Katolski Posoł – 6. septembra 2026
W swojim zawodnym nastawku rozmysluje jezuitski pater wo němskim słowje, kiž ma w serbšćinje sydom wšelakich wariantow. Jedna z nich čłowjeka pohnuwa, hdys a hdys pohiby zastajić, zo njeby škoda nastała a zo móhł so čłowjek znowa orientować.
Drježdźansko-Mišnjanski wyši pastyr Heinrich Timmerevers je na dnju swojeho 25lětneho biskopskeho jubileja swoje zastojnstwo jako hłowa Drježdźansko-Mišnjanskeje diecezy złožił. Wón widźi cyrkej a biskopstwo jako twarnišćo, na kotrymž měło so stajnje dale dźěłać.
Kolpingowcy diecezanskeho zwjazka Drježdźany-Mišno/Zhorjelc putnikowachu prěni raz zhromadnje do Róžanta. Zhorjelski biskop Wolfgang Ipolt w swojim prědowanju něšto wuzběhny, štož ma za jich přichod dwójny woznam.
W interviewje ćehnje biskop Heinrich Timmerevers bilancu swojeho dźesaćlětneho skutkowanja w Drježdźansko-Mišnjanskej diecezy. Wón přeradźa, čehodla ma njehladajo spadowaceje ličby křesćanow nadźiju za přichod cyrkwje.
Jako delanski chronist, mnohostronski wučer a wuběrny serbšćinar běše Pawoł Rota z Ralbic znaty. Mjez druhim je njeličomne fota z motiwami katolskeho serbskeho žiwjenja zawostajił. Nětko je 94lětny na prawdu Božu wotešoł.
Serbscy křižerjo, kotřiž chcedźa so klětu na putnikowanju wot soboty do soboty, 1. do 8. meje, wobdźělić, móža so hač do srjedy, 30. septembra, online přizjewić.
Ewangelske nabožne wusyłanje w Serbskim rozhłosu MDR ma tutu njedźelu, 6. septembra, serbski superintendent na wuměnku Jan Malink z Budyšina.
Dom swjateje Ludmile w Chrósćicach poskića dźěłowe městno fachoweho hladarja starych ludźi. Wone hodźi so hnydom wobsadźić.
Pod titlom „W systemje lubosće k blišemu“ přeprošuja awtorojo a wudawaćeljo na knižnu prezentaciju z rozmołwu póndźelu, 7. septembra, do wopomnišća na Budyskej 112A w Drježdźanach. Tam předstaja dwě nowowudaći wo róli Diakonije, Carity a opozicionelnych skupin w NDRskim času, kaž tež wuznam za dźensniše towaršnostne změny. Zarjadowanje započnje so we 18.00 hodź. Wot 17.00 hodź. poskića wodźenje po wopomnišću. Přizjewjenje njeje trěbne, zastup je darmotny.
Nowy oratorij z titulom „Wulkotna woda“ předstaja chór a rejowanska skupina 1. serbskeje kulturneje brigady, Serbska komorna filharmonija a dalši pjatk, 11. septembra, w 19.30 hodź. kaž tež njedźelu, 13. septembra, w 17.00 hodź. w Budyskej měšćanskej hali „Króna“. Cyłkowny hudźbny nawod změje Judith Kubicec. Spisali a zestajili su twórbu Róža Domašcyna, Měrćin Weclich, Johannes Gerstengarbe a Maćij Bulank. Zastupne lisćiki za Budyšin móža so online knihować. Dalše předstajenje budźe njedźelu, 27. septembra, w 17.00 hodź. w awli Liberecskeje uniwersity w sewjernej Čěskej. Za tute móža sej zajimcy zastupny lisćik jeničce telefonisce w Budyskim Serbskim ludowym ansamblu skazać, telefoniske čisło (0 35 91) 35 81 11.
Serbski dom wobdźěli so na Dnju wotewrjeneho pomnika njedźelu,
13. septembra, w kotrymž je tež redakcija Katolskeho Posoła zaměstnjena. Wšitcy zajimcy móža sej wot 10.00 do 17.00 hodź. dom bliže wobhladać a mjez druhim rumnosći Katolskeho Posoła wopytać. Wšitcy su wutrobnje witani.
