Katolski Posoł – 13. julija 2025

W aktualnym wudaću nańdźeće mjez druhim tole:

Što woprawdźe woznamjenja, miłosćiwy być – a kak móže so žiwjenje změnić, praša so awtor zawodneho nastawka. A wón rozłoži, čehodla je jednore prašenje před dołhim časom hač do dźensnišeho ludźom wažne.

Wosrjedź swojeje lětnjeje přestawki wotewri bamž Leo XIV. znowa wrota Vatikana za rozmołwy mjez dwěmaj krajomaj, kotrejž stej we wójnje. A swjaty wótc bu do jednoho z tuteju krajow přeprošeny.

W interneće šěrja so dźeń a wjace sfalšowanych widejow – tež z pozdatnymi prědowanjemi bamža Leja XIV. Vatikan pokazuje puć, kak móžeš woprawdźite wot wopačnych rozeznawać.

Wo digitalnym swěće a wěčnych hódnotach reflektuje serbski bohosłowc. Wón je swoje mysle jendźelsce a potom tež serbsce spisał.

Bamž namołwja zaprěwarjow klimoweje změny so nakazać. Wón je za to na přiměrjenym městnje prěni raz Božu mšu pod nowym formularom, kotryž je Vatikan spočatk julija, wozjewił, swjećił.

Sakski katolski zwjazk za kubłanje dorosćenych (KEBS) ma wotnětka dwójne wjednistwo. Jedyn z nawodow je Serb.

Štó znaje něhdyšich serbskich putnikow do Vilémova? Křesćan z Čěskeje chce składnostnje jubileja klětu brošuru wudać a Serbow zapřijeć. Štóž móže pomhać, njech wobroći so na redakciju Katolskeho Posoła.

Česćowanje swjateje Marije na horje Zvir pola Litmanovy w Słowakskej je Vatikan dowolił. Nadpřirodnosć tam přizjewjenych zjawow pak njeje wón připóznał.

Wo začućach su dźěći w Baćonju rozmyslowali. Mać wopisuje lětuši tamniši nabožny tydźeń.

Wěra, hra a zhromadnosć stejachu za dźěći Radworskeje wosady w srjedźišću nabožneho tydźenja. Při jednym wopyće mějachu telko prašenjow, zo dyrbješe wosadny farar to samo dalšeho za dźěći wažneho termina dla přetorhnyć. – wjace fotow

Serbska dekanatna młodźina je na wulět přeprošena, kotryž budźe njedźelu, 24. awgusta. Planowane je z busom do Deška pola Rózborka jěć a wottam po Nysy čołmikować.

Na wuměnu z pólskimi młodostnymi a dźěłarničku ikonografije přeprošuje Budyski Serbski muzej młodostnych. Ta budźe wot pjatka do soboty, 19. do 20. septembra, w „Domje Gerharta Hauptmanna“ w Jelenjej Górje a je za młodostnych darmotna.

Wšitcy wěriwi su sobotu, 23. awgusta, na zhromadny dźeń Budyskeho dekanata pod hesłom „Marija – znamjo nadźije“ do Róžanta přeprošeni. Liturgiske zahajenje budźe w 15.00 hodź. z wustajenjom Najswjećišeho w putniskej cyrkwi. Hižo wot 14.00 hodź. poskića wosady kofej, jeli to same organizuja. Štóž chce, móže piknikować. Wot 16.00 do 18.00 hodź. změja zamołwići pisany program wokoło cyrkwje spřihotowany. Dekanatny dźeń zakónči so z Božej mšu we 18.00 hodź. w Róžeńčanskej swjatnicy. Tón dźeń předwječorne kemše w serbskich wosadach njebudu.

Na zahrodźe klóštra Marijineje hwězdy w Pančicach-Kukowje dožiwja wopytowarjo sobotu, 19. julija, wot 19.00 hodź. zaso „Nóc tysac swěčkow“. Hač do zaswěćenja swěčkow poskića pisany program na jewišću.

Lětuši Gig-festiwal je wot pjatka do njedźele, 15. do 17. awgusta, w Róžeńće planowany. Program kaž tež přehlad wobdźělnikow stej na internetowej stronje festiwala wozjewjenej.

Serbska protyka

Katolski Posoł – 13. julija 2025

W aktualnym wudaću nańdźeće mjez druhim tole:

popularne wudaća

…

zašłe wudaća

dalše informacije