Katolski Posoł – 28. septembra 2025
Wo gesće z rukomaj a jeje woznamje tež za domchowanku, kiž tutu njedźelu w mnohich wosadach swjeća, pisa serbski duchowny w swojim zawodnym nastawku. Mjez druhim wón na to pokazuje, zo su žně wjace hač zezběrany sad a wotžnjata zelenina.
Na wosebity wječor z pomocnej akciju je kruh přećelow klóštra Marijineje hwězdy přeprosył. Na nim něšto předstajichu, štož ma so restawrować.
Redakcija chce Katolski Posoł běžnje polěpšeć. Tohodla, ale tež na namołwu spěchowarjow, přewjedźe naprašowanje, kotrež so z tutym wudaćom Katolskeho Posoła rozpósćele. Na samsne wašnje hodźa so prašenja online wotmołwić.
W Budyskej cyrkwi Našeje lubeje Knjenje běchu srjedź septembra relikwije swjateje Terezije z Lisieuxa. K česćowanju a modlenju mějachu Bože słužby za wšitke generacije.
Młodźi seniorojo serbskeje wosady wulećachu sej njedawno do srjedźneje Łužicy. Tam zeznachu mjez druhim wšelake angažowane wosobiny.
Wo krónowanju postawy maćerje Božeje na znatym čěskim putniskim městnje pisaše Katolski Posoł před sto lětami. Ale tež na swójske starosće je časopis w jednym ze septemberskich wudaćow skedźbnił, kaž awtorka rubriki zwěsći.
Před 90 lětami dóńdźe w Chrósćicach k podawkej, kotremuž so wjesnjenjo wobarachu. Wo tym rozprawjachu tehdy hnydom wjacore nadregionalne němske nowiny.
W Smochćicach zetkachu so něhdyši twarscy wojacy, kiž běchu wot 1985 do 1987 blisko Rostocka stacioněrowani. Mjez nimi běchu třo Serbja.
Wulkeho zajima za zarjadowanje pod hesłom „Ja sym ja a ty sy ty – Jězus wšitkich lubuje!“ za šulerjow 1. a 2. lětnika dla poskićuje Worklečanske dekanatne dušepastyrstwo dalši termin. Zhromadny dźeń přewjedu tež sobotu, 8. nowembra, wot 9.00 do 15.00 hodź. Přizjewjenja přijimuja hač do srjedy, 1. oktobra.
Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošeni. Tón budźe srjedu, 19. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje přeprošeni. Zajimcy měli so hač do pjatka, 1. nowembra, online přizjewić.
Worklečanske dekanatne dušepastyrstwo za dźěći a młodźinu přeprošuje dźěći 4. a 5. lětnika na zhromadny dźeń pod hesłom „Swjaty Carlo Acutis – přikład tež za mnje?!“. Tón budźe srjedu, 8. oktobra, wot 9.00 do 15.00 hodź. w Don Boskowym domje we Worklecach. Zajimcy měli so hač do srjedy, 1. oktobra, online přizjewić.
Družki ze serbskich wosadow, kotrež noša postawu swjateje Marije do Róžanta, su na zhromadnu putnisku jězbu z busom do Roma přeprošene. Putnikowanje wotměje so klětu w prěnim tydźenju zymskich prózdnin, a to wot njedźele do soboty, 8. do 14. februara. Wobdźělnikow wočakuja mjez druhim wopyt Pětroweje cyrkwje, Vatikanskich muzejow a katakombow, generalna awdienca z bamžom Lejom XIV. kaž tež Boža mša z Drježdźansko-Mišnjanskim biskopom Heinrichom Timmereversom. Sobu jěć smědźa wšitcy, kiž su 14. žiwjenske lěto dokónčili. Přizjewjenja přijimuja hač do štwórtka, 30. oktobra, na Chróšćanskej farje.
Křesćansko-socialny kubłanski skutk Sakskeje z.t. přeprošuje wšitke swójby na nazymski a dožiwjenski dźeń, kotryž wotměje so srjedu, 8. oktobra, wot 13.00 do 17.00 hodź. na klóšterskej zahrodźe w Pančicach-Kukowje. Mjez druhim móža sej wopytowarjo wšelaku nazymsku dekoraciju spaslić, hrajo so zabawjeć abo so wo hribach informować.
Serbska protyka
