Katolski Posoł – 30. měrca 2025
Wo nadawku, kotryž wěriwi čas žiwjenja maja, pisa awtor w swojim zawodnym nastawku. Mjez druhim wón k tomu pohnuwa, mjezy překročić a na njezwučenym terenje so rozhladować.
Rada katolikow Drježdźansko-Mišnjanskeho biskopstwa je na nalětnjej plenarnej zhromadźiznje swoju předsydku wobkrućiła a nowe předsydstwo woliła. Ćežišćowa tema zeńdźenja běše zhromadnosć z ludźimi židowskeje wěry.
Lóštny wječor połny kultury dožiwichu čłonojo serbskich lajskich dźiwadłowych skupin w Sulšecach pola Kulowa. Po štwórć lětstotku zeńdźechu so tam zaso na zhromadnu schadźowanku.
Farar dr. Michael Kleiner reflektowaše na lětušim třećim póstnym seminarje w Smochćicach wodźacu temu z bibliskeho wida. Mjez druhim da přitomnym namołwu sobu na puć, kotruž wučita duchowny z teksta starozakonskeje knihi, na kotruž so złožowaše.
Bóh a zhromadnosć stej 25 młodostnym pohon, kotřiž spěwaja w młodźinskim chórje serbskeje wosady. W probowym lěhwje běchu woni mjez druhim zarjadowanje přihotowali, kotrež wotměje so w aprylu w jich wosadnej cyrkwi.
Serbski knižny swět móža sej zajimcy bórze w nocy wotkryć. Serbska centralna biblioteka (SCB) w Budyšinje wobdźěli so prěni raz na „Nocy bibliotekow“. K tomu je fachowědomostna referentka SCB Katolskemu Posołej interview dała.
Partnersku organizaciju biskopskeho skutka Misereor, kotraž ludźi w Sri Lance podpěruje, předstajitej awtorce na stronje za dźěći. Při tym dźěći tohorunja zhonja, što dostojnosć woznamjenja a w čim so wona pokazuje.
Wo biskopje, putnikach a zadźěwanym nadpadźe pisaše Katolski Posoł před 100 lětami. Ale tež kulowate narodniny serbskeho lěkarja w Pančicach-Kukowje namaka w jednym z wudaćow swoje městno.
Serbski duchowny, kotryž skutkowaše mnoho lět w Chróšćanskej wosadźe a naposledk tři měsacy w Šwicarskej, nawróći so do Drježdźansko-Mišnjanskeho biskopstwa. Katolskemu Posołej rjekny, što je jemu čas w Zizersu přinjesł.
Wšitcy wěriwi su sobotu, 29. měrca, na nóc wujednanja do Róžeńčanskeje swjatnicy přeprošeni. Wona započnje so w 20.00 hodź. a skónči so z Božej mšu w 23.00 hodź. W běhu wječora změja wěriwi składnosć, so modlić, na hudźbu słuchać abo ćicho wo sebi rozpominać a na Boha słuchać. Zdobom změja zamołwići wšelake stacije spřihotowane. Mjez druhim budźetaj na administraturje Halina a Chrystofer Wjenka w 20.30 a 21.30 hodź. wo zmysle mandźelstwa kaž tež wšelakich dimensijach lubosće pod hesłom „Čehodla so hišće zmandźelić? Teologija mandźelstwa a wosobinske swědčenje“ přednošować. W běhu wječora budźe składnosć, k sakramentej wujednanja, swjatej spowědźi, přistupić, abo wo duchownu rozmołwu prosyć.
Znamjo Drježdźansko-Mišnjanskeho biskopstwa za Swjate lěto, kopija ikony swjateho křiža Assisiskeje cyrkwje w San Damiano, budźe po serbskich wosadach pućować. To zahaji so w nocy wujednanja w Róžeńčanskej swjatnicy sobotu, 29. měrca, a skónči so pjatu póstnu njedźelu, 6. apryla, z putnikowanjom swójbow na samsnym městnje.
