Katolski Posoł – 21. septembra 2025
W swojim zawodnym nastawku duchowny wo tym pisa, kak ewangeliji tuteje njedźele wěste měritka zaso trochu wusměrja. Mjez druhim wón wuwjedźe, što měło w žiwjenju prioritu měć a što móže čłowjeka nimo wěry njesć.
Zarjad Drježdźansko-Mišnjanskeho biskopstwa přećehnje w přichodnymaj tydźenjomaj do swojeho noweho domicila w Domje propsta Beiera. Wot póndźele, 6. oktobra, budźe biskopski ordinariat wosrjedź města přistupny.
Na kromje Baćona bu nowy swjaty křiž poswjećeny. Wo tym pisa awtor w swojim přinošk a tohorunja wuswětla, što ma swjaty křiž z křižerstwom činić.
Pjeć króć su w Chrósćicach w septembru pasionsku hru „Sćěhuj mje!“ předstajeli. Wobhladało bě sej ju tohorunja 150 wosobow z 31 skupin, kotřiž wobdźělichu so na kongresu, kiž běše prěni króć z hosćom we Łužicy a samo w Sakskej.
Dekanatne dušepastyrstwo dźěći we Worklecach přeprošuje šulerjow 1. a 2. lětnika w nazymskich prózdninach na zhromadny dźeń do Don Boskoweho domu we Worklecach. Wón steji pod hesłom „Ja sym ja a ty sy ty – Jězus wšitkich lubuje!“. Wobdźělić móža so dźěći pak wutoru, 14. oktobra, abo štwórtk, 16. oktobra, stajnje wot 9.00 do 15.00 hodź. Zajimcy měli so hač do srjedy, 1. oktobra, online přizjewić.
Družki ze serbskich wosadow, kotrež noša postawu swjateje Marije do Róžanta, su na zhromadnu putnisku jězbu z busom do Roma přeprošene. Putnikowanje wotměje so klětu w prěnim tydźenju zymskich prózdnin, a to wot njedźele do soboty, 8. do 14. februara. Wobdźělnikow wočakuja mjez druhim wopyt Pětroweje cyrkwje, Vatikanskich muzejow a katakombow, generalna awdienca z bamžom Lejom XIV. kaž tež Boža mša z Drježdźansko-Mišnjanskim biskopom Heinrichom Timmereversom. Sobu jěć smědźa wšitcy, kiž su 14. žiwjenske lěto dokónčili. Přizjewjenja přijimuja hač do štwórtka, 30. oktobra, na Chróšćanskej farje.
Worklečanske dekanatne dušepastyrstwo za dźěći a młodźinu přeprošuje dźěći 4. a 5. lětnika na zhromadny dźeń pod hesłom „Swjaty Carlo Acutis – přikład tež za mnje?!“. Tón budźe srjedu, 8. oktobra, wot 9.00 do 15.00 hodź. w Don Boskowym domje we Worklecach. Zajimcy měli so hač do srjedy, 1. oktobra, online přizjewić.
Serbska protyka
