Katolski Posoł – 7. decembra 2025
Wo wuprajenju w ewangeliju tuteje njedźele rozmysluje serbski duchowny w swojim zawodnym nastawku. Při tym pokaza tež na mysle němskeho katolskeho měšnika a spisowaćela. Tón zwuraznja, što so stanje, hdyž čłowjek napřećiwny puć woli.
Z nowym prezidijom a wjele přihłosowanjom za planowany nowy cyrkwinski gremij je Centralny komitej katolikow Němskeje (ZdK) swoju dwudnjowsku plenarnu zhromadźiznu w Berlinje zakónčił. Jemu přisłušeja tež Serbaj.
Na přikładźe Worklec samostejacy ze serbskich wosadow zhonichu, kak su so wsy w katolskich Serbach wosebje po politiskim přewróće w zašłych 35 lětach wuwili. W Smochćicach zeńdźe so wjace hač 30 wobdźělnikow k swojemu lětušemu poslednjemu zetkanju.
Na swojej prěnjej wukrajnej jězbje wopyta bamž Leo XIV. wot kónc nowembra do spočatka decembra Bliski wuchod. Na njej je swjaty wótc mjez druhim doraznje apelował, zo matej so měr a pokoj přisporjeć.
Mniša němskorěčneje benediktinskeje abtownje Dormitio w Jerusalemje chcedźa tež lětsa w hodownej nocy pismowu rólu z mjenami a naležnosćemi wěriwych putnikujo do Betlehema njesć. Štóž chce so na akciji wobdźělić a dźěl wulkeje modlerskeje zhromadnosće być, móže mjena hač do póndźele, 22. decembra, do wotpowědneho formulara na internetowej stronje abtownje zapodać.
Serbski muski chór je prěnju adwentnu njedźelu seniorow serbskeje wosady zawjeselił. Po nyšporje poskićichu na „Radlubinje“ pisany program spěwow, ale tež někotružkuli mysl k rozpominanju.
Na swjedźenju Marije bjezhrěšneho podjeća před 60 lětami – 8. decembra 1965 – skónči so Druhi Vatikanski koncil. Wo toho duchu so hač do dźensnišeho diskutuje.
Swoje talenty nałožuje serbski teologa a psychologa mnohostronsce na dobro zhromadnosće. Tele dny swjeći Tadej Šiman z Chrósćić swoje 70ćiny.
Dekanatne dušepastyrstwo za dźěći přeprošuje šulerjow 6. do 8. lětnika na kreatiwnu dźěłarničku do Don Boskoweho domu we Worklecach, kotraž budźe sobotu 13. decembra. Wobdźělić móža so zajimcy pak wot 9.00 do 11.30 hodź. abo wot 12.30 do 15.00 hodź. Přizjewjenja přijimuja online hač do póndźele, 8. decembra.
Na adwentne wiki su wopytowarjo sobotu, 13. decembra, wot 10.00 do 18.00 hodź. do klóštra Marijineje hwězdy w Pančicach-Kukowje prošeni. Mjez druhim poskića klóšterske likery, sele a wolije, Ochranowske hwězdy, keramiku kaž tež plećene a pjelsćowane produkty. Hižo wot 9.00 hodź. předawaja na klóšterskim dworje hodowne štomy z klóšterskeho lěsa. W 15.30 hodź. wustupi chór zakładneje šule w Pančicach-Kukowje.
Sekcija wěda a skutk Towarstwa Cyrila a Metoda z.t. (TCM) přewjedźe klětu wot njedźele, 30. awgusta, do pjatka, 4. septembra, wulět do Haibacha w nižobayerskim wokrjesu Straubing-Bogen. Wottam wopyta skupina wjacore městna w Bayerskim lěsu, mjez druhim Kelheim, klóšter Weltenburg, Straubing, putnisku cyrkej Bogenberg, Bad Kötzing a horu Wulki Arber. Zajimcy měli so hač do póndźele, 12. januara, pak online přez eveeno abo w redakciji Katolskeho Posoła přizjewić.
We wobłuku kulturneje zymy
w putniskej hospodźe Moniki
Gerdesoweje w Chrósćicach
přednošuje sobotu, 13. decembra,
w 19.45 hodź. Hilžbjeta Pöpelec wo swojich dožiwjenjach po Jakubowym puću w Portugalskej. Hižo w 16.00 hodź. su wšitke dźěći na serbske kino přeprošeni.
Serbska protyka
