Katolski Posoł – 26. februara 2023
W aktualnym wudaću nańdźeće mjez druhim tole:
Z kim křesćan nad spytowarjom dobyć a swoje póstne předewzaća zwoprawdźić zamóže, wo tym pisa awtor w swojim zawodnym nastawku. Zdobom podawa wón někotre přikłady, k čemu móže dojutrownu dobu wužić.
Kak je započatk w nowej kwaliće móžny? Tomu wěnuje so awtor w dalšim dźělu swojeje serije „Wěra praktisce“.
W prěnim dźělu swojeje póstneje serije k sydom skutkam ćělneje miłosće wěnuje so awtor wopytanju chorych. Mjez druhim wón rozłoži, kak měli na choreho čłowjeka hladać a kotra mała gesta móhła jara wažna być.
Wo wjeselu a zrudobje rozprawješe Katolski Posoł před 100 lětami. Tak namaka awtorka rubriki powěsć wo smjerći duchowneho, na kotrehož Maćica Serbska tele dny spomina.
Što wuprajeja wobchadne znamješka wo póstnym času? Z tutej temu chcetaj so Hańžka a Feliks w přichodnych tydźenjach zaběrać. Za to staj sej za kóždy tydźeń jedne znamješko wupytałoj. Zdobom móža dźěći wuhódać, kak móžeš prěnje znamješko hišće zrozumić.
We wobłuku nalětnjeje plenarneje zhromadźizny Němskeje biskopskeje konferency w Drježdźanach móža wěriwi wyšich dušepastyrjow ze wšeho kraja zbliska dožiwić. Wšitke Bože mšě we wobłuku schadźowanja w katedrali Najswjećišeje Trojicy su zjawnje přistupne, a wěriwi su na nje přeprošeni. Nimo toho přenjesu so wone online.
„Křesćanske orientacije na prašenja našeho časa“ rěka hesło lětušeho Ekumeniskeho póstneho seminara w Smochčanskim kubłanišću swjateho Bena. Planowane su wospjet štyri zarjadowanja na prěnich štyrjoch póndźelach póstneho časa.
Dekanatne dušepastyrstwo za dźěći přeprošuje šulerjow 4. a 5. lětnika na zhromadny dźeń pod hesłom „Połčas“. Zarjadowanje wotměje so sobotu, 18. měrca, we Worklečanskim Don Boskowym domje.
Samodruhe žony z nanom dźěsća a wšitcy, kotřiž k tomu słušeja, su na nyšpor ze žohnowanjom tutu njedźelu, 26. februara, w 15 hodź. do podcyrkwje Božeho domu Našeje knjenje w Drježdźanach přeprošeni. Katolska a ewangelska cyrkej k tomu přeprošujetej.
Serbska protyka
