Katolski Posoł – 1. nowembra 2026
Moderneho wołtarneho wobraza dla titul swětoweho kulturneho herbstwa UNESCO Naumburgskeho doma na hračkach steji. Awtor zawodneho nastawka poćahuje so k swjedźenjej Wšěch swjatych na mólbu Michaela Triegela wo njewšědnych swjatych wšědneho žiwjenja.
Z dźaknymi kemšemi w kopatej połnej Drježdźanskej katedrali woswjeći starobiskop Joachim Reinelt swoje 90. narodniny – hódnoćeny jako njesprócniwy budźer nadźije a dušepastyr w hibićiwych časach. Na slědowacym přijeću zaklinča serbska „Sława“ za biskopa, kiž dósta tež mału klanku.
Smjertna zwada wo pokrutu chlěba, zachribjetnje zabitaj buraj a dźiwne skalne formacije kamjenjow: Wuchodnje Budyšina swědča z mochom porosćene kamjenje wo čłowječej winje, wo zadwělowanosći a wosudach dawnych dnjow, kotrež něhdyši Budyski zwóńk na nazymskej ekskursiji předstaji.
Serbscy křižerjo, kotřiž chcedźa so klětu na putnikowanju wot soboty do soboty, 1. do 8. meje, wobdźělić, móža so na internetowej stronje www.posol.de hač do póndźele, 2. nowembra, přizjewić. Tam su nadrobne informacije podate. Kruh móžnych wobdźělnikow je powjetšeny a doba přizjewjenja podlěšena.
W časach pozhubjowaceje wěry pytaja za tym, što móhli z Božich domow činić, kotrež wosady hižo njewužiwaja. Na kongresu w Berlinje, kotryž wobjednawaše tež serbsku temu, předstajichu kreatiwne koncepty přetworjenja.
Něhdy njepowalna bašta katolicizma w Pólskej pozhubjuje w razantnym tempje wěriwych a dowěru młodźiny. W interviewje wotkrywa dominikanski pater Tomasz Dostatni hłuboke přičiny tuteje krizy a rozłožuje, što měło cyrkej činić.
Při wobnowjenskich dźěłach na studni Krupčanskeje cyrkwje je archeologowka njewočakowano dawno zabyte napisy na sćěnje našła. Při tym jedna so mjez druhim wo dźakne słowa putnikow.
Katolske nabožne wusyłanje w Serbskim rozhłosu MDR ma tutu njedźelu, 1. nowembra, farar Gabriš Nawka z Kulowa.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a wosebje za dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Słódkosće měli separatnje spakować. Wotedać hodźa so dary po móžnosći w měchach – sćěhowace dny pola Špitankec w Zejicach, Kamjenska dróha 10: sobotu, 7. nowembra, wot 9.00 do 12.00 hodź., pjatk, 13. nowembra. wot 15.00 do 18.00 hodź. kaž tež sobotu, 14. nowembra, wot 9.00 do 11.00 hodź.
Kumštnu inteligencu (KI) na lochke wašnje kompetentnje nałožować nawuknyć poskićuje Sakski katolski zwjazk za kubłanje dorosćenych (KEBS) wot nowembra 2026 do apryla 2027. Poskitk měri so na wšitkich, kotřiž chcedźa kumštnu inteligencu zrozumić, ju praktisce wupruwować a zamołwiće nałožować.
Na digitalne zarjadowanje pod titulom „Nadźija na žiwjenskich mjezach. Liturgiski přewod w chorosći, mrěću a žarowanju“ přeprošuja Němski liturgiski institut, Katolska akademija Drježdźansko-Mišnjanskeho biskopstwa a partnerojo. Zarjadowanje wotměje so sobotu, 7. nowembra, wot 9.30 do 13.00 hodź. Wobdźělenje je tež jako jednotliwc abo jako skupina móžne. Zajimcy měli so za zarjadowanje online přizjewić.
Młodźi dorosćeni w starobje 18 do 35 lět su na kubłansku jězbu klětu wot pjatka do njedźele, 15. do, 17. januara, do Winfriedoweho doma w Schmiedebergu přeprošeni. Při rozmołwach, kreatiwnych dźěłarničkach a wšelakich hrach změja woni składnosć nowych ludźi zeznać, nowe nazhonjenja zběrać a při tym sej swójsku wěru znowa wotkryć. Přizjewić móža so zajimcy online. Tam su tež płaćizny podate.
Seminar k přihotej na sakrament mandźelstwa wotměje so wot pjatka do soboty, 27. do 28. nowembra, w Smochčanskim kubłanišću swjateho Bena. Přizjewjenja Dekanatne dušepastyrstwo młodźiny we Worklecach online přijimuje.
Nowy duchowny poskitk je redakciski team Dekanatneho dušepastyrstwa za młodźinu we Worklecach spřihotował. Wotnětka móža so zajimcy krasnosćiwy róžowc w serbskej rěči sobu modlić, kotryž je online wozjewjeny.
Pod titulom „Zbrašenosć. Žana hranica! – Tysac lět nazhonjenjow – wot Hermanna Chromeho hač do dźensnišeho“ přeprošuje wustajeńca do klóštra Marijineje hwězdy w Pančicach-Kukowje, so z tutej temu zaběrać. Wustajeńca je w rumnosći mjez klóšterskim dworom a parkowanišćom hač do wutory, 3. nowembra, přistupna. Wona je wšědnje wot 16.00 do 19.00 hodź. kaž tež po telefoniskim přizjewjenju pod čisłom (01 76) 87 85 20 69 wotewrjena.
Wšitcy młodostni a młodźi dorosćeni w starobje 18 do 35 lět – tež serbscy – su přeprošeni, so zhromadnje na europske zetkanje Taizéskeje zhromadnosće podać. Wone wotměje so wot póndźele, 28. decembra, do pjatka, 1. januara, we Łódźi.
Dalše pokiwy su w Powšitkownych wozjewjenjach podate.
Serbska protyka
