Katolski Posoł – 26. meje 2024
Z bójskej dimensiju zaběra so duchowny w swojim zawodnym nastawku. Zdobom wón mjez druhim wón rozłoži, w čim měł křesćan rozhladniwy być a štó je so jemu w sčłowječenju Jězu Chrysta njesměrnje přibližił.
Z naprašowanja mjez měšnikami wuchadźa, kotrej hłownej přičinje tomu zadźěwatej, zo so dźeń a mjenje muži za měšnistwo rozsudźi. Wuslědki studije su tež online přistupne.
W Budyskej tachantskej cyrkwi je biskop Heinrich Timmerevers swjatkowničku 49 wosobam sakrament swjateho firmowanja wudźělił. Dwurěčnu Božu mšu wobrubi tohorunja serbski kwartet.
Na wulkim hudźbnym zarjadowanju Serbskeho ludoweho ansambla na dworje Smochčanskeho kubłanišća swjateho Bena srjedź junija změja lětsa nowosć. W srjedźišću hłowneho programa steji kraj, z kotrymž ma ansambl z Budyšina hižo lětdźesatki wuske styki.
Swjatkownu póndźelu putnikowaše tež lětsa sta wěriwych ze wšěch serbskich wosadow pěši do Róžanta. Tam swjećachu hišće wjele wjace katolikow na putniskej łuce Božu mšu pod hołym njebjom. Worklečanski procesion běše so lětsa z nowosću na hnadowne městno podał.
Wuprajenju, kotrež słyši křesćan na kóždej Božej mši, wěnuje so serbski duchowny w swojim rozmyslowanju. Wone poćahuje so zdobom na swjedźeń, kotryž cyrkej tutu njedźelu swjeći.
Wo putnikowanju jako přihot na wosebite lěto, kajkež wone tež klětu zaso budźe, pisaše Katolski Posoł před 100 lětami. Ale tež wo serbskich drastach tam rozmyslowachu, kaž awtorka rubriki zwěsća.
Za busowu jězbu na 103. zjězd katolikow sobotu, 1. junija,
do Erfurta su hišće městna
swobodne. Štóž chce so z
TCM na wulkozarjadowanje
do Erfurta podać, njech so
prošu ručež móžno w redakciji
Katolskeho Posoła přizjewi.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Planowane literarno-hudźbne zarjadowanje Budyskeho Serbskeho ludoweho ansambla (SLA) tutu njedźelu, 26. meje, w 16.00 hodź. na Chróšćanskej farje chorosće dla wupadnje. Zarjadowanje narunaja, termin pak dotal hišće jasny njeje.
Składnostnje Swjateho lěta 2025 přeprošuje Sakski katolski zwjazk za kubłanje dorosćenych (KEBS) zhromadnje ze swojim ewangelskim wotpowědnym zwjazkom na ekumenisku putnisku jězbu z Drježdźan na Assisi do Roma. Wona wotměje so wot póndźele do póndźele, 30. septembra do 7. oktobra. Přizjewjenja su hač do pjatka, 31. meje, móžne.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Pod hesłom „Domizna – z mnohimi prašenjemi“ přeprošuje Smochčanske kubłanišćo swjateho Bena na dny rozpominanja z filmom, kotrež wotměja so wot srjedy do njedźele, 19. do 23. junija. Přizjewjenja přijimuja hač do štwórtka, 30. meje.
Na putnikowanje z kolesom pod hesłom „Pohlady“ přeprošuje Smochčanske kubłanišćo swjateho Bena wšitkich zajimcow wot njedźele do njedźele, 22. do 29. septembra. Zajimcy měli so hač do štwórtka, 30. meje, přizjewić.
Serbska protyka
