Katolski Posoł – 29. junija 2025
Wo wuznamnymaj stołpomaj za prěni čas cyrkwje, kaž w serbskim kěrlušu rěka, pisa serbski duchowny w swojim zawodnym nastawku. Mjez druhim wón wuwjedźe, kotry nadawk njedósta jeničce jedyn ze swjateju, kotrejuž cyrkej tutu njedźelu česćuje, ale kiž wšitcy křesćenjo maja.
Wysoki wopyt wobdźěli so na swjedźenskich kemšach njedźelu Božeho ćěła w Chrósćicach. Na njej móžachu wěriwi tohorunja wosebite požohnowanje přijimać. Zdobom bu z tutej Božej mšu swjedźenska dekada składnostnje 800. róčnicy prěnjeho naspomnjenja wosady a wsy zakónčena.
Wo wosadźe a wsy jako staciji na jednym z najwažnišich putniskich pućow je serbska putniska mać w Chrósćicach přednošowała. Mjez druhim wona zwurazni, za čo widźi wona putnikowanje jako hobersku šansu.
Budyscy serbscy wosadni su zaso doma. Po wjacore měsacy trajacych dźěłach swjećachu prěnju Božu słužbu w ponowjenej cyrkwi.
Wo přichodźe serbskeje rěče a identity rozmysluje serbski duchowny w swojim přinošku. K tomu pohnuwa je jeho publikacija, kotraž je loni w Budyskim Ludowym nakładnistwje Domowina wušła.
Wo swojich planach za lětnje prózdniny pisataj Hańžka a Feliks na stronach za dźěći. Zdobom młodźi čitarjo zhonja, kak wšědny dźeń ludźi w bibliskim času žiwi wupadaše. Tón móža sej tohorunja hrajo wotkryć.
Ze žiwjenjom w bibliskim času zaběra so tež zahroda juhozapadnje Kamjenca. Nimo napodobnjenych twarjenjow a nastrojow wobsahuje muzej pod hołym njebjom mjez druhim wustajeńcu wo nastaću biblije.
W Budyskim Ludowym nakładnistwje Domowina je nowa kniha za dźěći wušła. Jeje premjera budźe štwórtk, 3. julija, w 17.00 hodź. na Glawšec dworje w Róžeńće.
Jurij Wawrik z Nuknicy njebě čłowjek wulkeho słowa, ale muž skutka. Na swjedźenju Božeho ćěła bu wón do wěčnosće wotwołany.
Pozběhowace a zrudne dožiwjenja mějachu putnicy w Romje. Mjez druhim wo tym pisaše Katolski Posoł před sto lětami.
W Dobrošicach je serbski duchowny z wěriwymi patronatne kemše w tamnišej kapałce swjećił. W swojim prědowanju wón mjez druhim na to pokaza, hdźe su za Boha na zemi wšelake městna rezerwowane.
Wšitcy wěriwi su sobotu, 23. awgusta, na zhromadny dźeń Budyskeho dekanata pod hesłom „Marija – znamjo nadźije“ do Róžanta přeprošeni. Liturgiske zahajenje budźe w 15.00 hodź. z wustajenjom Najswjećišeho w putniskej cyrkwi. Hižo wot 14.00 hodź. poskića wosady kofej, jeli to same organizuja. Štóž chce, móže piknikować. Wot 16.00 do 18.00 hodź. změja zamołwići pisany program wokoło cyrkwje spřihotowany. Dekanatny dźeń zakónči so z Božej mšu we 18.00 hodź. w Róžeńčanskej swjatnicy. Tón dźeń předwječorne kemše w serbskich wosadach njebudu.
Na zahrodźe klóštra Marijineje hwězdy w Pančicach-Kukowje dožiwja wopytowarjo sobotu, 19. julija, wot 19.00 hodź. zaso „Nóc tysac swěčkow“. Hač do zaswěćenja swěčkow poskića pisany program na jewišću.
Serbska protyka
