Katolski Posoł – 8. nowembra 2026
Wo dwěmaj swětomaj, w kotrymž křesćenjo dźensa steja, pisa awtor w swojim zawodnym nastawku. W nim wobswětluje centralny tema čitanjow tuteje njedźele a rozłoži, čehodla stej wobaj swětaj za to trěbnej.
Nowu wopomnjensku stelu je Kulowski duchowny na swjedźenju Wšěch swjatych na tamnišim kěrchowje poswjećił. Wona njedopomina jeničce na „hwězdne dźěći“.
Potajnstwu čiłeho wozjewjenja Božeho słowa wěnuje so nowa impulsowa serija w Katolski Posole. W dźesać dźělach skići wona lektoram a w cyrkwi připosłuchacym dohlady a pokiwy za praksu kaž tež impulsy.
W Radworju je něhdyši twarski wojak młodostnym wo swojich nadawkach, wo přesłyšowanju stasi a wo pomocy z wěry powědał. Wón běše w NDRskim času słužbu z brónju we wójsku wotpokazał.
Worklečanske dekanatne dušepastyrstwo je na Instagramje wšelake nastorki, duchowne posylnjenja a zaběry za dołhe nazymske a zymske wječory abo swobodne chwile w běhu dnja wozjewiło. Tute a dalše impulsy kaž tež najwšelakoriše informacije a pokiwy su wotnětka tohorunja na swójskim whatsappowym kanalu přistupne.
Serbskim slědam cistercienskeho klóštra na Morawje w juhu Čěskeje wěnuje so awtor w swojim přinošku. Mjez druhim je tomu lětsa 125 lět, zo bu tamniši konwent wozrodźeny. Prěnja abatisa běše tehdy Serbowka.
Serbscy křižerjo, kotřiž chcedźa so klětu na putnikowanju wot soboty do soboty, 1. do 8. meje, wobdźělić, móža so na internetowej stronje www.posol.de hač do póndźele, 30. nowembra, přizjewić. Tam su nadrobne informacije podate. Kruh móžnych wobdźělnikow je powjetšeny a doba přizjewjenja podlěšena.
Sekcija wěda a skutk Towarstwa Cyrila a Metoda z.t. (TCM) přewjedźe klětu wot póndźele, 30 awgusta, do pjatka, 3. septembra, wulět do zapadneje Porynskeje. Wot kwartěra w Königswinteru poda so skupina na wšelake městna, mjez druhim do Kölna a Aachena, ale tež do Europskeho parlamenta w Brüsselu. Zajimcy měli so hač do wutory, 15. decembra, online abo w redakciji Katolskeho Posoła přizjewić, telefonowe čisło (0 35 91) 55 02 10. Zapłaćić pak měli jězbu hakle klětu. link za přizjewjenje jězby TCM 2027.
Ewangelske nabožne wusyłanje w Serbskim rozhłosu MDR ma tutu njedźelu, 8. nowembra, serbski superintendent na wuměnku Jan Malink z Budyšina.
Na mjeztym 15. kulturnu zymu přeprošuje Monika Gerdesowa wšitkich zajimcow w přichodnych měsacach do swojeje putniskeje hospody w Chrósćicach. Zarjadowanja w serbskej a němskej rěči wotměja so zaso po sobotach, a to wot 28. nowembra hač do 27. februara, nimale tydźensce. Započatk je, nimo jednoho wječora, stajnje w 19.45 hodź.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a wosebje za dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Słódkosće měli separatnje spakować. Wotedać hodźa so dary po móžnosći w měchach – sćěhowace dny pola Špitankec w Zejicach, Kamjenska dróha 10: sobotu, 7. nowembra, wot 9.00 do 12.00 hodź., pjatk, 13. nowembra. wot 15.00 do 18.00 hodź. kaž tež sobotu, 14. nowembra, wot 9.00 do 11.00 hodź.
W Tuchorskim lěsu wotměje so pokutny dźeń, srjedu, 18. nowembra, w 10.00 hodź. dwurěčny ekumeniski nyšpor před jednym z něhdyšich bunkrow. Wšitcy zajimcy su wutrobnje přeprošeni.
Młodźi dorosćeni w starobje 18 do 35 lět su na kubłansku jězbu klětu wot pjatka do njedźele, 15. do, 17. januara, do Winfriedoweho doma w Schmiedebergu přeprošeni. Při rozmołwach, kreatiwnych dźěłarničkach a wšelakich hrach změja woni składnosć nowych ludźi zeznać, nowe nazhonjenja zběrać a při tym sej swójsku wěru znowa wotkryć. Přizjewić móža so zajimcy online. Tam su tež płaćizny podate.
Nowy duchowny poskitk je redakciski team Dekanatneho dušepastyrstwa za młodźinu we Worklecach spřihotował. Wotnětka móža so zajimcy krasnosćiwy róžowc w serbskej rěči sobu modlić, kotryž je online wozjewjeny.
Dalše pokiwy su w Powšitkownych wozjewjenjach podate.
Serbska protyka
