Katolski Posoł – 30. awgusta 2026
Swoje žiwjenje sej čłowjek planuje, ale při tym na někoho zabudźe, kiž je to za kóždeho čłowjeka hižo sčinił. Awtorka zawodneho nastawka praša so nastupajo ewangelij tuteje njedźele a k něčemu pozbudźa, štož steji přećiwo dźensnišemu wuwiću towaršnosće.
Wospjet wotmě so w Hrubjelčicach na Jaworkec/Maćijec statoku ekumeniski dworowy swjedźeń. Na wosebite wašnje běchu dźěći do prědowanja na nutrnosći zapřijate. Něšto pak dyrbjachu wjedra dla wupadnyć dać.
Na dlěšu turu z kolesom podachu so w lětnich prózdninach Radworscy firmujomni zhromadnje ze swojim wosadnym fararjom. Cil běše klóšter, kotryž leži w sewjeru Zhorjelskeho biskopstwa.
Poprawom do kófra drasty a kosmetiku pakuješ. Zo móže pak tam tež swjata Marija zapakowana być, to předstajichu wobydlerjo Žiwjenskeho ruma klóštra Marijineje hwězdy w Pančicach-Kukowje na swojim lětnim swjedźenju.
Wona je sama nazhoniła, što to rěka domiznu zhubić a jako cuza witana njebyć. Rotraut Dietz wotmołwi na to z lubosću a staji swoje žiwjenje do słužby za Boha a swojich sobučłowjekow. Nětko je wona na prawdu Božu wotešła.
Wóslik na awće a wšitcy hrajerjo w čornej drasće su někotre impresije, kiž awtor přinoška wo předstajenju pasionskeje hry w Nižozemskim Tegelenje zwuraznja. Wosebje je jeho zadźiwało, zo so w tutej inscenaciji Jězusowa perspektiwa změni
Městnosće wopytać, hdźež skutkowaštaj Johann Sebastian Bach a Martin Luther, běše jenož dźěl programa putniskeje jězby do Erfurta a wokoliny. Awtorce rozprawjatej wo musicalu, kiž stej před kulisu Erfurtskeho doma widźałoj.
Poprawom do kófra drasty a kosmetiku pakuješ. Zo móže pak tam tež swjata Marija zapakowana być, to předstajichu wobydlerjo Žiwjenskeho ruma klóštra Marijineje hwězdy w Pančicach-Kukowje na swojim lětnim swjedźenju.
Wo spomóžnym skutkowanju miłosćiwych sotrow w Kamjencu rozprawješe Katolski Posoł před 100 lětami. Ale tež ćežke njezboža so tehdy stachu.
Na kamjentnymaj taflomaj z mjenami Radworskich wótčincow w Starej cyrkwičce je so dalše přidružiło. Na samsnym městnje spominachu na něhdyšeho dirigenta chóra Meje, kotryž běše so před 100 lětami narodźił.
Serbscy křižerjo móža so na ekskluziwnym podawku klětu w Romje wobdźělić. Přewodnikaj na jězbje Cyril Hančik a Tadej Šiman powědataj w interviewje što křižerjo tam wšitko dožiwja. Zdobom je kruh wobdźělnikow nětko rozšěrjeny a přizjewjenska doba podlěšena.
Katolske nabožne wusyłanje w Serbskim rozhłosu MDR ma tutu njedźelu, 30. awgusta, Radworski farar Beno Jakubaš.
Berlinske arcybiskopstwo kaž tež Zhorjelska, Erfurtska a Drježdźansko-Mišnjanska dieceza poskićuja zhromadnje z pućowanskim běrowom Biblische Reisen ze Stuttgarta zajimowanym młodostnym a młodym dorosćenym wot 18 do 35 lět jězbu na klětuše swětowe zetkanje młodźiny w Južnej Koreji. Wona wotměje so wot srjedy, 28. julija, do póndźele, 9. awgusta 2027, w Seoulu.
Drježdźansko-Mišnjanske biskopstwo a iniciatiwa „Misionariske rozmachi“ Ewangelsko-lutherskeje krajneje cyrkwje Sakskeje přeprošujetej wšitkich, kotřiž so w swójbnym a dźěćacym dušepastyrstwje angažuja abo za to zajimuja, na inspiraciski dźeń. Předznajomosće njejsu za to trěbne. Zarjadowanje wotměje so sobotu, 19. septembra, wot 9.30 do 16.00 hodź. w biskopskej zakładnej šuli Maria Montessori na Tzschirnerowej 12 w Budyšinje. Dopołdnja kaž tež popołdnju poskića wšelake dźěłarnički, mjez druhim, kak móžeš bibliske stawizny žiwje powědać, dźěći na prěnje swjate woprawjenje přihotować abo wěru z hudźbu a pohibami sposrědkować. Za inspiraciski dźeń měli so zajimcy hač do wutory, 8. septembra, online přizjewić.
