Katolski Posoł – 26. oktobra 2025
Wo směrje, na kotryž měła modlitwa wusměrjena być, pisa awtor w swojim zawodnym nastawku. Mjez druhim wón tež wuwjedźe, zwotkel měli sej křesćenjo spomóženje wočakować.
Drježdźansko-Mišnjanske biskopstwo je prěni króć na putnikowanje za mjezu diecezy přeprosyło. Wone měješe we wobłuku Swjateho lěta wosebity cil. Na putnikowanju wobdźělichu so tež wjacori Serbja.
Nowy swjaty křiž je serbski duchowny we wsy blisko Njebjelčic poswjećił. Tón je na dwě putniskej městnje wusměrjeny.
Za jeju mnohostronski angažement bu zasłužbnymaj Serbomaj Myto Ćišinskeho a Myto Domowiny spožčene. Wobaj so hižo mnohe lětdźesatki serbskej hudźbje a kulturje wěnujetaj.
We Wotrowje je serbski duchowny nowe cyfrowniki kaž tež wosebity časnik na cyrkwinej wěži poswjećił. Zo jewja so poslednje mjenowane na Božich domach, běše hač do spočatka 20. lětstotka z wašnjom.
Mnohe wěžine časniki pochadźeja z rukow serbskeho awtodidakta. Tež předchadnika dźensnišeho časnika na Wotrowskej cyrkwi bě Jurij Kislink stworił, kotrehož awtorka w swojim přinošku bliže předstaja.
Jako jednory žiwnosćer je Pětr Młónk wjace hač 1.000 poetiskich twórbow spisał. Nětko bu w Hodźiju wopomnjenska šćežka za njeho poswjećena.
Wo dalšim hnadownym městnje nimo Róžanta pisaše Katolski Posoł mjez druhim před 100 lětami. Ale tež wulkej ratarskej wustajeńcy w Drježdźanach so tehdy wěnowachu, na kotrejž počesćichu tohorunja Serbow.
„Won do swěta“ rěka nowa inscenacija, kotruž je Budyske Němsko-Serbske ludowe dźiwadło w Radworju prapremjernje předstajiło a z kotrejž nětko po serbskich wsach pućuje. W hrě zaběraja so dźiwadźelnicy z wupućowanjom Serbow do zamórskich kónčin.
Sekcija Swójba Towarstwa Cyrila a Metoda z.t. (TCM) přeprošuje wšitkich zajimcow na škotowy turněr, kotryž wuhotuje wona wutoru, 18. nowembra, na předwječoru pokutneho dnja, we 18.30 hodź. w Jasčanskej „Bjesadźe“. Wuraznje su nimo muži tež žony přeprošene, wšojedne kotreje staroby. Za tych, kotřiž njemóža škot hrać, zarjaduja zdobom turněr z kartowej hru rommé.
Seminar k přihotej na sakrament mandźelstwa wotměje so wot pjatka do soboty, 28. do 29. nowembra, w Smochčanskim kubłanišću swjateho Bena. Přizjewjenja přijimuje Dekanatne dušepastyrstwo młodźiny we Worklecach jeničce online. Tam su tohorunja hižo přizjewjenja za klětušej terminaj samsneho seminara móžne. Wonej stej stajnje wot pjatka do soboty planowanej, prěni wot 27. do 28. februara, druhi wot 27. do 28. nowembra.
Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošeni. Tón budźe srjedu, 19. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje přeprošeni. Zajimcy měli so hač do pjatka, 1. nowembra, online přizjewić.
Serbska protyka
