Katolski Posoł – 8. měrca 2026
Wo žonje, wo kotrež sej ludźo hubu drějachu a kiž so po zetkanju z Jězusom při studni z misionarku sta, pisa serbski duchowny w swojim zawodnym nastawku. Dale wón rozłožuje, zo móže kóždy Jězusa zetkawajo zmysł póstneho časa spóznać.
Wosebitu wšědnu rutinu dožiwi młoda Serbowka w afriskej syrotowni. Wona wo tym pisa, kak začuwaše jej njeznate wašnje mjezyčłowjeskosće, kiž ju zdobom pohnu, wo kubłanju we wěrje hłubšo rozmyslować.
Wjele hłosow do wutroby rěči, ale na kotry dyrbiš słuchać? Wo tym kaž tež wo čiłym poćahu k Bohu pisa młodostna z Kamjeneje.
Načasnu medijowu formu móža zajimcy wotnětka wužiwać, so hišće intensiwnišo ze swojej wosobinskej wěru a swojim poćahom k Bohu rozestajeć – a to w swojej maćeršćinje. Młody serbski kapłan z Roma skića impulsy.
Čehodla móže póstny čas kaž borzdźidło pola awta być? Nimo nastorkow a impulsow za dojutrowny čas mějachu dźěći, młodostni a dorosćeni w Radworju tež składnosć, we wobłuku dodatneho misiona na wosobinske prašenja wotmołwy namakać.
Čehodla w „kóždym křesćanu snadź tež mały ateist“ bydli, rozkładźe referent lětušeho druheho póstneho seminara w Smochćicach. Wón pak tež na to skedźbni, zo přećiwo realiće žane přeće njepomha.
Za čim móžeš wšo lačny być, zhonja dźěći na swojej stronje w lětušej póstnej seriji. A wone móža k tomu nadawk spjelnić.
Wobsah Katolskeho Posoła lěta 2025 předleži. Wšitcy, kotřiž chcedźa sej lětnik wjazać dać a wobsah sobu zapřijeć, móža sej jón wućišćeć. Štóž tajku móžnosć nima, njech wobroći so na redakciju Katolskeho Posoła w Budyskim Serbskim domje pod telefonowym čisłom (0 35 91) 55 02 12. Runje tak móža sej zajimcy wjazane wudaće Katolskeho Posoła tam kupić. –
Na třećim wječorku ekumeniskich póstnych seminarow w Smochčanskim kubłanišću swjateho Bena póndźelu, 9. měrca, přednošuja dr. Benjamin Stahl a Marlen Rüdiger z Großhartauwa a Norman Reitner z Drježdźan k temje „Wosada w rozmachu – wožiwjena wěra/cyrkej“. Wšitcy zajimcy su wutrobnje přeprošeni. Zastup je darmotny.
Šulerki a šulerjo 1. a 2. lětnika su w jutrownych prózdninach na zhromadny dźeń do Don Boskoweho domu we Worklecach přeprošeni. Wón steji pod hesłom „Chryst je z mortwych stanył – haleluja“. Wobdźělić móža so dźěći pak srjedu, 8. apryla, pak štwórtk 9. apryla, stajnje wot 9.00 do 15.00 hodź. Swójski přinošk na wobdźělnika wučinja pjeć eurow. Přizjewjenja přijimuja online hač do póndźele, 23. měrca.
Zhromadne wječorne modlenje dekanatneje młodźiny
z taizéskimi pěsnjemi budźe přichodnu sobotu, 7. měrca,
w 20.00 hodź. w Ralbicach. Přizamknje so zabawny wječor w sportowej hali.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Pod hesłom „Wujednaj so!“ wotměje so za šulerjow 6. do 8. lětnika sobotu, 21. měrca, wot 9.00 do 12.00 hodź. zhromadne dopołdnjo we Worklečanskim Don Boskowym domje. Tón dźeń změja móžnosć, sakrament wujednanja, swjatu spowědź, přijimać. Přizjewjenja přijimuja hač do wutory, 17. měrca, online.
Dalše zarjadowanje noweho rjadu Worklečanskeho dekanatneho dušepastyrstwa pod hesłom „Swójbne rituale w běhu lěta“ budźe pjatk, 27. měrca, wot 15.30 do 17.00 hodź. w Don Boskowym domje. Wone steji pod temu „Čakamy na jutry“. Přeprošeni su starši (mać abo nan) hromadźe z dźěsćom w
předšulskej starobje. Wobdźělnicy dóstanu w krótkej formje małe impulsy za swójbne, nabožne žiwjenje. Po tym sej hromadźe z dźěsćom něšto napasla. Přizjewjenja přijimuja hač do srjedy, 25. měrca, online.
Andreas Knapp z Lipska budźe z hosćom dalšeje Literarneje kofejownje w Budyskim Ekumeniskim tachantskim wobchodźe srjedu, 11. měrca, w rumnosćach wobchoda. Wón čita ze swojeje knihi „Atlas der unbegangenen Wege – Eine Reise zu dir selbst“, kotruž je zhromadnje z rjadnicu a awtorku Melanie Wolfers spisał. Započatk je w 19.00 hodź. Zajimcy móža sej knihu tón wječor tohorunja kupić a signować dać. Zastup je darmotny, wo dary proša.
Serbska protyka
