Katolski Posoł – 16. nowembra 2025
Wo Jězusowym poselstwje w zwisku z hrožacymi katastrofami pisa awtor w swojim zawodnym nastawku. Mjez druhim wón wuwjedźe, kotru kmanosć měli sej křesćenjo krok po kroku přiswojić.
Na plenarnej zhromadźiznje Rady katolikow Drježdźansko-Mišnjanskeho biskopstwa su čłonojo wo nadawku křesćanow w towaršnosći rozmyslowali. Zdobom wolichu delegatow do noweje diecezanskeje pastoralneje rady.
Hižo wjele lětdźesatkow Wendelin Brězan we wšelakich wobłukach spomóžnje hłowno- a čestnohamstce skutkuje. Tele dny dokónči wón swoje 70. žiwjenske lěto.
W Njebjelčicach su dźěći ze swojimi staršimi na dnju swjateho Měrćina patrona swojeje wosady woswjećili. Mjez druhim zhonichu wo wosebitosći wobraza na wjeršku wołtarja jich Božeho domu.
Farar Uwe Peukert z Kamjenca přeprošuje sobudźěłaćerjow z katolskich zarjadnišćow města, sej cyrkej wotkryć. Wón pak tež wuwjedźe, što ma klóšter Marijina hwězda z tym městnom činić.
Ze žarowanskim dźěłom z dźěćimi zaběra so awtorka w swojim přinošku. K tomu porěča wona z wyšim lěkarjom paliatiwneje stacije.
We wobłuku pontifikalneje Božeje mšě je Zhorjelski biskop Wolfgang Ipolt zbywace sotry swjateho Korle Boromejskeho ze Zhorjelca rozžohnował. Nimale wšitke – mjez nimi serbskej – přećahnychu do Kulowa.
Wupisanje dźěłoweho městna
Towarstwo Cyrila a Metoda z.t. pyta wosobu, kotraž by wot 1. januara 2026 redakciski team Katolskeho Posoła zesylniła. Njejedna so wo přidatne dźěłowe městno, ale wosoba sej dźěłowe městno ze sobudźěłaćerku dźěli. Dźěłowy čas wučinja 20 hodźin wob tydźeń.
W Chróšćanskim Hórnikowym domje wotewrja tutu njedźelu, 16. nowembra, po nyšporje, kotryž so w 14.00 hodź. zahaji, wustajeńcu wo nabožnych hrach, kotrež buchu w Serbach wot 1877 do 2025 předstajane. Jurij Špitank je ju w nadawku Towarstwa Cyrila a Metoda z.t. (TCM) zestajał. Wona budźe hač do srjedź decembra stajnje njedźelu po nyšporje hač do 17.00 hodź. přistupna. Wodźenja zwonka toho časa móža zajimcy pola Jurja Špitanka skazać.
Sekcija Swójba Towarstwa Cyrila a Metoda z.t. (TCM) přeprošuje wšitkich zajimcow na škotowy turněr, kotryž wuhotuje wona wutoru, 18. nowembra, na předwječoru pokutneho dnja, we 18.30 hodź. w Jasčanskej „Bjesadźe“. Wuraznje su nimo muži tež žony přeprošene, wšojedne kotreje staroby. Za tych, kotřiž njemóža škot hrać, zarjaduja zdobom turněr z kartowej hru rommé.
Posledni lětuši nazymski koncert budźe wutoru, 18. nowembra, w 19.00 hodź. na awli Šule Ćišinskeho w Pančicach-Kukowje. Wuhotuje jón žónski ansambl „Jarobinka“. Wšitcy zajimcy su wutrobnje přeprošeni.
W Tuchorskim lěsu wotměje so pokutny dźeń, srjedu, 19. nowembra, w 10.00 hodź. dwurěčny ekumeniski nyšpor před jednym z něhdyšich bunkrow. Wšitcy zajimcy su wutrobnje přeprošeni.
Komorny chór nota bene leipzig pod nawodom profesora Martina Krumbiegela wuhotuje njedźelu, 23. nowembra, w 17.00 hodź. koncert w klóšterskej cyrkwi w Pančicach-Kukowje. Zaklinča mjez druhim twórba „Musicalische Exequien“ Heinricha Schütza kaž tež kruchi dalšich komponistow 17. do 21. lětstotka. Zastup je darmotny, wo dary proša.
Na zhromadny nyšpor je dekanatna młodźina tež lětsa na swjedźenju
Chrysta Krala, njedźelu, 23. nowembra, do Chrósćic prošena. Započatk je w 14.00 hodź. z nyšporom w cyrkwi.
Přizamknje so přednošk Wjenkec
Haliny a Chrystofera wo teologiji mandźelstwa z wosobinskim swědčenjom.
Monika Gerdesowa zarjaduje w swojej putniskej hospodźe w Chrósćicach w přichodnych měsacach zaso tak mjenowanu kulturnu zymu. Zarjadowanja za dźěći a dorosćenych w serbskej a němskej rěči wotměja so wot soboty, 29. nowembra, do soboty, 7. februara, nimale tydźensce.
Serbska protyka
