Katolski Posoł – 8. junija 2025 – swjatki
Wo darje, kiž je wjace hač jeničce jónkrótny, pisa duchowny w swojim zawodnym nastawku. Mjez druhim wón rozłoži, kak so tónle dar pokazuje a z čim móže jeho čłowjek přijimać.
Pod hesłom „Pójće sem a jěsće!“ přistupi 16 dźěći w klóšterskej cyrkwi w Marijinej hwězdźe prěni króć k blidu Božemu. W swojim prědowanju pater dr. Johannes Müller je a wšitkich přitomnych k něčemu pozbudźi, wot čehož měli so w dobrym zmysle natyknyć dać.
Serbska muzeologowka je w Kulowje wo wuwiću serbskeje katolskeje drasty přednošowała. Přitomni na přikład zhonichu, kak mjenuja tam čorny bant a što noša Kulowske žony pod brodu.
Na Mjezynarodnym dnju dźěsća je w Kulowje sydom serbskich a 43 němskich dźěći prěnje swjate woprawjenje přijimało. Na Božej mši běchu wone prěni raz zjawnje swoju wěru wobnowili.
Seniorojo serbskeje wosady su so spočatk měsaca k małemu lětnjemu swjedźenjej zetkali. Młodźi ludźo wobrubichu jón ze spěwnym programom.
Wo njewidźomnej mocy, kotraž z Boha wuchadźa a čłowjeka napjelnja, pisa awtor w swojim přinošku. Mjez druhim wón rozłožuje, štó zamóže wšelake pohiby w čłowjeku wuskutkować a kak móžeš je dodnić.
W Chrósćicach su dobrowólni pomocnicy tele dny jewišćo za lětušu pasionsku hru dotwarili. Ju chcedźa lajscy dźiwadźelnicy w septembru cyłkownje pjeć króć předstajeć.
Swjatkownu póndźelu, 9. junija, putnikuja serbske wosady do Róžanta. Přehlad kěrlušow kaž tež porjad, po kotrymž procesiony po kemšach zaso woteńdu, stej tule podatej.
Wotrjad za dźěći, swójby a młodźinu Drježdźansko-Mišnjanskeho biskopstwa přeprošuje wšitkich zajimcow na dźěłarničku, w kotrejž katechezy za dźěći w srjedźišću steja. Wone měrja so na wšitkich, kiž so we wosadach za dźěći angažuja a na přikład swójbne kemše, nabožny prózdninski tydźeń abo prěnje swjate woprawjenja kaž tež dalše zarjadowanja sobu přihotuja. Dźěłarnička wobsteji z třoch modulow, kotrež hodźa so w cyłku abo jednotliwje wopytać.
Worklečanske dekanatne dušepastyrstwo za dźěći a młodźinu poskićuje k prewenciji přećiwo seksualizowanej namocy kubłanje, kiž wotměje so póndźelu, 16. junija, wot 18.00 do 21.00 hodź online. Wšitcy pomocnicy nabožnych prózdninskich dnjow we wosadach, ale tež dalši čestnohamtsce skutkowacy, kotřiž maja tam zwisk z dźěćimi a młodostnymi, na přikład w sakristiji abo ze šolu, su winowaći so na zarjadowanju wobdźělić. Přizjewjenja přijimuja so jenož online.
W Budyskim Ludowym nakładnistwje ma bórze jubilejna kniha składnostnje kulowateje róčnicy prěnjeho pisomneho naspomjenja serbskeje wsy a wosady wuńć. Zajimcy móža sej publikaciju hižo nětko předskazać.
Serbska protyka
