Katolski Posoł – 16. měrca 2025
Wo zmysle póstneho časa pisa serbski duchowny w swojim zawodnym nastawku. Wón mjenuje składnosć, kak móže sej čłowjek Božu přitomnosć znowa wotkryć a swójski nutřkowny hłós zaznawać.
W Drježdźansko-Mišnjanskim biskopstwje je putniski zešiwk k Swjatemu lětu wušoł. Wón skići wěriwym a dalšim zajimcam impulsy za swójski spirituelny puć a wjedźe jich k wuznamnym putniskim městnam diecezy. Wón budźe na putniskich městnach a na farach darmotnje předležeć.
Zetkanja, wěra a zhromadnosć steja w srjedźišću wosadneho misiona w Radworju. Poskitki wužiwaše tohorunja mnoho wěriwych z druhich wosadow. Tutu njedźelu so mision z nyšporom a bamžowskim požohnowanjom zakónči.
Jurij Dźisławk z Haslowa je so čas žiwjenja za cyrkej a narod horliwje zasadźował a rady putnikował. Nětko je wón na prawdu Božu wotešoł.
W Radworju přepodachu zastupjerjo Radworskeje wyšeje šule, tamnišeje gmejny a čłonojo dźěłoweho kružka zjawnosći nowu ławku. Na njej su motiwy serbskich nałožkow kołowokoło najwjetšeho swjedźenja za křesćanow.
Na lětušim prěnim póstnym seminarje w Smochćicach porěča Frank Richter k temje „Wobchad z wohnjowymi murjemi – wotmjezowanje a mjeza“ z towaršnostneho wida. Při tym wobswětli wón přirodne, kulturne a wosobinske hranicy.
W Radworju swjećachu młodostni na njewšědnym městnje Božu mšu z oblatskim patrom. Mjez druhim wón jich pozbudźi, někomu stajnje znowa haj rjec.
W dalšim dźělu póstneje serije za dźěći předstaja jim Rucky Radypućowar kraj w Aziskej, kiž stej w srjedźišću lětušeje póstneje akcije biskopskeho skutka Misereor. Zdobom móža dźěći k tomu tež hódać.
Znamjo Drježdźansko-Mišnjanskeho biskopstwa za Swjate lěto, kopija ikony swjateho křiža Assisiskeje cyrkwje w San Damiano, budźe po serbskich wosadach pućować. To zahaji so w nocy wujednanja w Róžeńčanskej swjatnicy sobotu, 29. měrca, a skónči so pjatu póstnu njedźelu, 6. apryla, z putnikowanjom swójbow na samsnym městnje.
Wšitcy wěriwi su sobotu, 29. měrca, na nóc wujednanja do Róžeńčanskeje swjatnicy přeprošeni. Wona započnje so w 20.00 hodź. a skónči so z Božej mšu w 23.00 hodź. W běhu wječora změja wěriwi składnosć, so modlić, na hudźbu słuchać abo ćicho wo sebi rozpominać a na Boha słuchać. Zdobom wobsteji móžnosć, k sakramentej wujednanja, swjatej spowědźi, přistupić, abo wo duchownu rozmołwu prosyć.
Winfriedowy dom w Schmiedebergu woswjeći lětsa swoju 70. róčnicu wobstaća. K jubilejej hromadźa zamołwići domu dopomnjenki a přeprošuja wšitkich, pod hesłom „Twoje dopomnjenki su prašane!“ swoju wosobinsku stawiznu Winfriedoweho domu k jubilejej z druhimi dźělić.
Rakečanska ewangelsko-lutherska wosada wobdźěli so ze swojimi spirituelnymi instalacijemi zwukow a swěcy na wubědźowanju němskeho ewangelskeho měsačnika Chrismon. Hišće hač do štwórtka, 3. apryla, móže ju kóždy podpěrać, z tym zo online za projekt „Spirituelna zwukowa instalacija“ hłosuje.
Dalši wječor lětušeho Ekumeniskeho póstneho seminara w Smochčanskim kubłanišću swjateho Bena, stejacy pod hesłom „Wobchad z wohnjowymi murjemi – wotmjezowanje a mjeza“ budźe póndźelu, 17. měrca, w 19.30 hodź. Na nim zaběra so dr. Harald Lamprecht ze sociologisko-cyrkwinskeho wida z mjenowanej temu. Wšitcy zajimcy su wutrobnje přeprošeni.
W putniskej hospodźe w Hirschfeldźe je wot popjelneje srjedy, 5. měrca, hač do njedźele, 27. apryla, druhi króć wobšěrna wustajeńca pasionskich Božich narodkow přistupna. Zajimcy móža pak sej je jeničce we wobłuku wodźenjow wobhladać. Te wotměwaja so stajnje sobotu w 14.00 hodź. Skupiny z wjace hač sydom wosobami móža sej tež swójski termin ze Jeannette Gosteli dojednać.
Hornjołužiski Zwjazk Carity z.t. pyta za swoju Dnjowu hladarnju „Při Krabatowym puću“ we Worklecach wosobu, kotraž by jeje hosći wozyła. Wona ma jich doma wotewzać, do Worklec a skónčnje zaso domoj dowjezć.
Pod hesłom „Přełam k žiwjenju!“ wotměje so wot zeleneho štwórtka hač do jutrońčki, 17. do 20. apryla, w Smochčanskim kubłanišću swjateho Bena jutrowny kurs za swójby z dźěćimi, pory a samostejacych. Na njón přeprošuje wotrjad za swójby Drježdźansko-Mišnjanskeho biskopstwa.
Marleen Schindler ze Serbskeho instituta porěči wutoru, 18. měrca, w 19.00 hodź. na Michałskej farje w Budyšinje wo česćenju kreje a ranow w Ochranowskej pobožnosći. W přednošku rozłoži wona dopóznaća swojeho masterskeho dźěła, w kotrymž wona wosebity słowoskład Ochranowskich tekstow přepytuje. Přednošk, na kotryž Maćica Serbska jako zarjadowarka přeprošuje, je w němskej rěči. Zastup je darmotny.
Pod hesłom „Sing to the Lord a new song“ (Spěwajće Knjezej nowy spěw) přeprošuja Drježdźanscy kapałnicy prěni raz na wurisanje komponowanja. Prapremjera dobyćerskeho krucha budźe njedźelu, 26. oktobra, w Drježdźanskej katedrali na Božej mši, kotruž Deutschlandfunk přenjese. Zapodać ma so kompozicija Božeje mšě hač do njedźele, 1. junija.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Za to měli so w přichodnych tydźenjach přizjewić.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić.
Serbska protyka
