Katolski Posoł – 27. apryla 2025
Wón běše wot 8. lětstotka prěni bamž, kotryž njepochadźeše z Europy, a je sej mjeno wuzwolił, kiž před nim hišće žadyn swjaty wótc wužiwał njeje. W dobje swoje pontifikata je po nowych pućach kročił, a jeho nowosće njewobmjezowachu so na wonkownosće. Jutrownu póndźelu je bamž Franciskus po ćežkej chorosći wudychał.
Japoštołej a jeho wuznaću, kotrejž stejitaj w srjedźišću ewangelijej tuteje njedźele Božeje miłosće, wěnuje so awtor w swojim zawodnym nastawku. Mjez druhim pokazuje wón na wuznaće, kotrež wostanje runja japoštołej wužadanje za kóždeho křesćana.
Bamž Franciskus je posledni króć swoje mysle w prědowanjach a poselstwach martrowne swjate dny a jutrońčku zwuraznił. Dźeń do swojejej smjerće spožči wón zdobom hišće žohnowanje urbi et orbi.
W Miłoćicach zaklinčachu wulki pjatk a swjatu sobotu nowe zynki. Tam běchu dźěći prěni raz chodźo po wsy na modlenje Jandźelknjeza přeprosyli.
Młode swójby serbskeje wosady modlachu so wulki pjatk z dźěćimi křižowy puć. Na centralny symbol móžachu tež něšto připinyć.
Nimale 1.400 křižerjow je jutrowne poselstwo wo Jězusowym zrowastanjenju wozjewjało. W swojej rozprawje pak awtor tohorunja na to skedźbnja, hdy so najwjetši křesćanski swjedźeń poprawom hižo započnje.
W Róžeńće swjećachu křižerjo jutrownu wutoru swoje dźakne kemše. Prědar mjez druhim wułoži, kak móhli křesćenjo tež dźensa na poselstwo zrowastanjenja reagować.
Stotu róčnicu swojeho załoženja swjeći sportowe towarstwo w Kulowje. Wone přisłuša katolskemu sportowemu zwjazkej.
Beno Weclich běše Chróšćanskej cyrkwi swěrny słužownik. Nětko je wón na prawdu Božu wotešoł.
Z dalokeho swěta rozprawješe Katolski Posoł před 100 lětami. Ale tež wo mjenje rjanym tehdy rozprawjachu, kaž awtorka rubriki zwěsća.
Wo podawkach krótko do zakónčenja Druheje swětoweje wójny před 80 lětami w Hórkach pisa awtor w swojim přinošku. Zdobom je tomu runje telko lět, zo bu Róžeńčanska hnadowna cyrkej zničena.
Na kónc Druheje swětoweje wójny a swojich padłych krajanow chce něhdźe 200 Polakow póndźelu, 28. apryla, w Chrósćicach spominać. K tomu su tež Serbja a Němcy z Łužicy přeprošeni. Spominansku swjatočnosć zahaja w 9.30 hodź. z pólskorěčnej Božej mšu w Chróšćanskej cyrkwi.
Towarstwo Cyrila a Metoda z.t. (TCM) přeprošuje na mejski nyšpor, kotryž budźe njedźelu, 4. meje, w 17.00 hodź. w Róžeńčanskej swjatnicy. Wšitcy su wutrobnje witani.
Wěriwi z Němskeje, Pólskeje a Čěskeje su sobotu, 10. meje, na putnikowanje wujednanja do čěskich Hejnic přeprošeni, wuraznje tež Serbja. Na putnikowanju spominaja wosebje na kónc Druheje swětoweje wójny před 80 lětami. Boža mša w hnadownej cyrkwi zahaji so w 10.30 hodź.
Drježdźanski hólči chór kapałnikow wuhotuje njedźelu, 11. meje, w 14.00 hodź. nyšpor w Ralbičanskej cyrkwi. Wšitcy su k tomu wutrobnje přeprošeni. Po nyšporje budźe zběrka za kapałnikow.
Wotwobarać seksualizowanu namóc je wažny wobstatk dźěła z
dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić. Zajimcy měli so hač do srjedy, 30. apryla, online
přizjewić.
Serbska protyka
