Katolski Posoł – 9. měrca 2025
Wo próstwje z najznaćišeje modlitwy křesćanow, kiž hraje tež w ewangeliju tuteje njedźele wažnu rólu, pisa serbski duchowny w swojim zawodnym nastawku. Wón pak tež wuswětla, kak móže póstny čas wěriwym w tym zwisku pomhać.
Wot spočatka měrca předleži prěni pjenjez z motiwom Chrósćić. Runje sto dnjow do zahajenja swjedźenskeje dekady přepodachu jón zastupjerjo wosady a gmejny nawodnicy diecezanskeho archiwa w Budyšinje.
„Zhromadnje sonić – lubosć zeskutkownić“ rěka hesło póstneho ruba biskopskeho skutka Misereor za lěće 2025 a 2026. Z nim chce wón za wěstu skupinu ludźi sensibilizować.
Wo modlitwje, kotraž je poněčim we nim rostła, pisa awtor w swojim přinošku. Mjez druhim mjenuje wón wužadanje dźensnišeje towaršnosće a kak móhł čłowjek je zmištrować.
Prelat Jakub Buk běše so njesebičnje za cyrkej a domiznu zasadźował. Tele dny je k tomu 200 lět, zo bě so załožićel a spěchowar serbskeje wosady narodźił.
W dwurěčnej pěstowarni zhromadźichu so popjelnu srjedu wšitke skupiny ke katechezy. W njej běchu sej wuznam póstneho časa nadźěłali.
Wo słódnym pječwje a eksotiskim kupowym kraju pisataj Hańžka a Feliks. Zdobom wočakuje dźěći na samsnej stronje tež lětsa zaso póstna serija. Wona pak budźe trochu hinaša hač w zašłosći.
W putniskej hospodźe w Hirschfeldźe je wot popjelneje srjedy, 5. měrca, hač do njedźele, 27. apryla, druhi króć wobšěrna wustajeńca pasionskich Božich narodkow přistupna. Zajimcy móža pak sej je jeničce we wobłuku wodźenjow wobhladać. Te wotměwaja so stajnje sobotu w 14.00 hodź. Skupiny z wjace hač sydom wosobami móža sej tež swójski termin ze Jeannette Gosteli dojednać.
„Wobchad z palnymi murjemi – wotmjezowanje a mjeza“ rěka hesło lětušeho Ekumeniskeho póstneho seminara w Smochčanskim kubłanišću swjateho Bena. Planowane su wospjet štyri zarjadowanja po štyrjoch póndźelach. Na prěnim zaběra so Frank Richter póndźelu, 10. měrca, z temu z towaršnostneho wida. Wšitcy zajimcy su wutrobnje přeprošeni.
Publikaciji „Prjedy hač woteńdźeš“ wěnuje Budyski Serbski ludowy ansambl (SLA) literarno-hudźbnej zarjadowani. Wonej wotmějetej so štwórtk, 13. měrca, w 19.30 hodź. w němskej rěči kaž tež njedźelu, 16. měrca, w 17.00 hodź. w serbskej rěči, stajnje na žurli SLA. Basnica Róža Domašcyna čita swoje teksty z mjenowaneje publikacije, k tomu pokazaja wobrazy Maćija Bulanka poslednich nošerkow narodneje drasty. Smyčkowy orchester SLA z hudźbu Měrćina Weclicha a dalšich serbskich komponistow zarjadowanje wobrubi.
Hornjołužiski Zwjazk Carity z.t. pyta za swoju Dnjowu hladarnju „Při Krabatowym puću“ we Worklecach wosobu, kotraž by jeje hosći wozyła. Wona ma jich doma wotewzać, do Worklec a skónčnje zaso domoj dowjezć.
Pod hesłom „Přełam k žiwjenju!“ wotměje so wot zeleneho štwórtka hač do jutrońčki, 17. do 20. apryla, w Smochčanskim kubłanišću swjateho Bena jutrowny kurs za swójby z dźěćimi, pory a samostejacych. Na njón přeprošuje wotrjad za swójby Drježdźansko-Mišnjanskeho biskopstwa.
Marleen Schindler ze Serbskeho instituta porěči wutoru, 18. měrca, w 19.00 hodź. na Michałskej farje w Budyšinje wo česćenju kreje a ranow w Ochranowskej pobožnosći. W přednošku rozłoži wona dopóznaća swojeho masterskeho dźěła, w kotrymž wona wosebity słowoskład Ochranowskich tekstow přepytuje. Přednošk, na kotryž Maćica Serbska jako zarjadowarka přeprošuje, je w němskej rěči. Zastup je darmotny.
Pod hesłom „Sing to the Lord a new song“ (Spěwajće Knjezej nowy spěw) přeprošuja Drježdźanscy kapałnicy prěni raz na wurisanje komponowanja. Prapremjera dobyćerskeho krucha budźe njedźelu, 26. oktobra, w Drježdźanskej katedrali na Božej mši, kotruž Deutschlandfunk přenjese. Zapodać ma so kompozicija Božeje mšě hač do njedźele, 1. junija.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Za to měli so w přichodnych tydźenjach přizjewić.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot póndźele do póndźele, 29. julija do 4. awgusta, wobdźělić.
Planowany kurs JULEICA w aprylu w Smochčanskim kubłanišću swjateho Bena budźe dwurěčny. Za njón su hišće městna swobodne. Wukubłanje wobsteji z dweju dźělow, je darmotne a wotměje so stajnje wot pjatka do njedźele, 4. do 6. apryla, kaž tež wot 25. do 27. apryla. Přizjewjenja přijimuja online.
Serbska protyka
