Katolski Posoł – 6. oktobra 2024
Wo ewangeliju tuteje njedźele rozmysluje awtor w swojim zawodnym nastawku. Mjez druhim wón wuwjedźe, na kotre wašnje Bóh zwjazuje a hdźe da so nańć.
Biskopja Němskeje a dalši hosćo zeńdźechu so w Fuldźe k swojej nazymskej plenarnej zhromadźiznje. Na njej zaběrachu so mjez druhim z wšelakimi nadawkami a wužadanjemi cyrkwje kaž tež reformowym projektom Synodalny puć a swětowej synodu, kotraž bu spočatk oktobra we Vatikanje zahajena.
Křesćansku zhromadnosć su wěriwi w Chrósćicach hajili. Tam běše Towarstwo Cyrila a Metoda na nyšpor přeprosyło, na kotrymž požohnowa duchowny zdobom konjace zapřahi a jich sobujěducych.
Mnozy Serbja podachu so kónc septembra do čěskeho biskopskeho města. Tam bu serbski duchowny do katedralneho kapitla biskopstwa w sewjeru kraja přiwzaty.
Swjedźeń dźakownosće a zboža swjećachu Ralbičanscy wosadni poslednju njedźelu septembra. Za to běchu městno před wołtarjom z najwšelakorišimi žiwidłami a přirodnej dekoraciju wupyšili.
Serbska skupina je na přeprošenje sekcije Wěda a skutk Towarstwa Cyrila a Metoda w južnej Baworskej přebywała. Wobdźělnicy wopytachu mjez druhim barokne město w Awstriskej a wobdźiwachu horu, kotruž móžeš sej we wosebitej wustajeńcy w Drježdźanach jako mólbu wobhladać.
Ze seriju telewizijneho sćelaka ZDF, w kotrejž tohorunja Serbowka sobuskutkuje, zaběrachu so serbscy młodostni na swojich kubłanskich dnjach w Schmiedebergu. Ale tež křesćanskej etice so tam wěnowachu a so na wšelake wašnje kreatiwnje zaběrachu.
Wo swojich nazhonjenjach we wosadomaj w Sewjernej Americe je serbski duchowny w Pančicach-Kukowje přednošował. Při tym poćahowaše so tež na knihu, kotruž běše w tym zwisku čitał.
Serbske spěwne ćěleso je na nazymskim koncerće w Salowje publikum zawjeselił. Mjez druhim překwapichu přitomnych z pěsnju, kotrejež originalny tekst je znata serbska wosobina spisała.
Wo mnohich małych domchowankach we wšědnym žiwjenju pisataj Hańžka a Feliks na dźěćacej stronje. Zdobom nańdu dźěći tam mału prózdninsku zaběru a někotre zajimawostki kołowokoło rosćenja.
Dekanatne dušepastyrstwo
přeprošuje wšitke dźěći,
kotrež so na prěnje swjate
woprawjenje přihotuja,
na zhromadny dźeń srjedu,
20. nowembra, wot 9.00 do
15.00 hodź. do Njebjelčic.
Započatk je z Božej mšu
w cyrkwi. Zajimcy njech so
hač do póndźele, 21. oktobra,
online přizjewja.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Dwě wosadźe w Pólskej, kotrejž stej wot powodźenja jara sylnje potrjechenej, chce Towarstwo Cyrila a Metoda z.t. (TCM) ze swojej akciju „Łužica pomha“ podpěrać. Kontakt k nim nawjaza wone přez swojeho kruteho partnera w susodnym kraju, prelata dr. Dariusza Kruczyńskeho. Štóž chcył wot powodźenja domapytanu ludnosć podpěrać, njech přepokaza pjenjezy na konto TCM: Cyrill-Methodius-Verein e.V., IBAN: DE 65 7509 0300 0008 2823 66, hesło: „wulka woda“. Štóž sej darowansku kwitowanku přeje, měł swoju adresu podać, pak telefonisce pod čisłom (0 35 91) 55 02 10 pak z mailku na TCM@Posol.de.
Twórby serbskeju komponistow Jurja Pilka a Bjarnata Krawca steja w srjedźišću 1. sinfoniskeho koncerta Budyskeho Serbskeho ludoweho ansambla. Tón budźe njedźelu, 20. oktobra, w 17.00 hodź. na tamnišej žurli.
Na próstwu Towarstwa Cyrila a Metoda z.t. (TCM) poskićuje Norman Reitner z Drježdźanskeho biskopskeho ordinariata kurs k tomu, kak móžeš projekty derje planować a k tomu pjenjezy na wšelakore wašnje požadać. Dalekubłanje na polu sponsoring a foundraising wotměje so sobotu, 9. nowembra, wot 9.00 do 16.00 hodź. na „Radlubinje“ w Ralbicach. Zajimcy – nimo čłonow TCM su tež dalši přeprošeni – měli so online přizjewić.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Wotedać hodźa so dary pjatk a sobotu, 8. a 9. nowembra, kaž tež pjatk a sobotu, 15. a 16. nowembra. Dokładnišo so to sčasom wozjewi.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
