Katolski Posoł – 4. meje 2025
Wo ličbje, kotraž w bibliji a tež w ewangeliju tuteje njedźele wažnu rólu hraje, pisa serbski duchowny w swojim zawodnym nastawku. Mjez druhim wón na přikładźe wuwjedźe, kak Bóh w čłowjeku skutkuje a jeho do Jězusoweho naslědnistwa woła.
Z rekwiemom na Pětrowym naměsće we Vatikanje je so swět z bamžom Franciskusom rozžohnował. Po swojej poslednjej jězbje po Romje nańdźe swjaty wótc swój posledni wotpočink na městnje, kotrež bě sej do swojeje smjerće sam wuzwolił.
Z pontifikalnej Božej mšu su wěriwi Drježdźansko-Mišnjanskeho biskopstwa w tamnišej katedrali zemrěteho bamža Franciskusa wopominali. Modlerske intencije kemšow wotpowědowachu tomu, štož bě sej swjaty wótc w swojim testamenće přał.
Ze zaćahom kardinalow do Sixtinskeje kapały zahaji so spočatk meje wólba noweho bamža – konklawe. W přinošku je předstajene, kak to wotběži.
W Chrósćicach su na padłych pólskich wojakow spominali. Woni běchu před 80 lětami we Łužicy swoje žiwjenje přisadźili.
Kóždy je kaž puzzlowy dźěl hoberskeho wobraza. To dopóznachu dźěći w Ralbicach, kotrež běchu tam Młode jutry prěni raz blidu Božemu přistupili.
Pod hesłom „Smy dźěći Bože“ steješe swjatočna Boža mša prěnjowoprawjenskich dźěći w Radworju. Na njej zhonichu mjez druhim wo přeprošenju, hdźe móža zhromadnosć z Jězusom dožiwić.
W Radworju su Křižnu cyrkej ponowjeć počeli. A to dźěše prěnje dny za sobu doprědka.
Lětsa je tomu 85 lět, zo bu wulki kamjentny křiž na kěrchowje dwurěčneje wosadneje wsy postajeny. Mjez druhim awtorka w swojim přinošku rysuje, na iniciatiwu koho je tam dóšoł.
Wo wobrazu měšnika w dźensnišim času rozmysluje serbski duchowny w swojim přinošku. W tym zwisku wón k něčemu pohnuwa, štož by woprawdźitu čłowjeskosć do swěta wróćo přinjesć móhło.
Inscenaciju, kotrejež poselstwo je „přeco hišće topaktualne“, běchu sej zastupjerjo serbskeho zjednoćenstwa w Rudnych horach wobhladali. Zdobom pěstowachu při tutej składnosći tež wuměnu z čłonami druhich zjednoćenstwow, z kotrychž budźa mnozy w pózdnim lěću tohorunja z hosćom we Łužicy.
Towarstwo Cyrila a Metoda z.t. (TCM) přeprošuje na mejski nyšpor, kotryž budźe njedźelu, 4. meje, w 17.00 hodź. w Róžeńčanskej swjatnicy. Wšitcy su wutrobnje witani.
Wěriwi z Němskeje, Pólskeje a Čěskeje su sobotu, 10. meje, na putnikowanje wujednanja do čěskich Hejnic přeprošeni, wuraznje tež Serbja. Na putnikowanju spominaja wosebje na kónc Druheje swětoweje wójny před 80 lětami. Boža mša w hnadownej cyrkwi zahaji so w 10.30 hodź.
Drježdźanski hólči chór kapałnikow wuhotuje njedźelu, 11. meje, w 14.00 hodź. nyšpor w Ralbičanskej cyrkwi. Wšitcy su k tomu wutrobnje přeprošeni. Po nyšporje budźe zběrka za kapałnikow.
Pod hesłom „Swětła nadźije“ wotměje so pjatk, 16. meje, w 19.30 hodź. w Rakečanskej ewangelskej cyrkwi koncert z hudźbu a inspiraciju. Křesćanski spěwytwórc a hudźbny producent modernych duchownych pěsnjow Albert Frey jón zhromadnje z dalšimaj hudźbnikomaj kaž tež direktorom dźěćaceho pomocneho skutka Compassion Steve Volke wuhotuje. Wón budźe wšelake teksty čitać. Zastup je wot 19.00 hodź. a darmotny. Wšitcy zajimcy su přeprošeni.
Sekcija Swójba Towarstwa Cyrila a Metoda z.t. přeprošuje swójby na zhromadne popołdnjo při pomniku Cyrila a Metoda pola Stróžišća. Wone zahaji so njedźelu, 18. meje, w 15.00 hodź. z nyšporom. Přizamknjetej so swačina a zaběra za dźěći.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zehrena blisko Mišna. Jězba wotměje so wot póndźele do pjatka, 21. do 25. julija. Swójski přinošk na wobdźělnika wučinja 115 eurow. Přizjewjenja přijimuja hač do njedźele, 18. meje, online. Link na wotpowědnu stronu je pod www.posol.de wozjewjeny.
Wotwobarać seksualizowanu namóc je wažny wobstatk dźěła z
dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Chór Lipa přeprošuje zhromadnje z Křesćansko-socialnym kubłanskim skutkom wšitkich zajimcow na nalětni koncert, kotryž wuhotuje njedźelu, 18. meje, w 15.30 hodź. na zahrodźe Zežiwjenskeho a zeloweho centruma w klóštrje Marijinej hwězdźe w Pančicach-Kukowje. Program wuhotuja Lipjenjo zhromadnje z Lipjanskej dźěćinu „Lipki“. Wot 15.00 hodź. poskića tam kofej a tykanc.
Serbska protyka
