Katolski Posoł – 21. decembra 2025
Přichodne čisło Katolskeho Posoła wuńdźe 11. januara 2026.
Wo kontrasće w hodownym ewangeliju po Lukašu, ale tež špihelu, kotryž tón zdobom je, pisa awtor w swojim zawodnym nastawku. Mjez druhim wón na to pokaza, přez kotre słowo je wone tež lětsa aktualne a što měli křesćenjo z hodownym poselstwom činić.
Telewizijny sćelak ZDF pokročuje ze seriju, w kotrejž so pjeć młodych ludźi rozdźělnych nabožinow kaž tež ateistka zetkawaja. Mjez nimi zastupuje Serbowka křesćanow. Wobhladać móža sej zajimcy přinoški hišće tutu a přichodnu njedźelu, 21. a 28. decembra, w 9.03 hodź. na telewizijnym sćelaku ZDF abo w jeho mediatece.
Wo starym wobrazu a jeho poselstwje za dźensniši čas pisa serbski duchowny w swojim hodownym rozmyslowanju. Při tym hrajetej swětło a sćin wosebitu rólu.
Po začućach awtorki je koncert na předwječoru třećeje adwentneje njedźele wutroby připosłucharjow za hodowne poselstwo wotewrěł. Wuhotował běchu jón wospjet serbski chór, ale tež solisća a hudźbnicy.
Z hódnotu darowanja su so dźěći a starši w Radworju rozestajeli. Zdobom su z pakćikami dźěći we wuchodnej Europje zawjeselili.
Łaćonska Amerika a Karibika stejitej w srjedźišću zběrki biskopskeho pomocneho skutka Adveniat, kotraž wotměje so kóžde lěto w adwentnym a hodownym času. Serbowka je lětsa we wobłuku kubłanskeje jězby jedyn kraj Łaćonskeje Ameriki wopytała a wo swojich dožiwjenjach rozprawja.
Na mnohich městnach w serbskich wosadach wotměja so mjez patoržicu a Nowym lětom Bože słužby. Přehlad je w Katolskim Posole kaž tež tule wozjewjeny.
Što nazhonja młody na smjerć chory Serb w swětle wěry? Wo tym powěda wón redaktorej Katolskeho Posoła w interviewje.
Adwentne a hodowne tradicije susodneho słowjanskeho kraja móžachu dźěći a dorosćeni lětsa tudy w Serbach zeznać. We wobłuku projekta wopytachu mjez druhim tři figury Łužicu.
Wo zajimawym łopjenu, kotrajž staj Hańžka a Feliks we wučbje nabožiny dóstałoj, pisataj wonaj na dźěćacej stronje. Na hodownymaj stronomaj młodźi čitarjo nimo toho zhonja, kotry woznam ma ta abo tamna hodowna pycha a za koho tónraz hwězdni spěwarjo pjenježne dary hromadźa.
Na adwentnych wikach w klóštrje we Łužicy su dźěći program wuhotowali. Hižo do toho móžachu sej wopytowarjo tón abo tamny hodowny dar na městnje wobstarać.
Wobkrućenje a zdobom nadawk – to je rezultat naprašowanja mjez čitarjemi Katolskeho Posoła, kotrež je redakcija lětsa nazymu přewjedła. Z toho je wona hižo prěnje konkluzije sćahnyła.
„Stare ‚nowosće‘ z domizny“ je awtorka rubriki w Katolskim Posole před 100 lětami namakała. Mjez druhim rozprawjachu tehdy wo 40lětnym měšniskim jubileju duchowneho, kotryž běše zdobom domjacy prelat bamža Benedikta XV.
W hodownym času wotměja so wšelake hodowne koncerty abo wosebite nyšpory. Wone su w Powšitkownych wozjewjenjach podate.
Na nowy rjad zarjadowanjow k temje „Swójbne rituale w běhu lěta“ přeprošuje dekanatne dušepastyrstwo za dźěći klětu do Worklec. Wotpowědnje počasam a cyrkwinskemu lětu maja so w krótkej formje małe impulsy za swójbne nabožne žiwjenje sposrědkować. Wopytać hodźa so jednotliwe zarjadowanja abo cyły rjad. Za kóžde zarjadowanje pak je separatne přizjewjenje trěbne. Přeprošeni su stajnje starši (mać abo nan) zhromadnje z dźěsćom w předšulskej starobje. Při přikusku starši někotre zajimawostki k temje zhonja a sej po tym hromadźe z dźěsćom něšto spasla. Zarjadowanja wotměja so stajnje popołdnju wot 15.30 do 17.00 hodź. we Worklečanskim Don Boskowym domje. Prěnje budźe pjatk, 9. januara, pod hesłom „Witamy nowe lěto“. Přizjewjenja přijimuja hač do srjedy, 7. januara, online. Swójski přinošk na swójbu wučinja štyri eura.
Multimedialnu produkciju pod hesłom GENEZIS 2.0. móža wopytowarjo sobotu, 20. decembra, štyri króć w Chróšćanskej cyrkwi dožiwić. Tam pokazaja ju w 17.00 a 17.30 hodź. kaž tež w 20.00 a 20.30 hodź. Zestajał bě ju wučomnik za zarjadnisku techniku Bosćan Donat. Z pomocu třoch projektorow předstaji wón mjez druhim swětosławny wjerch Vatikanskeje Sixtinskeje kapały Michelangela. W 25mjeńšinskej dramaturgiji wuwiwa so stawizna wo stworjenju swěta, nic pak cyle tak, kaž je z biblije znata. Nimo wobrazow wobsteji produkcija z hudźby, rěčanych tekstow a meditatiwneho dźěla.
Sekcija wěda a skutk Towarstwa Cyrila a Metoda z.t. (TCM) přewjedźe klětu wot njedźele, 30. awgusta, do pjatka, 4. septembra, wulět do Haibacha w nižobayerskim wokrjesu Straubing-Bogen. Wottam wopyta skupina wjacore městna w Bayerskim lěsu, mjez druhim Kelheim, klóšter Weltenburg, Straubing, putnisku cyrkej Bogenberg, Bad Kötzing a horu Wulki Arber. Zajimcy měli so hač do póndźele, 12. januara, pak online přez eveeno abo w redakciji Katolskeho Posoła přizjewić.
„Što změni astrofyziski centrum w Hornjej Łužicy?“ rěka přednošk Jana Winše z Drježdźan, kotryž budźe sobotu, 10. januara, w 19.45 hodź. we wobłuku kulturneje zymy w putniskej hospodźe Moniki Gerdesoweje w Chrósćicach. W 16.00 hodź. poskići hosćićelka serbske dźěćace kino.
Serbska protyka
