Katolski Posoł – 11. januara 2026
Wo čłowjeku mjez čłowjekami pisa serbski duchowny w swojim zawodnym nastawku k swjedźenjej tuteje njedźele. Mjez druhim dopomina awtor na runohódnosć před Bohom.
Ze zawrjenjom Swjatych wrotow Pětroweje cyrkwje w Romje je bamž Leo XIV. swjedźenske lěto katolskeje cyrkwje oficialnje zakónčił. Při tym pak je zdobom prašenje přichoda narěznył.
Bamž Leo XIV. je prěni króć hody žohnowanje „Urbi et orbi“ spožčił. Zdobom je wón tradiciju zaso wožiwił, kiž běše Pawoł VI. załožił a kotruž staj tež Jan Pawoł II. a Benedikt XVI. pěstowałoj.
Sylne hłosy a młode talenty dožiwichu připosłucharjo třeći dźeń noweho lěta w Radworju. Chór Meja, wosadna dźěćaca šola kaž tež instrumentalisća wuhotowachu tam nowolětny koncert.
W Kulowje je z wašnjom, zo předšulske dźěći hižo štwórtu adwentnu njedźelu hodownu hru předstajeja. Loni steješe wona pod hesłom „Puć do Betlehema“.
Spěwny postrow posrědkowachu Ralbičanscy młodostni njedźelu po hodźoch wobydlerjam Doma swjateje Ludmile w Chrósćicach. Hižo tójšto lět tule tradiciju pěstuja.
Duchowny přistup k rozmyslowanju wo Božej stwórbje dóstachu wopytowarjo Chróšćanskeho Božeho domu sobotu do štwórteje adwentneje njedźele. Na wjerchu cyrkwje pokazachu tam multimedialnu produkciju „Genezis 2.0“.
Krasny kwěćel zymskeje a hodowneje hudźby běše za awtorku přinoška koncert njedźelu po hodźoch w Róžeńće. Wuhotował běše jón chór Lipa, serbski organist kaž tež někotři smyčkarjo Serbskeje komorneje filharmonije Budyskeho Serbskeho ludoweho ansambla.
Njewšědny kwasny dźeń – prawdźepodobny prěni z telko zhromadnymi lětami w Serbach – smědźeštaj mandźelskaj w Domje swjateje Ludmile w Chrósćicach woswjećić. Hižo dźeń po tym pak buštaj přez smjerć jednoho z njeju dźělenaj.
Z meditacisko-hudźbnym nyšporom zakónčichu w Baćonju tež loni kalendrowe lěto. Nimo pěsnjow a instrumentalneje hudźby słyšachu hosćo zdobom zaso teksty, kotrež k přemyslowanju pohnuwachu.
Z domjacym nadawkom wróćichu so wjetši a mjeńši wopytowarjo hodowneje hrě w Róžeńće patoržicu popołdnju z Božeho domu. W inscenaciji tónraz předstajichu, kak dźěći kralow z rańšeho kraja wulkej hwězdźe sćěhowachu.
Na swjedźenju Swjateje swójby su dźěći Njebjelčanskeje wosady swoju hodownu hru předstajili. W srjedźišću stejachu tam tónraz štyri swětleška.
W Chrósćicach su třeći swjaty dźeń hód na poswjećenje wjesneje kapałki před sto lětami spominali. Wona hač dodźensa k něčemu napomina.
Jako putnicy dowěry a rjemjeslnicy pokoja wróćichu so wobdźělnicy z Drježdźansko-Mišnjanskeho biskopstwa – mjez nimi tež Serbja – a tysacy młodostnych ze wšeho swěta z Parisa do swojich domiznow. Francoska stolica běše tónraz k změnje lěta hosćićel ekumeniskeho europskeho zetkanja młodźiny Taizéskeho zhromadźenstwa.
Hinak hač je z wašnjom, njepředstajeja patoržicu w Radworju dźěći hodownu hru, ale nazwučuje ju druha skupina. Program wudospołni loni k tomu wutworjena band.
Z wida sobuskutkowaceje wopisa awtorka přinoška, kak je wona hodownu hru w Ralbičanskej cyrkwi dožiwiła. Přez tele nazhonjenje běchu za nju tež hody loni hinaše.
Wo nadawku swójby rozmołwještej so mać a dźowka na Božej mši prěnju njedźelu po hodźoch w Radworju. Z tym nawjazachu na swjedźeń, kotryž cyrkej stajnje tón dźeń swjeći.
Za hudźbny dar ma připosłucharka hodowny koncert w Chróšćanskej cyrkwi. Tam předstajichu tónraz mjez druhim čěski hodowny cyklus.
Na wosebitym městnje zahajichu loni kónc lěta hwězdne spěwanje w Miłoćicach. Tele městno nasta hakle krótko do toho z akciju Serbskeho rozhłosa.
Na nowy rjad zarjadowanjow k temje „Swójbne rituale w běhu lěta“ přeprošuje dekanatne dušepastyrstwo za dźěći do Worklec. Wotpowědnje počasam a cyrkwinskemu lětu maja so w krótkej formje małe impulsy za swójbne nabožne žiwjenje sposrědkować. Wopytać hodźa so jednotliwe zarjadowanja abo cyły rjad. Zarjadowanja wotměja so stajnje popołdnju wot 15.30 do 17.00 hodź. we Worklečanskim Don Boskowym domje. Prěnje pod hesłom „Witamy nowe lěto“ budźe – zymskeho wjedra dla – hakle pjatk, 16. januara, a nic kaž dotal wozjewjene, 9. januara. Zajimcy měli so online přizjewić. Swójski přinošk na swójbu wučinja štyri eura.
Bonifacijowy skutk němskich katolikow w Paderbornje poskića młodym ludźom wot 18 lět w kooperaciji z Newmanowym institutom w šwedskim měsće Uppsala praktikum w sewjernej Europje. Tón traje minimalnje šěsć a maksimalnje 11 měsacow. Zajimcy měli so online wo městno požadać.
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. K tomu trěbnu wědu posrědkuja w zakładnym kursu, kotryž wotměje so wot 4. měrca hač do 18. apryla trójce srjedu wot 17.00 do 20.00 hodź. kaž tež trójce sobotu wot 9.00 do 15.00 hodź. Na to sćěhuje dohromady 20hodźinski praktikum z dalšimi štyrjomi zetkanjemi. Pohłubšacy kurs je w septembru planowany. Štóž chcył wukubłanje absolwować, měł so pola hospicneje słužby Carity w Kamjencu pod telefonowym čisłom (0 35 78) 37 43 12 abo z mejlku na hospiz@caritas-oberlausitz.de přizjewić.
Seminar k přihotej na sakrament mandźelstwa wotměje so pjatk a sobotu, 27. a 28. februara, w Smochčanskim kubłanišću swjateho Bena. Přizjewjenja su online móžne.
Dr. Lubina Malinkowa z Rakec
přednošuje sobotu, 24. januara,
w putniskej hospodźe
Moniki
Gerdesoweje w Chrósćicach
wo serbskim putniku Jurju
Wawriku, kotryž
poda so w
19. lětstotku z Kanec do Roma.
Započatk je w 19.45 hodź. Hižo
popołdnju w 16.00 hodź. su
dźěći na serbske
kino witane.
Serbska protyka