Worklečanske dekanatne dušepastyrstwo za dźěći přeprošuje wšitkich šulerjow wot 1. do 6. lětnika ze serbskich wosadow na zhromadny dźeń pod hesłom „Stark-Mach-Tag“. Tam tematizuja na jednore wašnje wšědne situacije dźěći – wot překročenja hranicow hač k seksualizowanej namocy –, kotrež bychu dźěći dožiwić móhli. Zaměr je, dźěći přez zhromadnosć z druhimi, wjeselo při hraću a zaběru z wobsahami dnja w jich sebjewědomju skrućić. Zdobom nawuknu wobdźělnicy wjele wo sebi, swójskich prawach a začućach. Zarjadowanje ze stajnje samsnym wobsahom budźe na sćěhowacych terminach: sobotu, 10. oktobra, w Njebjelčicach, wutoru, 13. oktobra, w Ralbicach a srjedu, 14. oktobra, w Radworju. Zhromadny dźeń zahaji so stajnje we 8.45 hodź. a skónči so w 15.00 hodź. Wobdźělenje w druhej město domjacej wosadźe je móžne. Za wudawki dnja zběraja sydom eurow. Ličba městnow je wobmjezowana. Přizjewjenja přijimuja hač do pjatka, 18. septembra, online.
Towarstwo Cyrila a Metoda z.t. (TCM) chce ze swojej akciju „Łužica pomha“ towarstwu Fundatia CJD Domus w Keresztúru pomhać. Štóž chcył akciju z pjenježnym darom podpěrać, njech přepokaza jón na konto Towarstwa Cyrila a Metoda z.t. (TCM): Cyrill-Methodius-Verein e.V., IBAN DE65 7509 0300 0008 2823 66, hesło: „Rumunska“. Za dary hač do 300 eurow dosaha za financny zarjad mjeztym jako dopokaz kontowy wućah. Za wyše sumy wustaji TCM darowansku kwitowanku, trjeba pak dospołnu adresu, kotruž měli z mejlku na TCM@Posol.de abo telefonisce pod (0 35 91) 55 02 10 zdźělić.
Z Kulowa pochadźacy pater Fabian Rječka, referent za politisku komunikaciju Jezuitskeje słužby za ćěkancow w Němskej (JRS), přeprošuje zajimcow na zhromadnu rozmołwu wo nazhonjenjach a prašenjach w zwisku z připućowanjom ćěkancow. Wona wotměje so wutoru, 1. septembra, wot 19.00 do 20.30 hodź. w Budyskim ekumeniskim tachantskim wobchodźe. Wón chce starosće a nadźije chutnje brać, mytosy wujasnić a k mjezyčłowjeskemu angažementej pozbudźować. Zarjadowanje skići zdobom dohlad do wšědneho dźěła JRS z ćěkancami a ma wid za čłowjeskosć w debaće rozšěrić.
Chór Meja přeprošuje na swój lětni koncert, kotryž budźe njedźelu, 30. awgusta, w 16.00 hodź. na farskej zahrodźe w Radworju. Swačinu poskića hižo wot 15.30 hodź. Dźěći rejwarskeje skupiny Łužičanka program sobu wobrubja.
Drježdźansko-Mišnjanski biskop Heinrich Timmerevers swjeći sobotu, 5. septembra, slěborny jubilej swojeje biskopskeje swjećizny. Swjedźenske kemše su w 10.30 hodź. w Drježdźanskej katedrali. Na nje su wšitcy přeprošeni.
W Hodźiju swjeća njedźelu, 13. septembra, w 9.30 hodź. składnostnje 950lětneho jubileja, zo bu pod biskopom Benom prěnja kamjentna cyrkej natwarjena, dwurěčnu Božu słužbu. Swjedźenski prědar budźe sakski krajny biskop Tobias Bilz. Wšitke chóry Hodźijskeje wosady chcedźa kemše wobrubić. Wočakuja katolske a ewangelske Serbowki w narodnej drasće.
Serbski dom wobdźěli so na Dnju wotewrjeneho pomnika njedźelu, 13. septembra, w kotrymž je tež redakcija Katolskeho Posoła zaměstnjena. Wšitcy zajimcy móža sej wot 10.00 do 17.00 hodź. dom bliže wobhladać a mjez druhim rumnosći Katolskeho Posoła wopytać. Wšitcy su wutrobnje witani.
Sekcija Swójba Towarstwa Cyrila a Metoda z.t. přeprošuje swójby na zabawne popołdnjo, kotrež wotměje so njedźelu, 13. septembra, we Wotrowje. Spočatk budźe w 15.00 hodź. při Starej šuli. Po wsy powjedźe Měrko Pohonč. Dźěći móža sej při kwisu najwšelakoriše myta zdobyć. Po wodźenju su wšitcy na swačinu na farje prošeni.
Na wotkrywansku turu po Drježdźanskej katedrali su dźěći wot šěsć lět, młodostni a swójby přeprošene. Wječorne wodźenja z kapsnej lampu poskićuja we wobłuku 275. róčnicy poswjećenja Dwórskeje cyrkwje. Za póndźelu, 19. oktobra, w 19.00 a 20.00 hodź. maja hišće swobodne městna.
Serbska protyka
