Katolski Posoł – 6. apryla 2025
W swojim zawodnym nastawku serbski duchowny wo tym pisa, što jeničce lubosć zamóže. Na to dopomina tohorunja ewangelij tuteje njedźele. Zdobom awtor wuwjedźe, do kotreje hłubokosće tale lubosć saha.
Jědnaće stacijow, miła hudźba, wobswětlene sćěny a swěčki su w Róžeńčanskej swjatnicy k modlenju a rozpominanju přeprošeli. Tam wotmě so we wobłuku Swjateho lěta „Nóc wujednanja“.
W Chrósćicach hotuja so w dźesaćlětnym rytmusu na inscenaciju Jězusoweho ćerpjenja. Na pasionske předstajenje chcedźa pak lětsa z hinašimi wočemi hač dotal hladać.
Druhi Vatikanski koncil, młodźina a Immanuel Kant běchu bamžej Janej Pawołej II. wosebje wažni. Jako kardinal je tohorunja Serbow wopytał. Spočatk apryla běše tomu 20 lět, zo je prěni słowjanski kaž tež mjeztym swjatoprajeny swjaty wótc zemrěł.
Němska biskopska konferenca je statistiku katolskeje cyrkwje w Němskej za loni wozjewiła. Porno wšěm druhim je w Serbach jedna ličba w přirunowanju ze zašłymi lětami stupała.
Biskop Heinrich Timmerevers je štwórtu póstnu njedźelu młodostnym w Chrósćicach sakrament swjateho firmowanja wudźělił. Z tym běchu młodostni slub wosobinsce wobkrućili, kotryž běchu při swjatej křćeńcy jich starši a kmótřa za nich złožili.
We wsy w Eichsfeldźe bu w měrcu po dwanaće lětach zaso pasion předstajeny. Na njón kaž tež na zetkanje někotrych pasionskich skupin běchu tež zastupjerjo serbskeho pasionskeho zjednoćenstwa přeprošeni.
Młodych čitarjow wočakuje na dźěćacej stronje tónraz kóstkowa hra. Z njej lětuša póstna serija za dźěći zdobom skónči.
Katolska wosada Marije kralowny róžowca w Radworju pyta za swój dźěćacy dom „Alojs Andricki“ nuznje kubłarku abo kubłarja. Městno je najprjedy hač do junija 2026 wobmjezowane. Požadanja přijimuja hač do srjedy, 30. apryla.
Smochčanske kubłanišćo swjateho Bena přeprošuje na pasionsku hudźbu ze smyčkowym kwartetom Budyskeho Serbskeho ludoweho ansambla. Na programje wulki pjatk, 18. apryla, w 19.30 hodź. steji twórba „Sydom poslednich słowow našeho Wumóžnika na křižu“ Josepha Haydna (1732–1809).
Pod nawodom Tvrtka Karlovića předstaji chór Budyskeho Serbskeho ludoweho ansambla zhromadnje ze solistami kaž tež organistom Johannesom Kralom na pišćelach pjatk, 11. apryla, we 18.30 hodź. we Wojerowskej Janskej cyrkwi. „Missu D-dur op. 86 Lužanská“ čěskeho komponista Antonína Dvořáka. Dalšej předstajeni budźetej njedźelu, 13. apryla, w 16.00 hodź. we Wósporkskej cyrkwi kaž tež srjedu, 18. junija, w 19.00 hodź. w Budyskej tachantskej cyrkwi swjateho Pětra.
Dekanatne dušepastyrstwo za dźěći a młodźinu we Worklecach přeprošuje šulerki
a šulerjow nětčišich 5. do 8. lětnikow w lěćnych prózdninach na jězbu do Zehrena blisko
Mišna. Wona wotměje so wot póndźele do pjatka, 21. do 25. julija. Přizjewjenja přijimuja so hač do njedźele, 18. meje,
online.
Zhromadne dopołdnjo pod hesłom „Wujednaj so!“ wotměje so za šulerjow 6. do 8. lětnika sobotu, 12. apryla, wot 9.00 do 12.00 hodź. w Don Boskowym domje we Worklecach. Tón dźeń wobsteji móžnosć, sakrament wujednanja, swjatu spowědź, přijimać. Přizjewjenja přijimuja hač do srjedy, 9. apryla, online.
Njebjelčanski młodźinski chór wuhotuje sobotu, 12. apryla, w 20.00 hodź. w tamnišim Božim domje „Hodźinku před Bohom“ pod hesłom „Žórło nadźije leži w Bohu“. Na pěsnje, psalmy a modlitwy słuchajo su wšitcy přeprošeni, před Bohom wutrać a so dušinje na jutry přihotować.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 28. apryla, wot 18.00 do 21.00 hodź. na Budyskej farje. Dalše změja po wutorach, 29. apryla, w Kamjenicy, 13. meje w Lipsku a 27. meje w Drježdźanach planowane, kaž tež štwórtk, 15. meje, online. Zajimcy měli so online přizjewić. To je hač do jednoho tydźenja do woleneho zarjadowanja móžne.
Wotwobarać seksualizowanu namóc je wažny wobstatk dźěła z
dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Hornjołužiske telefonowe dušepastyrstwo přeprošuje na rjad filmow z rozmołwami wo depresiji, zmištrowanju žarowanja, samotnosći a identiće. Wone steja pod hesłom „Filmy, kotrež jimaja – Rozmołwy, kiž zwjazuja“ a pokazuja so wotměnjejo w Budyšinje a Zhorjelcu. Prěni film štwórtk, 10. apryla, we 18.00 hodź. w kinje Budyskeho Kamjentneho doma na Kamjentnej 37 wěnuje so temje „Wer wir gewesen sein werden“ filmoweho režisera a awtora scenariow Ereca Brehmera. Přizjewjenje njeje trěbne. Zastup je darmotny.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić. Zajimcy měli so hač do srjedy, 30. apryla, online
přizjewić.
Serbska protyka
