móža sej zajimcy wjazane wudaće Katolskeho Posoła tam kupić. –
Njebjelčanski chór swjateje Cecilije wuhotuje sobotu, 28. měrca, w 20.00 hodź. pod hesłom „Ja sym puć a prawda a žiwjenje“ (Jan 14,6) w tamnišim Božim domje „Hodźinku před Bohom“. Na pěsnje, psalmy a modlitwy słuchajo, kotrež młodostni přednjesu, su wšitcy přeprošeni před Bohom wutrać a so dušinje na jutry přihotować. Kóždy měł sej swěčku sobu přinjesć a so sam z dźělom swětła stać.
Šulerki a šulerjo 1. a 2. lětnika su w jutrownych prózdninach na zhromadny dźeń do Don Boskoweho domu we Worklecach přeprošeni. Wón steji pod hesłom „Chryst je z mortwych stanył – haleluja“. Wobdźělić móža so dźěći pak srjedu, 8. apryla, pak štwórtk 9. apryla, stajnje wot 9.00 do 15.00 hodź. Swójski přinošk na wobdźělnika wučinja pjeć eurow. Přizjewjenja přijimuja online hač do póndźele, 23. měrca.
Zhromadne wječorne modlenje dekanatneje młodźiny
z taizéskimi pěsnjemi budźe přichodnu sobotu, 7. měrca,
w 20.00 hodź. w Ralbicach. Přizamknje so zabawny wječor w sportowej hali.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Pod hesłom „Wujednaj so!“ wotměje so za šulerjow 6. do 8. lětnika sobotu, 21. měrca, wot 9.00 do 12.00 hodź. zhromadne dopołdnjo we Worklečanskim Don Boskowym domje. Tón dźeń změja móžnosć, sakrament wujednanja, swjatu spowědź, přijimać. Přizjewjenja přijimuja hač do wutory, 17. měrca, online.
Dalše zarjadowanje noweho rjadu Worklečanskeho dekanatneho dušepastyrstwa pod hesłom „Swójbne rituale w běhu lěta“ budźe pjatk, 27. měrca, wot 15.30 do 17.00 hodź. w Don Boskowym domje. Wone steji pod temu „Čakamy na jutry“. Přeprošeni su starši (mać abo nan) hromadźe z dźěsćom w
předšulskej starobje. Wobdźělnicy dóstanu w krótkej formje małe impulsy za swójbne, nabožne žiwjenje. Po tym sej hromadźe z dźěsćom něšto napasla. Přizjewjenja přijimuja hač do srjedy, 25. měrca, online.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
