Katolski Posoł – 27. julija 2025
Wo žohnowanju čłowjeka za druhich pisa awtor w swojim zawodnym nastawku. Při tym zhladuje do stawiznow runje tak kaž do bibliskeje knihi Stareho zakonja.
Wysoki zastupjer cyrkwje w Čěskej je z přewažnje serbskimi wěriwymi w Krupce putnisku Božu mšu swjećił. Na njej dósta wosebite přeprošenje a wuzna, što je hudźba na Božej mši w nim wubudźiła.
Na klóšterskej zahrodźe w Pančicach-Kukowje móžachu wopytowarjo znowa wosebitu nóc dožiwić. Při najrjeńšim lětnim wjedrje mějachu zamołwići wotměnjawy program spřihotowany, kiž měješe tež serbski podźěl.
Młodostni Budyskeho dekanata pobychu na wjacednjowskej wuprawje w juhowuchodnym europskim kraju. Tam njezeznachu jeničce kulturu a žiwjenje kraja, ale tež wosebitu zhromadnosć wšelakich nabožinow. Přewodźał běše jich tež serbski duchowny.
Do sewjerneje Němskeje wjedźeše lětuša serbska putniska jězba. Nimo cyrkwinskich cilow wopytachu wobdźělnicy mjez druhim tež tajke, kiž su wusko z němskej literaturu zwjazane.
Z nyšporom su wěriwi małeje wsy lětuši patronatny swjedźeń swojeje kapałki woswjećili. K patronatnej Božej mši zhromadźichu so pak so hakle dźeń pozdźišo.
Wo situaciji Serbstwa pisaše Katolski Posoł před 100 lětami. Ale tež wótre słowa dopisowarjow k hinašim temam so we wudaćach jewja, kaž awtorka rubriki zwěsći.
Serbskich młodostnych přeprošuje Towarstwo Cyrila a Metoda z.t. (TCM) na jězbu do Dachauwa a Mnichowa. Wona wotměje so wot pjatka do soboty, 3. do 4. oktobra. Přizjewjenja su online móžne.
Za pasionske předstajenja w septembru na farskej łuce w Chrósćicach móža sej zajimcy wotnětka zastupne lisćiki kupić – tuchwilu pak jeničce online. Tež do předstajenja budu je při kasy předawać.
Serbska dekanatna młodźina je na wulět přeprošena, kotryž budźe njedźelu, 24. awgusta. Planowane je z busom do Deška pola Rózborka jěć a wottam po Nysy čołmikować.
Na wuměnu z pólskimi młodostnymi a dźěłarničku ikonografije přeprošuje Budyski Serbski muzej młodostnych. Ta budźe wot pjatka do soboty, 19. do 20. septembra, w „Domje Gerharta Hauptmanna“ w Jelenjej Górje a je za młodostnych darmotna.
Wšitcy wěriwi su sobotu, 23. awgusta, na zhromadny dźeń Budyskeho dekanata pod hesłom „Marija – znamjo nadźije“ do Róžanta přeprošeni. Liturgiske zahajenje budźe w 15.00 hodź. z wustajenjom Najswjećišeho w putniskej cyrkwi. Hižo wot 14.00 hodź. poskića wosady kofej, jeli to same organizuja. Štóž chce, móže piknikować. Wot 16.00 do 18.00 hodź. změja zamołwići pisany program wokoło cyrkwje spřihotowany. Dekanatny dźeń zakónči so z Božej mšu we 18.00 hodź. w Róžeńčanskej swjatnicy. Tón dźeń předwječorne kemše w serbskich wosadach njebudu.
Lětuši Gig-festiwal je wot pjatka do njedźele, 15. do 17. awgusta, w Róžeńće planowany. Program kaž tež přehlad wobdźělnikow stej na internetowej stronje festiwala wozjewjenej.
Serbska protyka
