Katolski Posoł – 5. oktobra 2025
Móže modlenje strašne być? Tutomu prašenju wěnuje so serbski duchowny w swojim zawodnym nastawku a k něčemu pozbudźa, přez čož chce Bóh do žiwjenja čłowjeka zastupić.
Na kóždolětny nyšpor z požohnowanjom konjacych zapřahow je Towarstwo Cyrila a Metoda z.t. tež lětsa do Chrósćic přeprosyło. Wjace hač 30 z nich z wjacorych wosadow a mnoho wěriwych so na nim wobdźěli.
Redakcija chce Katolski Posoł běžnje polěpšeć. Tohodla, ale tež na namołwu spěchowarjow, přewjedźe naprašowanje, kotrež so z tutym wudaćom Katolskeho Posoła rozpósćele. Na samsne wašnje hodźa so prašenja online wotmołwić.
Hańža Šołćina běše mnohim přikład nabožno-narodneho žiwjenja. W septembrje je Bóh Knjez katolsku serbsku wučerku w žohnowanej starobje do wěčnosće wotwołał.
Na poslednim kóncu tydźenju požnjenca su čłonojo Kulowskeho Bratrowstwa hnydom na dwoje zarjadowanja prosyli. Najprjedy běchu serbskim pěsnjam připosłuchajo po nazymje po puću, dwaj dnjej pozdźišo činjachu to tež pěši.
Poslednju njedźelu požnjenca
swjećachu tež w Njebjelčanskej
wosadźe domchowanku. Po kemšach je tójšto wosadnych přeprošenje do wosadnicy na zhromadny snobjed sćěhowało.
Wot klětušeho budźe zajimcam serbski podcast, kotryž so temam wěry wěnuje, přistupny. Redakciski team młodych dorosćenych a serbskeho duchowneho jón tuchwilu přihotuje.
Lětsa je tomu 100 lět, zo su w Budyšinje katolsku tachantsku kniharnju załožili, kotraž měješe swoje hłowne sydło pozdźišo w Drježdźanach. Na to spominachu w septembru w Budyskim Ekumeniskim tachantskim wobchodźe.
Jónkrótnosć kóždeho čłowjeka steji w srjedźišću aktualneje strony za dźěći. Tam nańdu wone mjez druhim hrajny pokiw k temje a móža sej swójsku stronu wo sebi zhotowić.
Serbski ewangelski farar dopomina so w swojim přinošku na zetkanja ze serbskim prawosławnym duchownym dr. Mikławšom Dypmanom. Tón je hižo w lěće 2023 zemrěł, štož bu hakle nětko šěroko znate.
W Radworju běchu domchowansku njedźelu hnydom dwójny dźak zwuraznili. Na kemšach činjachu to jónu za lětuše płody zemje a rozžohnowachu zdobom kubłarku, kotraž běše wjace hač 30 lět w Katolskim serbskim dźěćacym domje „Alojs Andricki“ skutkowała.
Ze spočatkom nazymy dóńdźe tež lětsa najnowši lětnik Serbskeje protyki čitarjam do domu, kotryž je tele dny w Budyskim Ludowym nakładnistwje Domowina wušoł. W srjedźišću steji tónraz kwas, tež serbski.
„Won do swěta – Auf in die Welt“ rěka nowy dźiwadłowy kruch Budyskeho Němsko-Serbskeho ludoweho dźiwadła, kotryž sobotu, 18. oktobra, w 19.00 hodź. w Radworskim hosćencu „Meja“ prapremjernje předstaja. W nim zaběraja so z wupućowanjow Serbow z Delnjeje Łužicy do Awstralskeje.
Seminar k přihotej na sakrament mandźelstwa wotměje so wot pjatka do soboty, 28. do 29. nowembra, w Smochčanskim kubłanišću swjateho Bena. Přizjewjenja přijimuje Dekanatne dušepastyrstwo młodźiny we Worklecach jeničce online. Tam su tohorunja hižo přizjewjenja za klětušej terminaj samsneho seminara móžne. Wonej stej stajnje wot pjatka do soboty planowanej, prěni wot 27. do 28. februara, druhi wot 27. do 28. nowembra.
Wulkeho zajima za zarjadowanje pod hesłom „Ja sym ja a ty sy ty – Jězus wšitkich lubuje!“ za šulerjow 1. a 2. lětnika dla poskićuje Worklečanske dekanatne dušepastyrstwo dalši termin. Zhromadny dźeń přewjedu tež sobotu, 8. nowembra, wot 9.00 do 15.00 hodź. Přizjewjenja přijimuja hač do pjatka, 10. oktobra.
Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošeni. Tón budźe srjedu, 19. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje přeprošeni. Zajimcy měli so hač do pjatka, 1. nowembra, online přizjewić.
Družki ze serbskich wosadow, kotrež noša postawu swjateje Marije do Róžanta, su na zhromadnu putnisku jězbu z busom do Roma přeprošene. Putnikowanje wotměje so klětu w prěnim tydźenju zymskich prózdnin, a to wot njedźele do soboty, 8. do 14. februara. Wobdźělnikow wočakuja mjez druhim wopyt Pětroweje cyrkwje, Vatikanskich muzejow a katakombow, generalna awdienca z bamžom Lejom XIV. kaž tež Boža mša z Drježdźansko-Mišnjanskim biskopom Heinrichom Timmereversom. Sobu jěć smědźa wšitcy, kiž su 14. žiwjenske lěto dokónčili. Přizjewjenja přijimuja hač do štwórtka, 30. oktobra, na Chróšćanskej farje.
Křesćansko-socialny kubłanski skutk Sakskeje z.t. přeprošuje wšitke swójby na nazymski a dožiwjenski dźeń, kotryž wotměje so srjedu, 8. oktobra, wot 13.00 do 17.00 hodź. na klóšterskej zahrodźe w Pančicach-Kukowje. Mjez druhim móža sej wopytowarjo wšelaku nazymsku dekoraciju spaslić, hrajo so zabawjeć abo so wo hribach informować.
Serbska protyka
