Katolski Posoł – 17. awgusta 2025
Wšelake podawki, wo kotrychž na přikład sćenik Lukaš w Nowym zakonju rozprawja, njejsu na tehdyši čas wobmjezowane. To zwěsća duchowny w swojim zawodnym nastawku. Mjez druhim wón wuwjedźe, kak a hdźe móža ludźo podobneho tež dźensa nazhonjeć.
W čim móže mać Boža Marija přikład za žiwjenje we wěrje być? Wo tym pisa awtor w swojim rozmyslowanju k wysokemu marijanskemu swjedźenjej, kotryž cyrkej 15. awgusta swjeći. Při tym wěnuje so tež zapřijeću, kotrež wopisuje časowu dobu mjez tutym dnjom a srjedź septembrom.
Publikaciju z mólbami serbskeho wuměłca awtorka w swojim přinošku bliže předstaja. Nimo temow, z kotrymiž so twórby zaběraja, a technikow, z kotrymiž nastachu, wopisuje tohorunja wosebitu nadarjenosć wuměłca, kotruž z wobrazow wučita.
„Serbske nabožne a narodne lajske dźiwadło w Chróšćanskej wosadźe wot lěta 1877“ rěka nowa wobrazowa wustajeńca, kotruž je sekcija „Wěda a skutk“ Towarstwa Cyrila a Metoda z.t. zestajiła. Wurězk z njeje – dźesać taflow – je tutu njedźelu w Pančicach-Kukowje, 17. awgusta, přistupny, a to w lodowej pincy Zežiwjenskeho a zeloweho centruma. Cyłkownu přehladku móža sej wšitcy zajimcy kaž tež hosćo kongresa Europassion w septembrje w Chrósćicach wobhladać.
Křesćansko-socialny kubłanski skutk z.t. přeprošuje zhromadnje z klóštrom Marijinej hwězdu na zelowu njedźelu do Zežiwjenskeho a zeloweho centruma w Pančicach-Kukowje,
kotraž je tutu 17. awgusta. Zdobom je to lětsa klóšterski a swójbny swjedźeń. Swjedźenske kemše w 10.30 hodź.
budźe Zhorjelski generalny
wikar Markus Kurzweil swjećić.
Zakónčacy ekumeniski nyšpor ze žohnowanjom zelow, kotryž swjeći mjez druhim fararka Jadwiga Malinkowa ze Slepoho, budźe w 17.30 hodź.
Nowu wustajeńcu z mólbami Ludmiły Bizoldoweje z Budyšina pod titulom „Moja domizna we wobrazach“ wotewrje Budyska Serbska kulturna informacija (SKI) srjedu, 20. awgusta, w 17.00 hodź. w swojich rumnosćach w přizemju Serbskeho domu na Póstowym naměsće 2. Wona budźe hač do kónca oktobra k wotewrjenskim časam SKI přistupna: wot póndźele hač do pjatka, wot 10.00 do 16.30 hodź., wutoru a štwórtk hač do 18.00 hodź., wot septembra jeničce štwórtk hač do 18.00 hodź.
Chór Meja přeproša wšitkich zajimcow na swój lětni koncert na zahrodźe při Radworskej farskej cyrkwi, kotryž budźe njedźelu, 31. awgusta, w 16.00 hodź. Program wuhotuje zhromadnje ze skupinu „Wólbernosće“. Wot 15.30 hodź. poskićuja swačinu.
Serbskich młodostnych přeprošuje Towarstwo Cyrila a Metoda z.t. (TCM) na jězbu do Dachauwa a Mnichowa. Wona wotměje so wot pjatka do soboty, 3. do 4. oktobra. Přizjewjenja su online móžne.
Za pasionske předstajenja w septembru na farskej łuce w Chrósćicach móža sej zajimcy zastupne lisćiki kupić – tuchwilu pak jeničce online. Tež do předstajenja budu je při kasy předawać.
Na wuměnu z pólskimi młodostnymi a dźěłarničku ikonografije přeprošuje Budyski Serbski muzej młodostnych. Ta budźe wot pjatka do soboty, 19. do 20. septembra, w „Domje Gerharta Hauptmanna“ w Jelenjej Górje a je za młodostnych darmotna.
Wšitcy wěriwi su sobotu, 23. awgusta, na zhromadny dźeń Budyskeho dekanata pod hesłom „Marija – znamjo nadźije“ do Róžanta přeprošeni. Liturgiske zahajenje budźe w 15.00 hodź. z wustajenjom Najswjećišeho w putniskej cyrkwi. Hižo wot 14.00 hodź. poskića wosady kofej, jeli to same organizuja. Štóž chce, móže piknikować. Wot 16.00 do 18.00 hodź. změja zamołwići pisany program wokoło cyrkwje spřihotowany. Dekanatny dźeń zakónči so z Božej mšu we 18.00 hodź. w Róžeńčanskej swjatnicy. Tón dźeń předwječorne kemše w serbskich wosadach njebudu.
Serbska protyka
