Katolski Posoł – 26. apryla 2026
Wotewrjene abo zawrjene durje postajeja naše žiwjenje – wone steja za dowěru, bliskosć, ale tež za cofnjenje. Ewangelij wo dobrym pastyrju pokazuje pak tež hinašu woprawdźitosć. Na to skedźbnja awtor zawodneho nastawka.
Kelko cyrkwinskich twarjenjow móže a chce sej Drježdźansko-Mišnjanske biskopstwo přichodnje hišće dowolić? Wo tym wuměnichu so čłonojo Rady katolikow diecezy mjez druhim na swojej plenarnej zhromadźiznje w Kamjenicy.
Wosebity dźeń połny wěry a zhromadnosće dožiwi 39 młodostnych a jedyn dorosćeny w Kulowje. Woni přijimowachu sakrament swjateho firmowanja. Biskop Wolfgang Ipolt da firmujomnym w swojim prědowanju mjez druhim impuls sobu na puć, kiž ma jich w digitalnym swěće posylnjeć.
Mjez jutrownej radosću a widom na swjatki so wujasnja: Bože žohnowanje njeskutkuje jenož w cyrkwi, ale wosrjedź studentskeho žiwjenja – w stwach, zetkanjach a zhromadnych wokomikach, pisa serbska studentka. Po dlěšej přestawce su w Lipsku tradiciju wozrodźili.
Mjez dešćom a wućom motorow startowaše w Ralbicach bikerowa sezona z modlitwu a žohnowanjom. Wjace hač 80 wodźerjow jědźidłow słyšeše wot fararja Matthiasa Kocnera poselstwo nastupajo zadźerženje druhim napřećo. Ale tež njewšědne rubiško wjedźeše k tomu, zo so mnozy w cyrkwi posměwknychu.
Dopominać a wujednać so: W klóšterskej cyrkwi w sewjeročěskim Oseku wopominachu wěriwi z dwurěčnej Božej mšu na přesćěhanje a wuhnaće před 80 lětami. Dotalny Litoměřicski biskop Stanislav Přibyl zwjaza historisku tragediju z aktualnym apelom.
Mjez winowatostnym programom a prašenjom wěry: Katolski Posoł z apryla 1926 předstaja, na kotre wašnje mějachu wěriwi wotpusk něhdy praktikować. Awtorka rubriki so praša: Liči před Bohom dopjelnjeny předpis abo dowěra do jeho smilnosće?
Městno pokoja a modlitwy: W Hodźiju bu kapałka biskopa Bena poswjećena. Wjace hač 100 ludźi dožiwi nyšpor, kotryž njestwori jenož nowu wotewrjenu rumnosć k modlenju a rozpominanju, ale skići putnikam jednoho z Jakubowych pućow tež wotpočink.
Mjez woruchom, rěčnymi ritualemi a wohnjowym chowanjom: Templ Pashupatinath w Kathmanduwje konfrontuje wopytowarjow z bliskosću k smjerći a wubudźa zdobom prašenja žiwjenja. Młoda Serbowka wopisuje rozdźěle nabožinow a zdobom zwjazowacu žadosć za zmysłom a nadźiju.
Wopomnjenske zarjadowanje za padnjenych pólskich wojakow w Druhej swětowej wójnje pola Chrósćic budźe wutoru, 28. apryla. Spočatk je w 9.30 hodź. z Božej mšu w Chróšćanskej cyrkwi. Po tym połoža kwětki na kěrchowje kaž tež při pomnikomaj na Fulkec hórce. Tam porěčitaj mjez druhim sekretar gmejny Przewóz, Kazimierz Kurpiel a dźowka wojaka Druheje armeje pólskeho wójska, Danuta Freder-Kaczmarczyk. Chór Chróšćanskeje Serbskeje zakładneje šule „Jurij Chěžka“ zarjadowanje na Fulkec hórce spěwnje wobrubi. Zajimcy su witani.
Dźakna Boža mša wohnjowych wobornikow ze Zarjadniskeho zwjazka „Při Klóšterskej wodźe“ kaž tež susodnych woborow na česć swjateho Floriana budźe pjatk, 8. meje, w 19.00 hodź. w hnadownej cyrkwi w Róžeńće. Wšitcy wobornicy kaž tež hosćo su přeprošeni.
Putnikowanje staršich a chorych ludźi ze serbskich wosadow do Róžanta budźe sobotu, 9. meje. Boža mša zahaji so w 14.00 hodź. Na njej wudźěla tym, kotřiž sej to přeja, žałbowanje chorych. Wot 13.30 hodź. modla so tam swjaty róžowc.
Na modlenje róžowca a před Najswjećišim su wěriwi sobotu, 9. meje, we 18.00 hodź. do Róžeńčanskeje hnadowneje cyrkwje přeprošeni. Paćerje budu w serbskej a němskej rěči spěwane.
Prědowanje w MDR serbskim rozhłosu ma tutu njedźelu, 26. apryla, serbski superintendet na wuměnku Jan Malink. Wotkaz na nabožne wusyłanje w mediatece MDR je tule podaty.
Wěriwi z Němskeje, Pólskeje a Čěskeje su sobotu, 9. meje, na putnikowanje wujednanja do čěskich Hejnic přeprošeni, wuraznje tež Serbja. Boža mša w hnadownej cyrkwi Marije wopytanja zahaji so w 10.30 hodź. Hłowny celebrant budźe swjećacy biskop Piotr Wawrzynek z Legnicy. Hejnicy přisłušeja Litoměřicskej diecezy, kotraž swjeći lěto wujednanja. Z tym chcedźa tež na wuhnaće Němcow z Čěskeje před 80 lětami spominać a dialog mjez krajomaj spěchować.
Radworske Šmitec-Schwarzec busowe předewzaće přeprošuje na putnisku jězbu k pasionskim hram do awstriskeho St. Margarethena, kotraž so wot pjatka do wutory, 26. do 30. junija, wotměje. Předstajenje budźe tam pod hołym njebjom před kulisu skały. Jězbu přewodźeć budźe farar Gabriš Nawka. Nimo toho poskićuja kołojězby. Zajimcy móža so pola Šmitec-Schwarzec wozydłownistwa w Radworju přizjewić, telefonowe čisło (03 59 35) 28 60. Městna su hišće swobodne.
Dalšu jězbu Radworskeho Šmitec-Schwarzec busoweho předewzaća pod hesłom „Wěra zetka hudźbu“ budźe wot póndźele do štwórtka, 10. do 13. awgusta, do Erfurta. Wobdźělnicy wopytaja mjez druhim klóšter awgustinow a tamniši měšniski seminar. Dale wobdźěla so na Erfurtskich domowych swjedźenskich hrach, hdźež předstaja musical „Jesus Christus Superstar“. Přizjewjenja přijimuje Šmitec-Schwarzec wozydłownistwa w Radworju, telefonowe čisło (03 59 35) 28 60. Městna su hišće swobodne.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 11. meje, wot 18.00 do 21.00 hodź. na Budyskej farje. Dalše je mjez druhim srjedu, 27. meje, w Drježdźanach planowane. Zdobom poskića zamołwići zawod tež online přez platformu Zoom, a to štwórtk, 28. meje, wot 18.00 do 21.00 hodź. Přizjewjenja přijimuja online.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
