Katolski Posoł – 31. awgusta 2025
W swojim zawodnym nastawku awtor k něčemu pohnuwa, štož měł kóždy čłowjek we sebi pytać. Mjez druhim wón wuwjedźe, kak so to, štož ma so namakać, přeměnja a kak tole zdobom zhromadne žiwjenje ludźi wobwliwuje.
W Nowej Cali je po wjace hač 200 lětach zaso mnich swoje wěčne sluby złožił. Dotal posledni pochadźeše ze serbskeje wsy.
Štwórty króć po politiskim přewróće před 35 lětami předstaji nimale 200 lajskich dźiwadźelnikow spočatk septembra w Chrósćicach Jězusowe ćerpjenje a zrowastanjenje. Zdobom wotměje so we wsy prěni raz kongres, na kotryž wočakuja zastupjerjow z dwanaće krajow.
W serbskej wsy su wěriwi na třoch wysokich duchownych spominali. Zdobom woni zhonichu, kotru wosebitu rólu wjes w katolskich serbskich wosadach zabjerje.
Wo swojich prózdninskich dožiwjenjach rozprawjataj Feliks a Hańžka na stronomaj za dźěći. Zdobom je tam italski młodostny předstajany, wo kotrymž předleži comic w serbskej rěči.
Pod hesłom „Marija – znamjo nadźije“ steješe zjězd Budyskeho dekanata w Róžeńće. Nimo zhromadneju Božeju słužbow mějachu za wobdźělnikow wšelake poskitki w cyrkwi a na łuce za njej přihotowane.
Wo přiležnosćach k zetkawanju rozprawješe Katolski Posoł před 100 lětami. Kaž awtorka rubriki zwěsći, jewjachu pak so we wudaćach tež łoskoćiwe podawki.
Na swojim lětušim wulěće běchu serbscy młodostni na wodźe po puću. Na zakónčacym nyšporje mjez druhim zhonichu, štó je trenar jich žiwjenja.
W Chróšćanskim Domje swjaje Ludmile je wosadny farar přitwar poswjećił, kotryž su hižo před sydom lětami planować počeli. Zastupjer diecezanskeho zwjaza Carity rozłoži, kak jara je so hladanska potrjeba w zašłym štwórć lětstotku změniła.
Chór Meja přeproša wšitkich zajimcow na swój lětni koncert na zahrodźe při Radworskej farskej cyrkwi, kotryž budźe njedźelu, 31. awgusta, w 16.00 hodź. Program wuhotuje zhromadnje ze skupinu „Wólbernosće“. Wot 15.30 hodź. poskićuja swačinu.
Wotrjad za dźěći, swójby a młodźinu Drježdźansko-Mišnjanskeho biskopstwa přeprošuje wšitkich zajimcow na dźěłarničku, w kotrejž katechezy za dźěći w srjedźišću steja. Wone měrja so na wšitkich, kiž so we wosadach za dźěći angažuja a na přikład swójbne kemše, nabožny prózdninski tydźeń abo prěnje swjate woprawjenja kaž tež dalše zarjadowanja sobu přihotuja. Dźěłarnička wobsteji z třoch modulow, kotrež hodźa so w cyłku abo jednotliwje wopytać. Tajke wotměja so jónu wot pjatka wječora hač do njedźele připołdnja, 17. do 19. oktobra, tamnej wot pjatka wječora hač do soboty wječora, raz wot 21. do 22. nowembra a raz klětu wot 16. do 17. januara.
Wustajeńca z mólbami Marija Ošiki budźe znowa w Chróšćanskim gmejnskim zarjedźe přistupna, a to wot wutory do štwórtka, 2. do 18. septembra, k wotewrjenskim časam zarjada: póndźelu, wutoru a štwórtk wot 9.00 do 12.00 hodź., wutoru přidatnje wot 14.00 do 17.30 hodź. a štwórtk wot 14.00 do 16.00 hodź. Tam móža sej zajimcy tohorunja knihu wuměłca „Za wokeńcu – Einblicke“ kupić.
Serbskich młodostnych přeprošuje Towarstwo Cyrila a Metoda z.t. (TCM) na jězbu do Dachauwa a Mnichowa. Wona wotměje so wot pjatka do soboty, 3. do 4. oktobra. Přizjewjenja su hač do póndźele, 15. septembra, online móžne.
Na zhromadny dźeń z krosnowanjom su pory do dožiwjenskeho parka w Moritzburgu přeprošene. Tón wotměje so sobotu, 13. septembra, wot 10.00 do 16.00 hodź. Kurs hodźi so zdobom za pory, kotryž so na sakrament mandźelstwa přihotuja.
Serbska protyka
