Katolski Posoł – 30. nowembra 2025
Wo wizijach w ewangeliju tuteje njedźele rozmysluje duchowny w swojim zawodnym nastawku. Mjez druhim wón rozłožuje, što chce Jězus z tym rjec a čeho měli so křesćenjo wzdać.
Před 25 lětami je mjeztym emeritowany biskop Joachim Reinelt jenički swjatolětny pomnik Němskeje poswjećił. Na to spominaše syła wěriwych na nyšporje njedźelu Chrysta Krala.
Na čo so w swojim žiwjenju wusměrju? Z tym zaběraše so serbska dekanatna młodźina na njedźeli Chrysta Krala w Chrósćicach. Zdobom přednošowaštej młodej dorosćenaj wo teologiji mandźelstwa a staj wo swojim swědčiłoj.
Wo róčnicy koncila, na kotrymž bu křesćanske wěrywuznaće formulowane, pisaše Katolski Posoł před 100 lětami. Powěsć je tele dny tohorunja aktualna. Ale tež wo kriminalce w jednej ze serbskich wosadow rozprawjachu.
W Budyskej Marije-Marćinej cyrkwi dožiwichu připosłucharjo poslednju njedźelu cyrkwineho lěta najsławnišu twórbu němskeho komponista. W oratoriju buchu stawizny wumóženja čłowjestwa prěni raz we wulkej hudźbnej formje wobšěrnje předstajene.
Z dźaknym listom wobroći so direktor diecezanskeho zwjazka Carity w pólskim Ełku Serbam. W nim zwuraznja prelat dr. Dariusz Kruczyński najhłubši a najsprawniši dźak za wulkomyslnu podpěru.
W swojim rozmyslowanju k adwentnemu časej awtor mjez druhim wuwjedźe, što ma wašnje zemrěteho bamža Franciskusa z dohodownej dobu činić. Mjez druhim wón na to pokazuje, kotra šansa móhli přichodne tydźenje być a w čim móhł so wěriwy zwučować.
Serbski přełožk němskeje knihi je sej serbski duchowny bliže wobhladał. W swojim přinošku wón wuwjedźe, w kotrym zmysle publikacija nowy swět wotewěra.
Wo adwentnym symbolu bjez spočatka a kónca pisataj Hańžka a Feliks na dźěćacej stronje. K tomu nańdu młodźi čitarjo dalše zajimawe a wužitne informacije. A tež małe hódančko na nich čaka.
Dekanatne dušepastyrstwo za dźěći přeprošuje šulerjow 6. do 8. lětnika na kreatiwnu dźěłarničku do Don Boskoweho domu we Worklecach, kotraž budźe sobotu 13. decembra. Wobdźělić móža so zajimcy pak wot 9.00 do 11.30 hodź. abo wot 12.30 do 15.00 hodź. Přizjewjenja přijimuja online hač do póndźele, 8. decembra.
Wupisanje dźěłoweho městna
Towarstwo Cyrila a Metoda z.t. pyta wosobu, kotraž by wot 1. januara 2026 redakciski team Katolskeho Posoła zesylniła. Njejedna so wo přidatne dźěłowe městno, ale wosoba sej dźěłowe městno ze sobudźěłaćerku dźěli. Dźěłowy čas wučinja 20 hodźin wob tydźeń. Zajimcy měli so hač do póndźele, 1. decembra, pola Towarstwa Cyrila a Metoda z.t., Póstowe naměsto 2, 02625 Budyšin, abo na mailowu adresu TCM@Posol.de pisomnje wo městno požadać.
Na wosebite zarjadowanje za wjetše dźěći a dorosćenych ze sceniskim čitanjom pod hesłom „Tam njebě městna w hospodźe“ přeprošuje Smochčanske kubłanišćo swjateho Bena. Wone budźe sobotu, 6. decembra, w 19.30 hodź.
W Budarjec bróžni w Jaseńcy přewjedźe so tež lětsa zaso na předwječoru druheho adwenta, sobotu, 6. decembra, hudźbny a beneficny wječor za dobry skutk. Započatk je po Chróšćanskich wječornych kemšach w 19.45 hodź. Program wuhotujetaj Helena Brězan-Hejdušcyna a Syman Hejduška kaž tež skupina Fünf an der Feier. Wunošk wječora nałožuja za towarstwo dźěćaceje pomocy w Keniji. Budarjec bróžnja je na dróze do směra Dobrošic, čisło 14.
Towarstwo swjateje Filomeny z.t. chce tež lětsa zaso dźěći a swójby w čěskim Dolním Podluží kaž tež w bołharskim Razgradźe a wokolnych wsach z hodownymi pakćikami zwjeselić. Trjebanu drastu a črije lětsa njehromadźa. Pakćiki kaž tež poćehnjenja a hygieniske artikle zběraja wot póndźele do štwórtka, 1. do 4. decembra, wšědnje wot 17.00 do 18.00 hodź. w Smjerdźečanskim kulturnym domje.
Na adwentne wiki su wopytowarjo sobotu, 13. decembra, wot 10.00 do 18.00 hodź. do klóštra Marijineje hwězdy w Pančicach-Kukowje prošeni. Mjez druhim poskića klóšterske likery, sele a wolije, Ochranowske hwězdy, keramiku kaž tež plećene a pjelsćowane produkty. Hižo wot 9.00 hodź. předawaja na klóšterskim dworje hodowne štomy z klóšterskeho lěsa. W 15.30 hodź. wustupi chór zakładneje šule w Pančicach-Kukowje.
Sekcija wěda a skutk Towarstwa Cyrila a Metoda z.t. (TCM) přewjedźe klětu wot njedźele, 30. awgusta, do pjatka, 4. septembra, wulět do Haibacha w nižobayerskim wokrjesu Straubing-Bogen. Wottam wopyta skupina wjacore městna w Bayerskim lěsu, mjez druhim Kelheim, klóšter Weltenburg, Straubing, putnisku cyrkej Bogenberg, Bad Kötzing a horu Wulki Arber. Zajimcy měli so hač do póndźele, 12. januara, pak online přez eveeno abo w redakciji Katolskeho Posoła přizjewić.
Dalšej zarjadowani we wobłuku kulturneje zymy w putniskej hospodźe Moniki Gerdesoweje w Chrósćicach budźetej sobotu, 6. decembra. W 16.00 hodź. poskićuje hosćićelka serbske kino za dźěći. A w 19.45 hodź. zahaji so literarno-hudźbny wječor składnostnje 800. róčnicy załoženja Chróšćanskeje wosady a gmejny. Měrćin Wjenk a Matej Dźisławk jón wuhotujetaj.
Serbska protyka
