Katolski Posoł – 4. oktobra 2026
Wo pokładźe, kiž je drohotniši hač wšo materielne, pisa duchowny w swojim zawodnym nastawku. Při tym poćahuje so tohorunja na swjateho, kotryž je tele dny před 800 lětami zemrěł.
Na swojim pastoralnym wopyće je bamž Leo XIV. wšu Francosku jimał. Nimo stolicy kraja wopyta mjez druhim tež znate marijanske putniske městno.
Nowy duch z nowym předsydu a nowym nunciusom knježi w Němskej biskopskej konferency a ma so tež na druhich přenjesć. Biskopja mějachu w Fuldźe swoju nazymsku plenarnu zhromadźiznu.
Za nabožne žiwjenje maja w Ralbičanskej wosadźe wotnětka nowy domicil. 13 měsacow po zahajenju twara je jón farar Šćěpan Delan kónc septembra poswjećił.
Generacije přesahowacu radosć z wěry dožiwichu we Worklecach. Tam su pěstowarske dźěći zhromadnje z wopytowarjemi dnjoweje hladarnje domchowanku swjećili.
Před 800 lětami zemrě swojowólny swjaty, kiž ludźi hač do dźensa fascinuje. Jeho najznaćiša pěseń bu tež do serbšćiny přenjesena a je we Wosadniku wozjewjena.
Wo trěbnej zamołwitej zhromadnosći prědowaše serbski duchowny w Chrósćicach. Na łuku při Hatkach bě wjace hač 550 wosobow přeprošenje Towarstwa Cyrila a Metoda z.t. na nyšpor z požohnowanjom konjacych zapřahow sćěhowało.
Spěwne ćěleso serbskeje wosady je w susodnej wosadźe swoje lětuše chórowe lěhwo předwjedło. Na kóncu je wone tam tohorunja njedźelnu Božu mšu wobrubiło.
Cyłkownje 37 młodostnych je w Njebjelčicach sakrament swjateho firmowanja přijało. Spožčił pak njebě jim jón tónraz biskop, ale serbski kanonik.
Na hudźbnu jězbu po Jakubowym puću móžachu so wopytowarjo koncerta w klóšterskej cyrkwi w Pančicach-Kukowje podać. Jón wuhotowaše chór ewangelskeje wosady z kónčiny nad Delnim Rynom.
Ewangelske nabožne wusyłanje w Serbskim rozhłosu MDR ma tutu njedźelu, 4. oktobra, fararka Jadwiga Malinkowa z Budyšina.
Chowancy Budyskeje Tachantskeje spěwneje šule wobrubja njedźelu, 4. oktobra, w 9.00 hodź. konwentnu Božu mšu w klóštrje Marijinej hwězdźe w Pančicach-Kukowje. Tachantska spěwna šula je hudźbny poskitk za dźěći a młodostnych, při kotrymž zeznaja cyrkwinsku hudźbu a nawuknu nimo hudźbneje teorije tak spěwać, zo móža Bože mšě wobrubjeć.
Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošene. Tón budźe srjedu, 18. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje witani. Zajimcy njech so hač do wutory, 27. oktobra, přizjewja.
Lětuša chórowa akademija Budyskeho Rotaryjoweho kluba pod nawodom Friedemanna Böhme změje swój beneficny koncert njedźelu, 11. oktobra, w 17.00 hodź. w Budyskej Michałskej cyrkwi. Wunoški wěnuja na dobro swětoweho programa Rotaryjoweho kluba k wutupjenju spinalneje mortwicy (Kinderlähmung). Zastup je darmotny, wo dary proša.
Sakski krajny młodźinski chór pod nawodom z Kulowa pochadźaceho Serba Lukaša Čórlicha budźe po wjace hač sydom lětach znowa z hosćom we Łužicy. Koncert w Kulowskej cyrkwi wuhotuje chór njedźelu, 17. oktobra, w 17.00 hodź. Zastup je darmotny, wo dary proša. Nazajtra, njedźelu, 18. oktobra, w 9.00 hodź. wobrubi spěwne ćěleso Božu mšu w Chróšćanskej cyrkwi.
Pod titulom „Zbrašenosć. Žana hranica! – Tysac lět nazhonjenjow – wot Hermanna chromeho hač do dźensnišeho“ přeprošuje wustajeńca do klóštra Marijineje hwězdy w Pančicach-Kukowje, so z tutej temu zaběrać. Wotewru ju wutoru, 20. oktobra, w 19.00 hodź. na Čerwjenej žurli klóštra. Wustajeńca wostanje w rumnosći mjez klóšterskim dworom a parkowanišćom hač do njedźele, 3. nowembra, přistupna a wšědnje wot 16.00 do 19.00 hodź. kaž tež po telefoniskim přizjewjenju pod čisłom (01 76) 87 85 20 69 wotewrjena.
Wšitcy młodostni a młodźi dorosćeni w starobje 18 do 35 lět – tež serbscy – su přeprošeni, so zhromadnje na europske zetkanje Taizéskeje zhromadnosće podać. Wone wotměje so wot póndźele, 28. decembra, do pjatka, 1. januara, we Łódźi.
Hornjołužiski zwjazk Carity z.t. přeprošuje pod hesłom „Caritas zwjazuje generacije“ na dźeń wotewrjenych duri sobotu, 10. oktobra, wot 14.00 do 18.00 hodź. na Zapadnu dróhu 22 w Kamjencu. Hosćom poskića wotměnjawy popołdniši program.
Dalše pokiwy su w Powšitkownych wozjewjenjach podate.
Serbska protyka
