Katolski Posoł – 23. nowembra 2025
Wo gesće duchowneho při durjach do Božeho domu pisa awtor w swojim zawodnym nastawku. Zdobom rozmysluje wo wosebitym wołtarnišću w Augsburgskej cyrkwi a kak hodźi so tón k swjedźenjej tuteje njedźele.
Němscy a pólscy biskopja su we Wrócławju na historiske listowanje před 60 lětami spominali. Zdobom podpisaštaj dwaj z njeju zhromadne wozjewjenje.
Wustajeńca w Chróšćanskim Hórnikowym domje předstaja nimale 150 lět lajskeho dźiwadła wokoło tuteje wosadneje wsy. Zajimcy móža sej ju hač do hód kóždu njedźelu po nyšporje hač do 17.00 hodź. z wodźenjom wobhladać abo sej z iniciatorom Jurjom Špitankom indiwiduelny termin za nje dojednać.
Při pomocnej akciji „Łužica pomha“ Towarstwa Cyrila a Metoda z.t. su lětsa znowa wulke mnóstwo darow nahromadźili. W pólskej diecezy, do kotrejež je dowjezechu, su za nje přewšo dźakowni.
Towarstwo Cyrila a Metoda z.t. je třeći raz na předwječoru pokutneho dnja škotowy a romméjowy turněr wotměło. Na kartyplacanju wobdźěli so přibližnje 40 zajimcow, z kotrychž so někotři z mytom domoj nawróćichu.
90 dźěći je w Njebjelčicach Boži dom a swojich mjenowych patronow zeznało. Tam zhromadźichu so na pokutnym dnju wšitcy, kotřiž póńdu klětu k prěnjemu swjatemu woprawjenju.
Před 25 lětami je biskop Joachim Reinelt milenijowy pomnik blisko Smochćic poswjećił. W rozmołwje z Katolskim Posołom so Baćoński farar Gerat Wornar, kotryž běše iniciator projekta, na nastaće dopomina.
W Tuchorskim lěsu blisko Hornjeho Wujězda zhromadźichu so na pokutnym dnju dźesatki wěriwych k dwurěčnemu ekumeniskemu nyšporej před něhdyšim bunkerom. Na toho wrotach běše lětsa prěni raz něšto namolowane.
Na dobry skutk swjateho Měrćina su dźěći Katolskeho serbskeho dźěćaceho doma „Alojs Andricki“ w Radworju ze swojimi swójbnymi a wosadnymi spominali. Na nyšpor běchu sej tež chowancow dalšeju pěstowarnjow přeprosyli.
W najnowšim wusyłanju podcasta „Mit Herz und Haltung“ Katolskeje akademije Drježdźansko-Mišnjanskeho biskopstwa a w Freiburgu wuchadźaceho časopisa Herderkorrespondenz steji jezuitska słužba za ćěkancow w srjedźišću. K tomu rozmołwješe so žurnalist Daniel Heinze z jezuitskim patrom Fabianom Rječku, pochadźacym z Kulowa.
Wupisanje dźěłoweho městna
Towarstwo Cyrila a Metoda z.t. pyta wosobu, kotraž by wot 1. januara 2026 redakciski team Katolskeho Posoła zesylniła. Njejedna so wo přidatne dźěłowe městno, ale wosoba sej dźěłowe městno ze sobudźěłaćerku dźěli. Dźěłowy čas wučinja 20 hodźin wob tydźeń.
Składnostnje poswjećenja pomnika swjateju Cyrila a Metoda pola Stróžišća před 25 lětami přeprošuje mějićel, Towarstwo Cyrila a Metoda z.t. (TCM), wěriwych ze wšěch wosadow na nyšpor na tutym městnje. Wón budźe na swjedźenju Chrysta Krala, tutu njedźelu, 23. nowembra, w 14.00 hodź. Po tym su wšitcy na swačinu do Smochčanskeho kubłanišća swjateho Bena přeprošeni.
Na zhromadny nyšpor je dekanatna młodźina tež lětsa na swjedźenju
Chrysta Krala, njedźelu, 23. nowembra, do Chrósćic prošena. Započatk je w 14.00 hodź. z nyšporom w cyrkwi.
Přizamknje so přednošk Wjenkec
Haliny a Chrystofera wo teologiji mandźelstwa z wosobinskim swědčenjom.
Towarstwo swjateje Filomeny z.t. chce tež lětsa zaso dźěći a swójby w čěskim Dolním Podluží kaž tež w bołharskim Razgradźe a wokolnych wsach z hodownymi pakćikami zwjeselić. Trjebanu drastu a črije lětsa njehromadźa. Pakćiki kaž tež poćehnjenja a hygieniske artikle zběraja wot póndźele do štwórtka, 1. do 4. decembra, wšědnje wot 17.00 do 18.00 hodź. w Smjerdźečanskim kulturnym domje.
Projektowy chór pod nawodom cyrkwinskohudźbneho direktora Friedemanna Böhme předstaji sobotu, 29. nowembra, w Hejničanskej cyrkwi Marije wopytanja hodowny oratorij Johanna Sebastiana Bacha. Započatk je w 17.00 hodź. Zastupne lisćiki dóstanu zajimcy při tamnišej klóšterskej recepciji.
Komorny chór nota bene leipzig pod nawodom profesora Martina Krumbiegela wuhotuje njedźelu, 23. nowembra, w 17.00 hodź. koncert w klóšterskej cyrkwi w Pančicach-Kukowje. Zaklinča mjez druhim twórba „Musicalische Exequien“ Heinricha Schütza kaž tež kruchi dalšich komponistow 17. do 21. lětstotka. Zastup je darmotny, wo dary proša.
Prěnjej zarjadowani we wobłuku kulturneje zymy w putniskej hospodźe Moniki Gerdesoweje budźetej sobotu, 29. Nowembra. Wot 18.00 do 18.30 hodź. móža dźěći na bajku słuchać. A w 19.45 hodź. přizamknje so knižne čitanje za dorosćenych pod hesłom „Z Prahi do Palestiny“ z Friedrichom Pollackom a Michałom Nukom.
Serbska protyka
