Katolski Posoł – 17. nowembra 2024
Božemu domej w italskim měsće, kotryž so mjeztym w hinašej formje wužiwa, wěnuje so duchowny w swojim zawodnym nastawku. Zdobom wón na to pokazuje, na kotre wašnje je kóždy křesćan na wuwićach w cyrkwi sobu zamołwity.
W Budyšinje je chór wjacorych generacijow koncert wuhotował. Z wunoškom podpěraja syrotownju w ukrainskim měsće.
Nowowuzwolena zapósłanča Sakskeho krajneho sejma je w Kamjencu swój wólbny běrow wotewrěła. W přitomnosći mnoho hosći je serbski duchowny rumnosće požohnował.
We Wotrowje su dźěći lětsa wopomnjenje swjateho Měrćina móhłrjec posłownje wzali. Wone běchu přeprošene, něšto na dobro dźěći w južnoameriskim kraju dźělić.
W horinach, w kotrychž, kaž so praji bohojo bydla, běše serbski krosnowar zhromadnje z třomi přećelemi z Łužicy po puću. Wo swojich dožiwjenjach pisa w přinošku.
W Ralbicach je Towarstwo Cyrila a Metoda z.t. dalekubłanje poskićiło. Na nim zeznachu wobdźělnicy móžnosće financielneje podpěry za projekty a zhonichu, što móžeš nimo zjawneho spěchowanja činić.
Na njewšědne wašnje wo dypki wojowali su družki a chorhojnicy farskeje wikarije z Pančic-Kukowa na swojim wulěće. Na mnohostronske wašnje su tón dźeń swoju zhromadnosć skrućili.
Seniorojo z Pančic-Kukowa wotkrychu sej na swojim wulěće Radwor a wosebje jedyn z tamnišich Božich domow. Wjesnjan jim k tomu někotryžkuli zajimawostku předstaji.
W Tuchorskim lěsu wotměje so pokutny dźeń, srjedu, 20. nowembra, w 10.00 hodź. dwurěčny ekumeniski nyšpor před jednym z něhdyšich bunkerow. Wšitcy zajimcy su wutrobnje přeprošeni. Ze srjedź Hornjeho Wujězda wotbočiš do směra Wulkeho Wosyka (Großhänchen). Něhdźe 500 metrow za Wujězdom podaš so na pólny puć naprawo do Tuchorskeho lěsa. Čara wjedźe nimo tamnišeje hěty, a něhdźe 200 metrow za njej maš wótrje naprawo wotbočić. Wottam je parkowanišćo widźeć. Tón dźeń je dowolene, so tam z awtom podać.
Na mjeztym 13. kulturnu zymu přeprošuje Monika Gerdesowa
wot soboty, 30. nowembra, do soboty, 15. februara, do swojeje
putniskeje hospody w Chrósćicach. Nimale tydźensce poskićuje
wona stajnje sobotu wšelake zarjadowanja za dźěći a dorosćenych w serbskej a němskej rěči. Přehlad zarjadowanjow je w interneće wozjewjeny.
Towarstwo swjateje Filomeny z.t. chce tež lětsa zaso dźěći a swójby w maćerno-dźěćacym domje w čěskim Dolním Podluží kaž tež w bołharskim Razgradźe a wokolnych wsach z hodownymi pakćikami zwjeselić. Pakćiki kaž tež poćehnjenja a hygieniske artikle zběraja wot póndźele do štwórtka, 2. do 5. decembra, wšědnje wot 17.00 do 18.00 hodź. w Smjerdźečanskim kulturnym domje.
Maćerje a nanojo z dźěćimi, ale runje tak samostejacy su na paslenje adwentneje pychi do Róžanta na administraturu pódla cyrkwje přeprošeni. Paslenje přewjedu sobotu, 23. nowembra, wot 14.00 do 18.00 hodź. Hladajo na to, kelko materiala měło so wobstarać, prosy Gerat Róbl ze Smjerdźaceje wo přizjewjenje pod telefonowym čisłom (01 72) 7 94 75 22.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Sekcija Swójba Towarstwa Cyrila a Metoda z.t. přeprošuje wšitkich zajimcow na škotowy turněr, kotryž wotměje so wutoru, 19. nowembra, na předwječoru pokutneho dnja, we 18.30 hodź. w Jasčanskej „Bjesadźe“. Wuraznje su nimo muži tež žony přeprošene, wšojedne kotreje staroby. Za tych, kotřiž njemóža škot hrać, zarjaduje so zdobom turněr z kartowej hru rommé.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Serbska protyka
