Katolski Posoł – 18. meje 2025
Wo často wužiwanym postrowje dźěćom rozmysluje awtorka w swojim zawodnym nastawku. Nastork k tomu da jej ewangelij tuteje njedźele.
We wobłuku swjatočneje Božeje mšě budźe bamž Leo XIV. tutu njedźelu oficialnje do swojeho zastojnstwa zapokazany. Hižo krótko po swojim wuzwolenju je wón prěnje akcenty sadźił.
Hudźbu, kiž dźěše pod kožu, su wěriwi štwortu jutrownu njedźelu w Ralbicach dožiwili. Tam je wospjet znaty hólči chór nyšpor swjatočnje wobrubił.
Biskop Heinrich Timmerevers běše zastupjerjow serbskich wosadow a dalšich w gremiju Serbski pastoralny rum zastupjenych wosobow na wuměnu do Smochčanskeho kubłanišća swjateho Bena přeprosył. Tam wuzběhny wón mjez druhim trěbnosć zhromadnych strukturow a zarjadniskeje kooperacije.
W Chrósćicach su sobuskutkowacy prěni dźěl pasionskeje hry prěni króć kompletnje hrali. Z wěstym zaměrom su to tež natočili.
Wohenju, kotryž njeměli zhašeć, wěnowaše so serbski duchowny w swojim prědowanju w Róžeńće. W tamnišej putniskej cyrkwi swjećeše wón z wohnjowymi wobornikami kóždolětnu Božu mšu na česć jich patrona, swjateho Floriana.
W cyrkwi w čěskich Hejnicach wotmě so znowa tradicionelne putnikowanje wujednanja. Wěriwi ze štyrjoch narodow su so na swjatočnej Božej mši wo kónc wšitkich wójnow a wo měr na swěće modlili.
Před 25 lětami wotmě so prěnje putnikowanje starych a chorych ludźi do Róžanta. Tež lětsa běchu so zaso na hnadownym městnje zešli, zo bychu wosebity sakrament přijeli.
Biskop Heinrich Timmerevers je pjeć nowych stajnych diakonow za Drježdźansko-Mišnjansku diecezu wuswjećił. Mjez nimi běše tež jedyn z Budyskeje tachantskeje wosady swjateho Pětra.
Z Łužicy pochadźacy komponist Feliks Brojer je w Münsteru dwójnu kulowatu róčnicu swjećił. Na koncerće we westfalskim měsće zaklinčachu tež serbske zynki a běše tohorunja serbšćina słyšeć.
We Worklecach je serbski duchowny swjedźenski areal z modlerskim stołpom požohnował. Zdobom su młodostni na tym dnju swoje mejemjetanje přewjedli.
Při ponowjenej kapałce serbskeje wsy su wjesnjenjo zhromadnje mejski nyšpor swjećili. Dźěći jón z pišćałkami wobrubichu.
Wuznamny krok we wěrje su někotre dźěći w Budyšinje činili. Wone běchu na serbskorěčnych kemšach prěni raz k blidu Božemu přistupili.
Najprjedy klinčachu marijanske spěwy po Zdźěrjanskej cyrkwi. Po tym napjelni wěsta wóń tamnišu hrodowu zahrodu.
Sylne wokomiki we wěrje a wšědnym žiwjenju stworić chce nowa hra pod hesłom „Wužadanje nadźija“. Limitěrowanu ličbu eksemplarow Drježdźansko-Mišnjanske biskopstwo wosadam, skupinam a dalšim institucijam w Swjatym lěće darmotnje přewostaja. Wone móža sej hru tam z mejlku pod adresu heiligesjahr@bddmei.de skazać. K tomu měli napisać, hdźe chcedźa hru wužiwać a za kelko wobdźělnikow ju trjebaja. Dalši zajimcy móža sej hru zdobom online skazać.
Orchester Budyskeho Serbskeho ludoweho ansambla wuhotuje njedźelu, 25. meje, w 17.00 hodź. na swojej žurli sinfoniski koncert. Mjez druhim dožiwi kruch „Segmente“ Ulricha Pogody swoju serbskorěčnu prapremjeru.
Podobnje swětowemu zetkanju młodźiny wotměje so w lěću Tydźeń młodźiny w Romje. Na njón je njeboh bamž Franciskus přeprosył. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić. Nimo Roma wopytaja tež Assisi. Zajimcy měli so hač do pjatka, 31. meje, online přizjewić.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zehrena blisko Mišna. Jězba wotměje so wot póndźele do pjatka, 21. do 25. julija. Swójski přinošk na wobdźělnika wučinja 115 eurow. Přizjewjenja přijimuja hač do tuteje njedźele, 18. meje, online.
Serbska protyka
