Katolski Posoł – 1. februara 2026
Wo swětle cyrkwje dźensniši dźeń rozmysluje serbski duchowny w swojim zawodnym nastawku. Tak wón k tomu pozbudźuje, zo móže kóždy kaž swětło skutkować, byrnjež snadne było.
Pišćele w Róžeńčanskej putniskej cyrkwi maja so reparować. Předewzaće podpěra tež serbski chór. Wón je abatisy klóštra Marijineje hwězdy, kiž je za hnadowne městno zamołwity, nětko wunošk swojeho hodowneho koncerta přepodał.
Młoda Serbowka běše wjacore měsacy wot kolebki čłowjestwa přez orient do juhowuchodneje Azije po puću. Po přebytku w domiznje je so tele dny zaso na puć podała. Swoje pućowanje staja do zwiska z wěru do Trojjeničkeho Boha. W dwanaće přinoškach chce wona wo tym rozprawjeć kaž tež swoju perspektiwu wo wšelakich zetkanjach pisać.
Wo swjatym, za kotrehož so w cyrkwi nastupiš, a žohnowanju na jeho zastupnu próstwu pisa awtorka w swojim přinošku. Tón je patron přećiwo chorosćam šije a njepřihódnemu słowu.
Marta Markowa ze Sernjan běše žona połna wědy kaž tołste knihi, ze žortnej žiłku, kiž móžeše so tak wutrobnje smjeć, zo w domskim zarža. Takle wopisa ju awtorka nekrologa. Nětko bu Marta Markowa 92lětna do wěčnosće wotwołana.
Kurs eksperimentelneho molowanja z wolijowymi barbami budźe sobotu a njedźelu, 14. a 15. februara, w Smochčanskim kubłanišću swjateho Bena. W dźěłarničce posrědkuje referent Günther Scheer mjez druhim rjemjeslniske zakłady wolijoweho molowanja. Přizjewić so je móžno hač do pjatka, 6. februara.
„7 tydźenjow połni hódnoty“ je tema lětušeje póstneje akcije Dźěłoweho zhromadźenstwa za katolske swójbne kubłanje (AKF) za pory a swójby. Nimo toho předleži tež wersija za swójby z dźěćimi w zakładnošulskej starobje. Tydźenske tekstowe impulsy maja k rozmyslowanju a wzajomnej wuměnje myslow přeprosyć kaž tež k změnje perspektiwy pohnuwać. Tak dóstanu wobdźělnicy ke kóždej temje darmotnje kóždy tydźeń list – z póštu, z mejlku abo z linkom na šmóratko. Za to měli so hač do njedźele, 8. februara, přizjewić.
Sydom bibliskich žonow, kotrež su so Jězusa dótknyli, steja w srjedźišću wosebiteho zešiwka „Jězusa znowa zetkać“ nakładnistwa Stiftung Christliche Medien kaž tež křesćanskeju časopisow LYDIA a JOYCE. Zešiwk je za jednotliwcow, ale tež za swójbne kružki, wosadne skupiny abo modlerske iniciatiwy mysleny a wobsahuje 40 impulsow za póstny čas. W Drježdźansko-Mišnjanskim biskopstwje poskićuja k tomu tež dobrowólnu digitalnu wuměnu přez platformu Zoom po pjeć srjedach w februaru a měrcu. Za to proša zamołwići wo přizjewjenje hač do njedźele, 8. februara. Informaciske zarjadowanje k tomu budźe srjedu, 4. februara, w 20.00 hodź. tohorunja přez Zoom.
Drježdźansko-Mišnjanske biskopstwo přeprošuje wšěch, kotřiž čestnohamtsce w chórach spěwaja, je nawjeduja, w cyrkwi kantorja, abo na instrumentach hraja respektiwnje chcedźa to přichodnje rady činić, na dalekubłanje. Wone budźe wot pjatka, 27. februara, do njedźele, 1. měrca, w Smochčanskim kubłanišću swjateho Bena. Za to měli so do toho přizjewić.
Pod hesłom „Zhromadnje po puću“ steji putniska jězba do Israela, kotraž wotměje so wot póndźele do póndźele, 2. do 9. nowembra. Přewodźeć budu ju cistercienski pater dr. Johannes Müller a Enrico Scholze z Hellendorfa. Jězbu poskića zhromadnje z pućowanskim běrowom Scuba-Reisen ze Stuttgarta. Přizjewjenja su hač do pjatka, 7. awgusta, móžne. Ličba městnow je wobmjezowana.
Projekt Lipšćanskeje uniwersity „Wobydlerjo činja žurnalizm“ přeprošuje wosoby wot 18 lět ze Sakskeje, so z wobydlerskim žurnalistom stać a wo temach ze swojeho regiona rozprawjeć, wo kotrychž hewak nichtó njerěči. Wobdźělenje je darmotne, nježada sej žane předznajomosće a ma so derje z powołanjom a swójbu zjednoćić dać. Zajimcy měli so hač do soboty, 28. februara, z mejlku na buergerjournalismus@uni-leipzig.de přizjewić. Ličba městnow je wobmjezowana. – wjace
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. Za to trěbnu wědu posrědkuja w zakładnym kursu, kotryž wotměje so wot 4. měrca hač do 18. apryla trójce srjedu wot 17.00 do 20.00 hodź. kaž tež trójce sobotu wot 9.00 do 15.00 hodź. Na to sćěhuje dohromady 20hodźinski praktikum z dalšimi štyrjomi zetkanjemi. Pohłubšacy kurs je w septembru planowany. Štóž chcył wukubłanje absolwować, měł so pola hospicneje słužby Carity w Kamjencu pod telefonowym čisłom (0 35 78) 37 43 12 abo z mejlku na hospiz@caritas-oberlausitz.de přizjewić. Flajer z dalšimi informacijemi a terminami je pod www.posol.de podaty.
Seminar k přihotej na sakrament mandźelstwa wotměje so pjatk a sobotu, 27. a 28. februara, w Smochčanskim kubłanišću swjateho Bena. Přizjewjenja su online móžne.
Serbska protyka
