Katolski Posoł – 7. septembra 2025
Wo nastorku a napominanju, kotrejž Jězus w ewangeliju tuteje njedźele formuluje, pisa awtor w swojim zawodnym nastawku. Zdobom pokaza na to, w čim móže čłowjek wolóžacu podpěru namakać.
Tři wuchodoněmske biskopstwa běchu na lětne přijeće do Drježdźan přeprosyli. Jako hósć porěča wysoki zastupjer Europskeje unije pola Swjateho stoła, kotremuž tež Serbja njeznaći njejsu.
Na Radworskej farskej zahrodźe zaklinča poslednju njedźelu žnjenca wěnc znatych a njeznatych pěsnjow wo ptačkach a dalšej zwěrinje. Chór Meja bě na swój tradicionalny lětni koncert přeprosył. Na nim dožiwichu připosłucharjo zdobom dalši hóstny spěwny cyłk.
Na Božej mši w Pěskecach pozbudźowaše serbski duchowny młodych ministrantow něčemu, štož móžachu po tym praktisce hnydom wuspytać. Na tamnišim sportnišću wubědźowachu so tež lětsa wo najlěpše koparske mustwo mjez nimi.
W duchu podachu so samostejacy ze serbskich wosadow na swojim lětušim třećim zetkanju ze Smochćic do Awstriskeje a zaso wróćo do Chrósćić. Po puću zhonichu wo njewšědnym Božim domje a wobhladachu sej z pomocu wobrazow swjedźenski ćah.
Na swojeho něhdyšeho domjaceho fararja dr. Pawoła Horjenja spomina serbski duchowny w swojim přinošku. Tele dny je tomu 50 lět, zo bu tón, kotremuž běše Rom čas žiwjenja duchowna domizna, do wěčnosće wotwołany.
We wobłuku mjezynarodneho kongresa Europasion budźe Drježdźansko-Mišnjanski biskop Heinrich Timmerevers pjatk, 12. septembra, w 17.00 hodź. w Chrósćicach Božu mšu swjećić. Na nju njeje jeničce 150 wobdźělnikow kongresa přeprošenych, ale tež wšitcy druzy wěriwi. Pasionske předstajenje „Sćěhuj mje!“ móža sej zajimcy po premjerje pjatk, 5. septembra, a dalšim předstajenju sobotu, 6. septembra, w 19.30 hodź. tež tutu njedźelu, 7. septembra, w 16.00 hodź. kaž tež sobotu a njedźelu, 13. a 14. septembra, w 19.30 hodź. w Chrósćicach na farskej łuce wobhladać. Zastupne lisćiki móža sej dale na internetowej stronje Katolskeho Posoła, pola časnikarja Jürgena Njeka w Chrśoćicach abo při kasy kupić.
Składnostnje lětušeje 100. róčnicy swjatoprajenja Terezije z Lisieuxa budźe relikwiar z někotrymi jeje smjertnych powostankow wot srjedy do pjatka, 17. do 19. septembra, w Drježdźansko Mišnjanskim biskopstwje. Prěnja stacija budźe srjedu, 17. septembra, Budyska cyrkej Našeje lubeje Knjenje. Tam budźe mjez druhim we 18.00 hodź. nyšpor za wšitkich serbskich wěriwych z duchownymi impulsami a wujasnjenjemi, a nazajtra, štwórtk, 18. septembra, w 9.00 hodź. zakónčaca Boža mša. Na česćowanje relikwijow su wěriwi ze wšěch wosadow přeprošeni.
Hornjołužiske telefonowe dušepastyrstwo poskićuje wukubłanje za čestnohamtske sobuskutkowanje. K tomu su wšitcy zajimcy na informaciske zarjadowanja přeprošeni. Tajke budu mjez druhim po štwórtkomaj, 11. septembra, w 19.00 hodź. w rumnosćach Wokrjesneje ludoweje uniwersity w Kamjencu, Macherowa dróha 144, kaž tež 18. septembra, tohorunja w 19.00 hodź., w Budyskim Ekumeniskim tachantskim wobchodźe.
Wotrjad za dźěći, swójby a młodźinu Drježdźansko-Mišnjanskeho biskopstwa přeprošuje wšitkich zajimcow na dźěłarničku, w kotrejž katechezy za dźěći w srjedźišću steja. Wone měrja so na wšitkich, kiž so we wosadach za dźěći angažuja a na přikład swójbne kemše, nabožny prózdninski tydźeń abo prěnje swjate woprawjenja kaž tež dalše zarjadowanja sobu přihotuja. Dźěłarnička wobsteji z třoch modulow, kotrež hodźa so w cyłku abo jednotliwje wopytać. Tajke wotměja so jónu wot pjatka wječora hač do njedźele připołdnja, 17. do 19. oktobra, tamnej wot pjatka wječora hač do soboty wječora, raz wot 21. do 22. nowembra a raz klětu wot 16. do 17. januara.
Wustajeńca z mólbami
Marija Ošiki je hišće hač
do štwórtka, 18. septembra,
na Chróšćanskim gmejnskim
zarjedźe přistupna, a to
k wotewrjenskim
časam
zarjada: póndźelu, wutoru
a štwórtk wot 9.00 do
12.00 hodź., wutoru tohorunja
wot 14.00 do 17.30 hodź.
a štwórtk wot 14.00 do
16.00 hodź. Tam móža sej
zajimcy tohorunja knihu
wuměłca „Za wokeńcu – Einblicke“ kupić.
Serbskich młodostnych přeprošuje
Towarstwo Cyrila a Metoda z.t. (TCM) na jězbu do Dachauwa a Mnichowa. Při tym póńdźe mjez druhim wo přesćěhanje Serbow za čas nacionalsocializma, wosebje na přikładźe zbóžneho kapłana Alojsa Andrickeho. Bus wotjědźe pjatk, 3. oktobra, nawrót je sobotu, 4. oktobra. Zdobom wopytaja koparsku arenu Allianz. Jězba z přenocowanjom a zastaranjom płaći 50,00 eurow. Přihotowanske zetkanje budźe sobotu, 27. septembra, w 14.00 hodź. w Radworju na farje. Na jězbu přeprošeni su wšitcy zajimowani młodostni, wosebje ći, kotřiž budu lětsa do wosadneje młodźiny přiwzaći. Za to měli so woni online hač do póndźele, 15. septembra, přizjewić.
Na zhromadny dźeń z krosnowanjom su pory do dožiwjenskeho parka w Moritzburgu přeprošene. Tón wotměje so sobotu, 13. septembra, wot 10.00 do 16.00 hodź. Kurs hodźi so zdobom za pory, kotryž so na sakrament mandźelstwa přihotuja.
Serbska protyka