Zhromadne dopołdnjo pod hesłom „Wujednaj so!“ wotměje so za šulerjow 6. do 8. lětnika sobotu, 12. apryla, wot 9.00 do 12.00 hodź. w Don Boskowym domje we Worklecach. Tón dźeń wobsteji móžnosć, sakrament wujednanja, swjatu spowědź, přijimać. Přizjewjenja přijimuja hač do póndźele, 7. apryla, online.
Awdiowizuelne dožiwjenje wočakuje wopytowarjow Kamjenskeje katolskeje cyrkwje swjateje Marije Madleny. Tam předstaja hišće hač do pjatka, 4. apryla, spirituelnu instalaciju zwukow a swěcy „Stwórba“. Boži dom je wot póndźele do pjatka wot 9.00 do 12.00 kaž tež wot 15.00 do 19.00 hodź. přistupny.
Budyski Serbski muzej wotewrje njedźelu, 6. apryla, w 15.00 hodź. pućowansku wustajeńcu „Što rěka tu mjeńšina? Danojo, Frizojo, Serbja, němscy Sinti a Roma a Delnjoněmcy“. Wona budźe hač do srjedy, 11. junija, přistupna.
Njebjelčanski młodźinski chór wuhotuje sobotu, 12. apryla, w 20.00 hodź. w tamnišim Božim domje „Hodźinku před Bohom“ pod hesłom „Žórło nadźije leži w Bohu“. Na pěsnje, psalmy a modlitwy słuchajo su wšitcy přeprošeni, před Bohom wutrać a so dušinje na jutry přihotować.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 28. apryla, wot 18.00 do 21.00 hodź. na Budyskej farje. Dalše změja po wutorach, 29. apryla, w Kamjenicy, 13. meje w Lipsku a 27. meje w Drježdźanach planowane, kaž tež štwórtk, 15. meje, online. Zajimcy měli so online přizjewić. To je hač do jednoho tydźenja do woleneho zarjadowanja móžne.
Wotwobarać seksualizowanu namóc je wažny wobstatk dźěła z
dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Hornjołužiske telefonowe dušepastyrstwo přeprošuje na rjad filmow z rozmołwami wo depresiji, zmištrowanju žarowanja, samotnosći a identiće. Wone steja pod hesłom „Filmy, kotrež jimaja – Rozmołwy, kiž zwjazuja“ a pokazuja so wotměnjejo w Budyšinje a Zhorjelcu. Prěni film štwórtk, 10. apryla, we 18.00 hodź. w kinje Budyskeho Kamjentneho doma na Kamjentnej 37 wěnuje so temje „Wer wir gewesen sein werden“ filmoweho režisera a awtora scenariow Ereca Brehmera. Přizjewjenje njeje trěbne. Zastup je darmotny.
Finale najwjetšeho mjezynarodneho gospeloweho festiwala w srjedźnej Němskej wotměje so njedźelu, 6. apryla, w 17.00 hodź. w Zwickauskej měšćanskej hali. Zastupne lisćiki za sylnje křesćansce charakterizowany koncert hodźa so online skazać.
Winfriedowy dom w Schmiedebergu woswjeći lětsa swoju 70. róčnicu wobstaća. K jubilejej hromadźa zamołwići domu dopomnjenki a přeprošuja wšitkich, pod hesłom „Twoje dopomnjenki su prašane!“ swoju wosobinsku stawiznu Winfriedoweho domu k jubilejej z druhimi dźělić.
Rakečanska ewangelsko-lutherska wosada wobdźěli so ze swojimi spirituelnymi instalacijemi zwukow a swěcy na wubědźowanju němskeho ewangelskeho měsačnika Chrismon. Hišće hač do štwórtka, 3. apryla, móže ju kóždy podpěrać, z tym zo online za projekt „Spirituelna zwukowa instalacija“ hłosuje.
W putniskej hospodźe w Hirschfeldźe je wot popjelneje srjedy, 5. měrca, hač do njedźele, 27. apryla, druhi króć wobšěrna wustajeńca pasionskich Božich narodkow přistupna. Zajimcy móža pak sej je jeničce we wobłuku wodźenjow wobhladać. Te wotměwaja so stajnje sobotu w 14.00 hodź. Skupiny z wjace hač sydom wosobami móža sej tež swójski termin ze Jeannette Gosteli dojednać.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić.
Serbska protyka