Sekcija Swójba Towarstwa Cyrila a Metoda z.t. přeprošuje swójby na zabawne popołdnjo, kotrež wotměje so njedźelu, 13. septembra, we Wotrowje. Spočatk budźe w 15.00 hodź. při Starej šuli. Po wsy powjedźe Měrko Pohonč. Dźěći móža při kwisu najwšelakoriše myta dobyć. Po wodźenju su wšitcy na swačinu na farje prošeni.
Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošene. Tón budźe srjedu, 18. nowembra, wot 9.00 do 15.00 hodź. Zajimcy měli so hač do soboty, 24. oktobra, online přizjewić.
Drježdźansko-Mišnjanske biskopstwo a iniciatiwa „Misionariske rozmachi“ Ewangelsko-lutherskeje krajneje cyrkwje Sakskeje přeprošujetej wšitkich, kotřiž so w swójbnym a dźěćacym dušepastyrstwje angažuja abo za to zajimuja, na inspiraciski dźeń. Předznajomosće njejsu za to trěbne. Zarjadowanje wotměje so sobotu, 19. septembra, wot 9.30 do 16.00 hodź. w biskopskej zakładnej šuli Maria Montessori na Tzschirnerowej 12 w Budyšinje. Zajimcy měli so hač do wutory, 8. septembra, online přizjewić.
Worklečanske dekanatne dušepastyrstwo za dźěći přeprošuje wšitkich šulerjow wot 1. do 6. lětnika ze serbskich wosadow na zhromadny dźeń pod hesłom „Stark-Mach-Tag“. Zaměr je, dźěći přez zhromadnosć z druhimi, wjeselo při hraću a zaběru w jich sebjewědomju skrućić. Zdobom nawuknu wobdźělnicy wjele wo sebi, wo swójskich prawach a začućach. Zarjadowanje ze stajnje samsnym wobsahom za dźěći budźe na sćěhowacych terminach: sobotu, 10. oktobra, w Njebjelčicach, wutoru, 13. oktobra, w Ralbicach a srjedu, 14. oktobra, w Radworju. Ličba městnow je wobmjezowana. Přizjewjenja přijimuja hač do pjatka, 18. septembra, online.
Koparski turněr ministrantow ze serbskich wosadow, kotrychž bu horcoty dla w lěću wotprajeny, narunaja sobotu, 17. oktobra, w Pěskecach. Započatk je w 9.00 hodź. z Božej mšu we wjesnej kapałce. Mustwa měli so hač do pjatka, 9. oktobra w swojich wosadach přizjewić.
Dalša zběrka rjadu „LitMiks“ je w Budyskim Ludowym nakładnistwje Domowina (LND) wušła. Wona wobsahuje 23 twórbow 14 młodych awtorkow a awtorow w starobje 15 do 29 lět. Pisaja wo tym, nad čimž so wjesela, čemu so směja, što jich tyši abo trapi, za čimž so žedźa. Kniha wopřijima 84 stron a je za dźesać eurow we wšěch znatych předawanišćach serbskich knihow na předań. Skazanki přijimuje LND tohorunja přez mejlku na buchhandlung@domowina-verlag.de abo telefonisce pod čisłom (0 35 91) 57 72 88.
Towarstwo Cyrila a Metoda z.t. (TCM) chce ze swojej akciju „Łužica pomha“ towarstwu Fundatia CJD Domus w Keresztúru pomhać. Štóž chcył akciju z pjenježnym darom podpěrać, njech přepokaza jón na konto Towarstwa Cyrila a Metoda z.t. (TCM): Cyrill-Methodius-Verein e.V., IBAN DE65 7509 0300 0008 2823 66, hesło: „Rumunska“. Za dary hač do 300 eurow dosaha za financny zarjad mjeztym jako dopokaz kontowy wućah. Za wyše sumy wustaji TCM darowansku kwitowanku, trjeba pak dospołnu adresu, kotruž měli z mejlku na TCM@Posol.de abo telefonisce pod (0 35 91) 55 02 10 zdźělić.
Na wotkrywansku turu po Drježdźanskej katedrali su dźěći wot šěsć lět, młodostni a swójby přeprošene. Wječorne wodźenja z kapsnej lampu poskićuja we wobłuku 275. róčnicy poswjećenja Dwórskeje cyrkwje. Za póndźelu, 19. oktobra, w 19.00 a 20.00 hodź. maja hišće swobodne městna.
Dalše pokiwy su w Powšitkownych wozjewjenjach podate.
Serbska protyka
