Katolski Posoł – 25. meje 2025
Wo tym, štož njepłaći jeničce za kóždežkuli žiwjenje, ale tež za cyrkej, pisa serbski duchowny w swojim zawodnym nastawku. Mjez druhim wón wuwjedźe, komu měli so wšitcy w tymle procesu dowěrjeć.
Na zapokazanskich kemšach móže nowy bamž prěni raz tajke něšto kaž swój program wozjewić. Leo XIV. je tule składnosć wužił.
Třinaće dźěći je w Njebjelčicach prěni raz k blidu Božemu přistupiło. Za wosebitu kročel, ale tež za jich žiwjensku jězbu běchu jim starši něšto natwarili.
Nadźija steješe w srjedźišću koncertneho čitanja w Rakecach. Tute staj křesćanski spěwytwórc kaž tež nawoda křesćanskeho dźěćaceho pomocneho skutka wuhotowałoj.
Přećelstwo hajiło a zhromadnje rjane dožiwjenja měło je dźesać swójbow na Kukowskim hrodźišću. Ze samopaslenymaj čołmikomaj, kotrež mějachu techniski nastroj instalowany, su sej mjez druhim domjacy wobswět wotkryli.
Woblubowane młodźinske zetkanišćo w Rudnych horinach je swoje 70lětne wobstaće woswjećiło. Na swjedźenske kemše z biskopom Heinrichom Timmereversom njebě jeničce młódša generacija přichwatała.
Serbski ewangelski cyrkwinski dźeń wotmě so tónraz w Husce. Na Božej słužbje dožiwichu přitomni tohorunja nowostku.
Chlěb, ryba a kwětka stejachu w srjedźišću swjatočneje Božeje mšě we Wotrowje. Na njej su pjeć dźěći prěni króć k swjatemu woprawjenju šli.
Chór Lipa je w Pančicach-Kukowje swój tradicionelny nalětni koncert wuhotował. Zymneho a dešćojteho wjedra dla pak wotmě so wón tónraz na hinašim městnje. Zdobom pokazachu po koncerće hudźbnej widejej dźěćaceho chóra Lipki, kotrejž stej tohorunja online přistupnej.
W Budyskim Ludowym nakładnistwje ma bórze jubilejna kniha składnostnje kulowateje róčnicy prěnjeho pisomneho naspomjenja serbskeje wsy a wosady wuńć. Zajimcy móža sej publikaciju hižo nětko předskazać.
Dohlad so swětoweje cyrkwje dóstachu čitarjo Katolskeho Posoła hižo před 100 lětami, kaž awtorka zwěsća. Mjez druhim pisachu tehdy wo měsće, kiž mjenowachu tež „kolebku křesćanstwa“.
W Ralbicach bu twarska faza za nowu wosadnicu zahajena. W prěnim kroku ma so płonina spřihotować, na kotrejž chcedźa nowe twarjenje postajić.
Hesło cistercienskich
knježnow klóštra
Marijineje hwězdy běše Měrćinej Jurencej z Pančic-Kukowa žiwjenske hesło. Nětko je wón na prawdu Božu wotešoł.
Knižna premjera serbskorěčneho wudaća Otfrieda Preußleroweje knihi „Krabat a čorny mišter“ z přełožerku a přełožerjom Lubinu a Dušanom Hajduk-Veljković budźe štwórtk, 5. junija, w 19.00 hodź. w Budyskej Smolerjec kniharni na Sukelnskej 27. Roman je Lipšćanske nakładnistwje Veles wudało
Orchester Budyskeho Serbskeho ludoweho ansambla wuhotuje njedźelu, 25. meje, w 17.00 hodź. na swojej žurli sinfoniski koncert. Mjez druhim dožiwi kruch „Segmente“ Ulricha Pogody swoju serbskorěčnu prapremjeru.
Pod hesłom „Sing to the Lord a new song“ (Spěwajće Knjezej nowy spěw) přeprošuja Drježdźanscy kapałnicy prěni raz na wurisanje komponowanja. Prapremjera dobyćerskeho krucha budźe njedźelu, 26. oktobra, w Drježdźanskej katedrali na Božej mši, kotruž Deutschlandfunk přenjese. Zapodać ma so kompozicija Božeje mšě hač do njedźele, 1. junija.
Podobnje swětowemu zetkanju młodźiny wotměje so w lěću Tydźeń młodźiny w Romje. Na njón je njeboh bamž Franciskus přeprosył. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić. Nimo Roma wopytaja tež Assisi. Zajimcy měli so hač do pjatka, 31. meje, online přizjewić.
Serbska protyka
