Katolski Posoł – 26. nowembra 2023
Pruwowanskemu nadawkej žiwjenja křesćana wěnuje so duchowny w swojim zawodnym nastawku a poćahuje so při tym na ewangelij tuteje njedźele. Zdobom wón rozłoži, kak móhli wěriwi nadawk zmištrować, bjez toho zo bychu so přežadali.
Bamž Franciskus je so znowa kritisce k reformam katolskeje cyrkwje w Němskej wuprajił. W swojim lisće poćahuje so swjaty wótc na wuslědk reformoweho procesa Synodalny puć, kotryž stej Němska biskopska konferenca a Centralny komitej katolikow Němskeje před štyrjomi lětami zhromadnje zahajiłoj.
Towarstwo Cyrila a Metoda je prěni króć na škotowy a romméjowy turněr přeprosyło. Dohromady je so 28 wěriwych ze wšěch serbskich wosadow na nim wobdźěliło.
Ze swojim patronami a dalšimi swjatymi su so prěnjowoprawjenske dźěći ze wšěch serbskich wosadow w Njebjelčicach zaběrali. Dekanatne dušepastyrstwo za dźěći bě je na zhromadny kubłanski dźeń přeprosyło.
Krok po kroku je sej skupina serbskich holcow, kotrež jako družki postawu maćerje Božeje do Róžanta noša, w Drježdźanach wuměłsku twórbu zhotowiła. Z wulětom chcychu zdobom zhromadnosć skrućić.
Składnostnje kermuše serbskeje wosady wotmě so tam na farje znowa šachowe wubědźowanje za dźěći. Jako myto kiwaše dobyćerjej tež lětsa něšto žiwe.
Komu móžeš hišće wěrić? Tomu prašenju wěnuje so serbski duchowny w swojich rozmyslowanju k wuslědkam naprašowanja k čłonstwu cyrkwje w Němskej.
Worklečanske Towarstwo kapałki Marije maćerje Božeje ma nowe předsydstwo. Do přichoda ma wone wulke zaměry.
Wo započatkach pasionskich hrow w Serbach pisaše Katolski Posoł před 100 lětami. Ale tež nowinki wo serbskich duchownych so tam jewjachu, kaž awtorka rubriki zwěsći.
Wo słužbje Kralej kralow pisa duchowny w dalšim dźělu swojeje serije „Wěra praktisce“. Mjez druhim wón tohorunja rozłožuje, pod kotrym pozadkom je swjedźeń Chrysta Krala nastał a što ma wón ludźom dać.
W putniskej hospodźe w Hirschfeldźe budu wot prěnjeje adwentneje njedźele, 3. decembra, hač do swjedźenja Předstajenja Knjeza, pjatk,
2. februara, zaso Bože narodki
wustajene. Cyłkownje poskića 27 wodźenjow po wustajeńcy.
Dekanatne dušepastyrstwo dźěći přeprošuje šulerjow 4. do
6. lětnika na kreatiwnu dźěłarničku, kotraž wotměje sobotu, 16. decembra, w Don Boskowym domje we Worklecach.
Zajimcy móža wolić, hač wobdźěla so wot 9.00 do 11.30 hodź. abo wot 12.30 do 15.00 hodź. Přizjewjenja su online hač do póndźele, 11. decembra, móžne.
Dekanatne dušepastyrstwo za dźěći přeprošuje šulerki a šulerjow 5. do 8. lětnika klětu w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija 2024. Přizjewjenja přijimuja hač do njedźele, 31. měrca 2024, online.
Towarstwo swjateje Filomeny z.t. chce tež lětsa zaso dźěći a swójby w maćerno-dźěćacym domje w čěskim Dolním Podluží kaž tež w bołharskim Razgradźe a wokolnych wsach z hodownymi pakćikami zwjeselić. Pakćiki kaž tež poćehnjenja a twory hygieny zběraja wot póndźele do štwórtka, 27. do 30. nowembra, wšědnje wot 17.00 do 18.00 hodź. w kulturnym domje w Smjerdźacej.
Po tym zo bu pomnik swjateju Cyrila a Metoda pola Stróžišća
lětsa spočatk februara skóncowany a z tym wonječesćeny,
mjeztym pak zaso sporjedźany, přeprošuje Towarstwo Cyrila
a Metoda na nyšpor ze znowaposwjećenjom. Tón budźe njedźelu Chrysta Krala, 26. nowembra, w 14.00 hodź. Přizamknjetej so swačina a bjesada w Smochčanskim
kubłanišću swjateho Bena.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
„Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje wot 18 do 30 lět. Wón wotměje so sobotu, 6. januara 2024, w Ewangelskim centrumje za dźěći a młodźinu TiK w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedzele z přenocowanjom w Smochćicach. Prěni termin budźe hižo wot 19. do 21. januara, a nic kaž dotal wozjewjene spočatk februara. Druhi dźěl sćěhuje wot 26. do 28. apryla.
Serbska protyka
