Katolski Posoł – 2. februara 2025
W swojim zawodnym nastawku rozmysluje serbski duchowny wo zjawje, kotryž w towaršnosći dźeń a bóle přiběra. Zdobom pohnuwa wón k rozmyslowanju, što móhło pomhać jón přewinyć.
Na wulkim chórowym projekće wobdźělichu so wospjet tež Serbja. Wo swojch dožiwjenjach a zakónčacym koncerće w Drježdźanach pisa jedna z wobdźělnicow w swojim přinošku.
Křižna ikona Assisiskeje cyrkwje San Damiano je znamjo Drježdźansko-Mišnjankeho biskopstwa za Swjate lěto 2025. W swojim přinošku ju serbski duchowny bliže předstaja.
Serbowka ze Sulšec pola Kulowa wobdźěla so wot 2022 na teologiskim wukubłanje za lajkow. Dalši tajki kurs započnje so lětsa w septembrje w Hochaltingenje a traje hač do 2028.
Na internetowej stronje Katolskeho Posoła nańdu zajimcy wotnětka rubriku k Swjatemu lětu 2025. W běhu lěta budźe ju redakcija dale wudospołnjeć.
Sekcija wěda a skutk Towarstwa Cyrila a Metoda z.t. (TCM) přewjedźe wot póndźele, 29. septembra, do pjatka, 3. oktobra, wulět přez Helfta a Bad Frankenhausen do Heiligenstadta. Wottam poda so skupina na wšelake městna Eichsfelda kaž tež do Göttingena. Zajimcy měli so hač do pjatka, 28. februara, w redakciji Katolskeho Posoła přizjewić, telefonowe čisło (0 35 91) 55 02 10. Zdobom měli potom na konto TCM 200,00 eurow napłaćić.
Gabriela Pappai přednošuje sobotu, 8. februara, w 19.45 hodź we wobłuku Kulturneje zymy w putniskej hospodźe Moniki Gerdesoweje w Chrósćicach k temje „Židowski potret: Pianistka Alice Herz-Sommer“. Hižo w 16.00 hodź. čita hosćićelka dźěćom bajku.
Na swjedźensku Božu mšu na wopomnjenskim dnju zbóžneho martrarja Alojsa Andrickeho su wěriwi póndźelu, 3. februara, we 18.30 hodź. do Radworja prošeni. Swjedźenski prědar budźe farar Matthias Kocner z Budyšina. Po kemšach je šijeswjećenje.
K temje „Pěši do Roma. Jurja Wawrikowy putniski dźenik z lěta 1842“ přednošuje dr. Lubina Malinkowa z Budyskeho Serbskeho instituta wutoru, 11. februara, w 19.00 hodź. na žurli Budyskeho Zwjazka archiwow na Hrodowej 12. Zastup je darmotny.
Pod hesłom „Pój, wjesel so!“ su dźěći 1. a 2. lětnika w zymskich prózdninach do Don Boskoweho domu we Worklecach přeprošene. Zarjadowani wotmějetej so po wutoromaj, 18. kaž tež 25. februara, wot 9.00 do 15.00 hodź. Přizjewjenje je hač do njedźele, 9. februara móžne. Njech so dźěći póstnisce předrasća.
Na serbsku putnisku jězbu do Weserskich horin wot póndźele do štwórtka, 14. do 17. julija, přeprošuje Radworske Šmitec-Schwarzec busowe wozydłownistwo. Duchowny nawod změje farar Gabriš Nawka. Přizjewjenja přijimuja w Radworju, telefonowe čisło (03 59 35) 28 60.
Na putnisku jězbu do Lourdesa a La Salette wot pjatka do njedźele, 16. do 25. meje, přeprošuje Šěrachowski pućowanski běrow A-Teams. Wobdźělnicy wopytaja mjez druhim tež Monaco a Avignon. Dalše informacije a přizjewjenja dóstanu zajimcy pola Matthiasa Hadanka w Hórkach pod telefonowym čisłom (01 63) 7 33 82 05 abo w interneće pod www.ateams.de.
Ambulantna hospicna słužba Hornjołužiskeho zwjazka Carity
z.t. w Kamjencu poskićuje lětsa zaso kurs k čestnohamtskemu
přewodźenju ćežkochorych a mrějacych. Štóž chcył
wukubłanje absolwować, měł so pola hospicneje słužby
Carity w Kamjencu přizjewić.
Serbska protyka
