Katolski Posoł – 3. awgusta 2025
Wo hódnoće wobsydstwa pisa awtor w swojim zawodnym nastawku. W nim rozmysluje wo woprawdźitym bohatstwje před Bohom.
Z pisanym programom su sej dźěći na jězbje lětne prózdniny porjeńšili. Organizowało běše ju dekanatane dušepastyrstwo za dźěći we Worklecach.
Na pasionskim předstajenju w septembrje w Chrósćicach móža so wšitcy zhromadnje aramejsce modlić. To móža nětko hižo zwučować, přetož wotpowědny tekst je online přistupny.
Serbscy młodostni su lětsa znowa pěši do Krupki a zaso wróćo do Łužicy putnikowali. Wo swojich dožiwjenjach rozprawja wobdźělnica na młodźinskimaj stronomaj. Zdobom nańdu młodostni tam wšelake pokiwy, za kotrež je w interneće link k přizjewjenju podaty.
Křesćansko-socialny kubłanski skutk z.t. přeprošuje zhromadnje z klóštrom Marijinej hwězdu na zelowu njedźelu do Zežiwjenskeho a zeloweho centruma w Pančicach-Kukowje,
kotraž budźe 17. awgusta. Zdobom budźe to lětsa klóšterski a swójbny swjedźeń. Swjedźenske kemše w 10.30 hodź.
budźe Zhorjelski generalny
wikar Markus Kurzweil swjećić.
Zakónčacy ekumeniski nyšpor ze žohnowanjom zelow, kotryž swjeći mjez druhim fararka Jadwiga Malinkowa ze Slepoho, budźe w 17.00 hodź.
Serbskich młodostnych přeprošuje Towarstwo Cyrila a Metoda z.t. (TCM) na jězbu do Dachauwa a Mnichowa. Wona wotměje so wot pjatka do soboty, 3. do 4. oktobra. Přizjewjenja su online móžne.
Za pasionske předstajenja w septembru na farskej łuce w Chrósćicach móža sej zajimcy wotnětka zastupne lisćiki kupić – tuchwilu pak jeničce online. Tež do předstajenja budu je při kasy předawać.
Serbska dekanatna młodźina je na wulět přeprošena, kotryž budźe njedźelu, 24. awgusta. Planowane je z busom do Deška pola Rózborka jěć a wottam po Nysy čołmikować.
Lětuši koparski turněr ministrantow ze serbskich wosadow budźe
sobotu, 30. awgusta,
w Pěskecach. Započatk je
w 9.00 hodź. z Božej mšu we wjesnej kapałce. Přizjewjenja přijimuja hač do pjatka, 15. awgusta.
Na wuměnu z pólskimi młodostnymi a dźěłarničku ikonografije přeprošuje Budyski Serbski muzej młodostnych. Ta budźe wot pjatka do soboty, 19. do 20. septembra, w „Domje Gerharta Hauptmanna“ w Jelenjej Górje a je za młodostnych darmotna.
Wšitcy wěriwi su sobotu, 23. awgusta, na zhromadny dźeń Budyskeho dekanata pod hesłom „Marija – znamjo nadźije“ do Róžanta přeprošeni. Liturgiske zahajenje budźe w 15.00 hodź. z wustajenjom Najswjećišeho w putniskej cyrkwi. Hižo wot 14.00 hodź. poskića wosady kofej, jeli to same organizuja. Štóž chce, móže piknikować. Wot 16.00 do 18.00 hodź. změja zamołwići pisany program wokoło cyrkwje spřihotowany. Dekanatny dźeń zakónči so z Božej mšu we 18.00 hodź. w Róžeńčanskej swjatnicy. Tón dźeń předwječorne kemše w serbskich wosadach njebudu.
Lětuši Gig-festiwal je wot pjatka do njedźele, 15. do 17. awgusta, w Róžeńće planowany. Program kaž tež přehlad wobdźělnikow stej na internetowej stronje festiwala wozjewjenej.
Serbska protyka
